އާއުސޫލާއެކު އެއްވެސް ލީޑިން ޓީޗަރެއްގެ ވަޒީފާ ނުގެއްލޭނެ: އެޑިޔުކޭޝަން

ލީޑިން ޓީޗަރުންގެ ޒިންމާ ބަދަލުކުރުމުގެ އުސޫލުގެ ދަށުން މިހާރު ތިބި އެއްވެސް ލީޑިންގ ޓީޗަރެއްގެ ވަޒީފާ ގެއްލިގެން ނުދާނެ ކަމަށް އެޑިޔުކޭޝަން މިނިސްޓްރީން ބުނެފިއެވެ.

ލީޑިންގ ޓީޗަރުންގެ މަގާމު އުވާލާފައިވާ ކަމަށް ބުނެ ބައެއް ޓީޗަރުން ކަންބޮޑުވުންފާޅުކުރަމުންދާތީ މިނިސްޓްރީން ނެރުނު ބަޔާނުގައި ބުނީ މިމަހު 07 ގައި އާއްމުކޮށްފައިވާ ''ލީޑިން ޓީޗަރުންގެ ޒިންމާ ބަދަލުކުރުމުގެ އުސޫލު'' އަކީ ލީޑިންގ ޓީޗަރުކަމުގެ މަސްއޫލިއްޔަތަކީ 2 އަހަރު ދުވަހުގެ ޓެނުއަރޝިޕްއެއްގެ ގޮތުގައި ކަނޑައަޅައި، ހުރިހާ ސްކޫލެއްގައި ވެސް އެއް ހަމައެއްގައި އެކަން ތަންފީޒު ކުރުމުގެ ބޭނުމުގައި އެކުލަވާލެވުނު އުސޫލެއް ކަމަށެވެ.

އެޑިޔުކޭޝަނުން ބުނީ ލީޑިން ޓީޗަރު ކަމަކީ މާގާމެއް ނޫން ކަމަށާއި، އެއީ ޓީޗަރުންގެ ތެރެއިން ވަކި ޝަރުތުތަކެއް ހަމަވާ ފަރާތްތަކަކަށް، ކަނޑައެޅޭ އުސޫލުތަކާ އެއްގޮތަށް ހަވާލުކުރެވޭ މަސްއޫލިއްޔަތެއް ކަމަށެވެ. އަދި އަލަށް އަމަލުކުރެވޭ އުސޫލުގެ ދަށުން މިހާރު ތިބި އެއްވެސް ލީޑިންގ ޓީޗަރެއްގެ ވަޒީފާ ގެއްލިގެން ނުދާނެ ކަމަށް މިނިސްޓްރީން ބުންޏެވެ.

އެޑިޔުކޭޝަނުން ބުނީ އަލަށް އަމަލުކުރެވޭ އުސޫލުގެ ދަށުން މިހާރު ތިބި ހުރިހާ ލީޑިންގ ޓީޗަރުން ވެސް އެޓީޗަރަކު ޚާއްސަވެފައިވާ ކިޔަވައިދިނުމުގެ ދާއިރާއިން ސިވިލް ސަރވިސް އޮނިގަނޑުގައި އެމީހަކަށް ދަރަޖަ ކުރެވޭ ޓީޗަރެއްގެ ފަންތީގައި، އެމަގާމަށް 07 ސެޕްޓެންބަރު 2019ގެ ނިޔަލަށް ރުޖޫއަކުރެވޭނެ ކަމަށެވެ. އަދި 31 ޑިސެންބަރު 2019ގެ ނިޔަލަށް މިއުސޫލާ އެއްގޮތަށް ލީޑިންގ ޓީޗަރުންގެ ގޮތުގައި އެސުކޫލަކަށް ކަނޑައެޅޭ އަދަދަށް ލީޑިންގ ޓީޗަރުންގެ ޒިންމާ ހަވާލުކުރާނެ ފަރާތްތައް ކަނޑައެޅިމުގެ މަސައްކަތް ކުރިއަށް ގެންދެވޭނެ ކަމަށެވެ.

