ކޮންޓްރެކްޓް ފާރމިންގެ އަމަލީ މަސައްކަތް ލ އަތޮޅުގައި ފަށައިފިއެވެ.

މިއީ ރާއްޖޭގައި މުޅިން އަލަށް ފަށާ މަޝްރޫއެކެވެ. ކޮންޓްރެކްޓް ފަރމިންގެ ފުރަތަމަ ފިޔަވަހީގެ ދަށުން މި ފުރުސަތު ހުޅުވާލާފައިވަނީ ލ އަތޮޅަށް އެކަންޏެވެ. އެގްރޯނެޓުން އެއްބަސްވުންތަކުގައި ސޮއި ކޮށްފައިވަނީ ލ. ގަން، އިސްދޫ، ކަލައިދޫ، އަދި ފޮނަދޫގެ ދަނޑުވެރިންނާއެކުގައެވެ. އެހެންނަމަވެސް، އޭގެ ފަހުން ފ.މަގޫދޫ، ށ. ގޮއިދޫ، ށ. ނަރުދޫ، ބ. މާޅޮސް، ރ. ވާދޫ، ރ. ފައިނު، ނ. މަނަދޫ، ގއ. ނިލަންދޫ. ގއ. ގެމަނަފުށި، ޏ.ފުވައްމުލަށް އަދި ސ. މީދޫގައިވެސް މި ފުރުސަތު ވަނީ ހުޅުވާލާފައެވެ.

މި މަޝްރޫޢުގެ އެންމެ ފަހުގެ މަޢުލޫމާތު ހިއްސާކޮށް މަސައްކަތް ހިންގާ އެގްރޯ ނެޝަނަލް ކޯޕަރޭޝަނުން ކުރި ޓުވީޓެއްގައި ވަނީ ކޮންޓްރެކްޓް ފަރމިންގެ އަމަލީ މަސައްކަތް ލ އަތޮޅުގައި ފަށައިފައިވާކަން ހާމަކޮށްފައެވެ. މި މަސައްކަތުގެ ދަށުން މިހާރު މިރަށްރަށުގައި ގަސް ހައްދަން ގްރީން ހައުސްތައް ޤާއިމުކޮށް މެލަން ހައްދަން ފަށާފައިވާކަން އެގްރޯނެޓުން ހާމަކުރެއެވެ. އަދި ކުރިއަށް އޮތްތަނުގައި މި މަސައްކަތް ފުޅާކޮށް ގިނަ ބާވަތްތަކެއްގެ ކާނާ އުފައްދަން ތައްޔާރުވެފައިވާކަމަށްވެސް އެކުންފުނިން ބުނެއެވެ. ލ. އަތޮޅުގެ 400 އެއްހާ ރައްޔިތުން މިހާރުވެސް މި މަސައްކަތްކުރަން ޝައުގުވެރިކަން ފާޅުކޮށްފައިވާ ކަމަށް އެގްރޯނެޓުން ހާމަކުރެއެވެ.

ކޮންޓްރެކްޓް ފާމިންގގެ އުސޫލުން 45 ރަށެއްގެ ދަނޑުވެރިންނާއެކު ކުރިޔަށްއޮތް 2 މަސް ދުވަހުގެ ތެރޭ އެއްބަސްވުން ޤާއިމްކުރައްވާނެކަމަށް މިއަހަރަށް ރައްޔިތުންގެ މަޖިލީހުގެ ޖަލްސާ ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ ވަނީ ވިދާޅުވެފައެވެ.

ކާނާގެ ޔަގީންކަން ކަށަވަރު ކުރުމަށް ތިމާވެއްޓާ ރައްޓެހި ޒަމާނީ ޓެކްނޮލޮޖީގެ އެހީގައި ދަނޑުވެރިކަންކުރުމަށް ކުރިއަށްގެންދާ މި މަޝްރޫޢޫ ފަށާފައިވަނީ ޔޫއެންޑީޕީގެ އެހީތެރިކަމާއި އެކުގައެވެ. މިއީ ސަރުކާރުން އިމްޕޯޓަށް ބަރޯސާވުން ކުޑަކުރުމަށް ކުރިއަށްގެންދާ މަޝްރޫއެއް ކަމަށް އެގްރޯ ނޭޝަނަލް ކޯޕަރޭޝަން (އެގްރޯނެޓް) އިން މަޢުލޫމާތުދެއެވެ.

އެގްރޯނެޓުން ކުރިއަށްގެންދާ ކޮންޓްރެކްޓް ފާމިންގެ ދަށުން އެއްބަސްވުންތައް ޤާއިމްކޮށް ދަނޑުވެރިންނަށް ބޭނުންވާ ފަންނީ އަދި މާލީ އެހީތެރިކަން ފޯރުކޮށްދީ އެފަރާތްތަކުން ހައްދާ ތަކެތި ދާއިމީކޮށް އެ ކުންފުނިން ގަންނާނެއެވެ. މީގެ ސަބަބުން ދަނޑުވެރިންނަށް އެމީހުންގެ އުފެއްދުންތައް މާކެޓްކުރެވޭނެކަމުގެ ފުރިހަމަ ޔަޤީންކަން ލިބިގެންދާނެއެވެ. އަދި ދިވެހި ދަނޑުވެރިންގެ އުފެއްދުންތަކަށް ހަމަ އަގު ލިބިގެންދާނެއެވެ. ދަނޑުވެރިކަމުގެ ސިނާއަތު ފުޅާކުރުމަށްޓަކައި އެގްރޯނެޓަށް ސަރުކާރުން ދީފައިވާ 3 ފަޅުރަށުގައިވެސް ކުރިއަށްގެންދާނީ ފާމިންގެ މަސައްކަތްކަމަށް އެ ކޯޕަރޭޝަނުން ބުނެއެވެ. އެގްރޯ ނޭޝަނަލް ކޯޕަރޭޝަންގެ މަސައްކަތްތައް ފަށާފައިވަނީ މިއަހަރުގެ އެޕްރީލްމަހުގެ ތެރޭގައެވެ.