ބަޔާނަށް އެއްވަނައިގައި 10 ޕޮއިންޓުގެ ލީޑެއް
ހާތާ ބާލިން އަތުން ބަޔާން މޮޅުވީ 1-0 ގެ ނަތީޖާއަކުން
ހާތާ ބާލިން އާއި ބަޔާން ބައްދަލުކުރި މެޗުގެ ތެރެއިން: މި މެޗުން ބަޔާން މޮޅުވީ 1-0 ން
ޖަރުމަން ލީގުގައި ހުކުރު ދުވަހުގެރޭ ހާތާ ބާލިން ބަލިކޮށް އެންމެ ފަހުގެ ޗެމްޕިއަން ބަޔާން މިއުނިކުން ތާވަލުގެ އެއްވަނައިގައި 10 ޕޮއިންޓުގެ ލީޑެއް ނަގައިފިއެވެ.
ރަށުން ބޭރުގައި ކުޅުނު މެޗުން ބަޔާން މޮޅުވީ 1-0 ގެ ނަތީޖާއަކުންނެވެ.
މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ދެ ޓީމުންވެސް ވަނީ ގޯލާ އަމާޒުކޮށް ގިނަ ހަމަލާތަކެއް ފޮނުވާލާފައެވެ. އެގޮތުން މެޗުގެ ކުރީކޮޅު އޭރިއާ ތެރެއިން ހާތާ ބާލިންގެ ޑޯޑީ ލޫކެބާކިއޯއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ބަޔާނުގެ ގޯލްކީޕަރު މެނުއެލް ނޯޔާ ވަނީ ހުށިޔާރުކަމާއެކު ދިފާއުކޮށްފައެވެ.
އަދި މެޗުގެ 12 ވަނަ މިނެޓުގައި ބަޔާނަށް ލީޑު ނެގުމަށް ޕެނަލްޓީއެއް ލިބުނު ނަމަވެސް، އެ ޓީމުގެ އިތުބާރު ފޯވާޑް ރޮބަޓް ލެވަންޑޯސްކީ ފޮނުވާލި ޕެނަލްޓީ ހާތާ ބާލިންގެ ގޯލްކީޕަރު ރޫނެ ޔާސްޓެއިން ވަނީ ދިފާއުކޮށްފައެވެ. މިއީ އޭރިއާ ތެރެއިން ބަޔާނުގެ ލެރޯއި ސާނޭއަށް ހާތާ ބާލިންގެ ގޯލްކީޕަރު ކުރި ފައުލަކަށް ރެފުރީ ދިން ޕެނަލްޓީއެކެވެ.
އެކަމަކު މެޗުގެ 21 ވަނަ މިނެޓުގައި ބަޔާނުން ވަނީ މެޗުގައި ލީޑު ނަގާފައެވެ. އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ކިންގްސްލީ ކޯމަނެވެ. އޭގެ ފަހުން މެޗުގެ ދެވަނަ ހާފުގައި ހާތާ ބާލިނުން ރަނގަޅު ކުޅުމެއް ދެއްކިއިރު، މެޗު ނިމެން ދެ މިނެޓަށް ވެފައި ވަނިކޮށް އެ ޓީމުގެ މަތެއުސް ކުންޔާއަށް ވަނީ ނަތީޖާ އެއްވަރުކުރަން ހުސް ފުރުސަތެއް ލިބި ބޭކާރުވެފައެވެ.
މި މޮޅާއެކު ތާވަލުގެ އެއްވަނައިގައި ބަޔާނުން 10 ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުނު 20 މެޗުން 48 ޕޮއިންޓް ލިބިފައެވެ. އަދި ދެވަނައިގައި އޮތް އާރްބީ ލެއިޕްޒީގަށް 19 މެޗުން 38 ޕޮއިންޓް ލިބިފައިވާއިރު، ހުކުރު ދުވަހުގެރޭ ބަޔާން އަތުން ބަލިވި ހާތާ ބާލިން އޮތީ ތާވަލުގެ 15 ވަނައިގައި 20 މެޗުން 17 ޕޮއިންޓާއެކުއެވެ.