މިމަސައްކަތް ކުރިއަށް ދިޔަ ނަމަވެސް 31 ޑިސެންބަރު 2019ގެ ނިޔަލަށް މިހާރު ތިބި ލީޑިންގ ޓީޗަރުންނަށް މިހާރު ލިބެމުންދާ މަސްއޫލިއްޔަތުގެ އެލަވަންސް ލިބެމުންދާނެ ކަމަށާއި، އަލަށް އައްޔަންކުރެވޭ ލީޑިންގ ޓީޗަރުންނަށް ވެސް ޓެނުއަރޝިޕް އެލަވަންސްގެ ގޮތުގައި 1000 ރުފިޔާ ކޮންމެ މަހެއްގައި ލިބޭނެ ކަމަށް އެޑިޔުކޭޝަން މިނިސްޓްރީން ބުންޏެވެ.

މީގެ އިތުރުން މިނިސްޓްރީން ބުނީ 2020 ވަނަ އަހަރު މިއުސޫލަށް އަމަލުކުރެވިގެންދާއިރު މިހާރެކޭ ވެސް އެއްގޮތަށް އެސުކޫލަކަށް ކަނޑައެޅިފައިވާ އަދަދަށް ލީޑިން ޓީޗަރުން އެސުކޫލެއްގައި ތިބޭނެ ކަމަށާއި، މިއުސޫލުގެ ދަށުން ލީޑިންގ ޓީޗަރުން ނެގުމުގެ މަރުހަލާތައް ކުރިއަށް ގެންދެވޭއިރު މިހާރު ތިބި ލީޑިންގ ޓީޗަރުންނަށް ވެސް ކުރިމަތިލައިގެން ލީޑިންގ ޓީޗަރަކަށްވުމުގެ ވުމުގެ ހަމަހަމަ ފުރުސަތު އޮންނާނެކަމަށެވެ.

އޭޑިޔުކޭޝަނުން ބުނީ ލީޑިންގ ޓީޗަރުންނާއި ގުޅިގެން މިހާރު އަމަލުކުރަމުންދާ އުސޫލުން ވެސް ލީޑިންގ ޓީޗަރުންނަކީ 2 އަހަރު ދުވަހުން ބަދަލުވާ ގޮތަށް އައްޔަންކުރެވޭ ބައެއް ނަމަވެސް އެކަން ހުރިހާ ސްކޫލްތަކުގައި އެއް ހަމަޔައަކުން އަމަލުކުރެވެމުން ނުދާކަން ފާހަގަކުރެވިފައިވާ ކަމަށެވެ.

އެހެންކަމުން މިއުސޫލާއެކު ހުރިހާ ސްކޫލެއްގައި ވެސް ލީޑިންގ ޓީޗަރުން އައްޔަންކުރުމާއި މަސްއޫލިއްޔަތު ހަވާލުކުރުން އެއްހަމައެއްގައި އަމަލުކުރެވިގެންދާނެ ކަމަށް މިނިސްޓްރީން ބުންޏެވެ.

އެޑިޔުކޭޝަނުން ބުނީ މިއުސޫލު ވުޖޫދު ކުރެވިފައިވަނީ ފުޅާ ދާއިރާއެއްގައި ހުރިހާ ސްކޫލުތަކުގެ ޕްރިންސިޕަލުންނާއި، މިނިސްޓްރީ އޮފް އެޑިއުކޭޝަންގެ ކަމާ ގުޅުންހުރި ފަރާތްތަކާއި، ސިވިލް ސަރވިސް ކޮމިޝަނާ މަޝްވަރާކުރެވި ސްކޫލުތަކުގެ ކިޔަވައިދިނުމުގެ މިންގަނޑުތަކަށް އިތުރަށް ހަރުދަނާ ކުރުމަށް ކަމަށެވެ.