ޗައިނާއިން އެމެރިކާގެ ސިއްޙަތާބެހޭ ވުޒާރާގެ ޑާޓާތައް ބެލިކަމުގެ ތުހުމަތުކޮށްފި
5 ފެބުރުއަރީ 2021 | ހުކުރު 10:24ޗައިނާގެ ކޮމިއުނިސްޓް ޕާޓީން އެމެރިކާގެ ސިއްޙަތާބެހޭ ވުޒާރާގެ ޑާޓާތައް ބެލުމަށް ހަތަރު އަހަރުވަންދެން މަސައްކަތް ކޮށްފައިވޭ
ޗައިނާގެ ރައީސް ސީ ޖިން ޕިން
ޗައިނާއިން އެމެރިކާގެ ސިއްޙަތާ ބެހޭ ވުޒާރާގެ ޑާޓާތަކެއް ބެލިކަމުގެ ތުހުމަތު އެމެރިކާގެ އިންޓެލް އެޖެންސީއަކުން ކޮށްފިއެވެ.
އެމެރިކާގެ ނެޝަނަލް ކައުންޓަރ އިންޓެލިޖެންސް އެންޑް ސެކިއުރިޓީ ސެންޓަރުން ހާމަކޮށްފައިވާ ރިޕޯޓުގައި ބުނެފައިވަނީ ޗައިނާގެ ކޮމިއުނިސްޓް ޕާޓީގެ ވެރިން ހެކްކޮށް ޑީ.އެން.އޭ. ބަލާފައިވާ ކަމަށެވެ. އަދި މިކަން ކޮށްފައިވަނީ ކޮވިޑް-19 ގެ ޕެންޑަމިކްގެ ތެރޭގައި ކަމަށް ވެސް އެ ރިޕޯޓްގައި ބުނެފައިވެއެވެ.
މި ރިޕޯޓުގައި އިތުރަށް ބުނީ ޗައިނާގެ ކޮމިއުނިސްޓް ޕާޓީން އެމެރިކާގެ ސިއްޙަތާ ބެހޭ ވުޒާރާގެ ޑާޓާތައް ބެލުމަށް ހަތަރު އަހަރުވަންދެން މަސައްކަތް ކޮށްފައިވާ ކަމަށާއި، އެގޮތުން ސިއްހަތާބެހޭ ވުޒާރާގެ ޑާޓާތައް އެކި ގޮތްގޮތަށް ހެކް ކުރުމަށް މަސައްކަތް ކޮށްފައިވާ ކަމަށެވެ.
އެ ރިޕޯޓުގައި އިތުރަށް ބުނީ މިއީ އެމެރިކާގެ ގައުމީ ސަލާމަތަށް ހުރި ނުރައްކަލެއް ކަމަށާއި މި މައްސަލަ އިތުރަށް ތަހުގީގުކުރަން ފަށާފައިވާ ކަމަށެވެ. އަދި މި މައްސަލައިގެ ފުރިހަމަ ތަހުގީގީ ރިޕޯޓެއް ކުރިއަށް އޮތް ތިން މަސްދުވަހުގެ ތެރޭ ނެރޭނެ ކަމަށާއި، އަދި މިކަމުގެ އަޑީގައި ތިބި ކޮމިއުނިސްޓު ޕާޓީގެ ވެރިންގެ ނަން ހާމަކުރާނެ ކަމަށެވެ.
މީގެ ކުރިން ވެސް ޗައިނާއިން އެމެރިކާގެ އެކި ވުޒާރާތަކުގެ ޑާޓާ ބޭސް ހެކް ކުރިކަމުގެ ތުހުމަތު އެމެރިކާގެ އިންޓެލިޖެންސުން ކޮށްފައިވާއިރު، މިކަމާ ގުޅިގެން އެކި ކަހަލަ ފިޔަވަޅުތައް އެމެރިކާގެ ސަރުކާރުން ވަނީ ޗައިނާއާ ދެކޮޅަށް އަޅާފައެވެ. އެގޮތުން ވިޔަފާރީގެ ގޮތުން ޗައިނާގެ ބައެއް ޕްރޮޑެކްޓްތައް ބޭން ކޮށްފައި ވެސް ވެއެވެ.
