ފުރަތަމަ ފަހަރަށް ރާއްޖެއިން ފަލަސްޠީނަށް ސަފީރަކު ޢައްޔަން ކުރަން ނިންމާފައިވާކަން ހާމަކޮށްފިއެވެ. މިކަން ހާމަކުރައްވާފައިވަނީ މިއަހަރުގެ ރައްޔިތުންގެ މަޖިލީހުގެ ޖަލްސާތައް ފެށުމަށް ބޭއްވި ޖަލްސާގައި ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިޙް ދެއްވި ރިޔާސީ ބަޔާނުގެ ތެރެއިންނެވެ.

ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިޙް ވިދާޅުވީ، ރާއްޖޭގެ ޚާރިޖީ ގުޅުންތައް އިތުރަށް ވަރުގަދަކުރުމުގެ ގޮތުން، އިތުރު ޤައުމުތަކަށް "ނޮން-ރެސިޑެންޓް" ސަފީރުން ކަނޑައެޅުމަށް މަސައްކަތްކުރަމުންދާކަމަށެވެ. ރައީސް ވަނީ ފުރަތަމަ ފަހަރަށް ފަލަސްޠީނަށް "ނޮން - ރެސިޑެންޓް" ސަފީރެއް މި އަހަރުގެ ތެރޭގައި ޢައްޔަންކުރުމަށް ޤަޞްދުކުރާ ވާހަކަ ވެސް ހާމަކުރައްވާފައެވެ. މިއާއެކު ދެ ޤައުމުގެ ގުޅުން ބަދަހިވެ ރާއްޖެއިން ފަލަސްތީންގެ ހައްޤުގައި ކުރާ މަސައްކަތްތައް އިތުރުވެގެންދާނެއެވެ.

ދިވެހިރާއްޖެއަކީ ފަލަސްތީނުގެ މިނިވަންކަމަށް މެދުނުކެނޑި ވަކާލާތުކުރަމުންދާ ޤައުމެކެވެ. އެގޮތުން 1967 ވަނަ އަހަރު ކުރެހުނު ސަރަޙައްދީ އިމުގެ މައްޗަށް ބިނާވެގެންވާ ފަލަސްތީނުގެ މިނިވަން ދައުލަތެއް ޤާއިމްކުރެވި، އެ ދައުލަތުގެ ވެރިރަށަކީ އިރުމަތީ ޤުދުސްކަމުގައި ވާން ޖެހޭކަމަށާއި، އިޒްރޭލުން ފޭރުނު ބިންތަކަށް ފަލަސްތީނުގެ ރެފިއުޖީންނަށް އަނބުރާ އާދެވެން ޖެހޭކަމަށް ދިވެހިރާއްޖެއިން ދަނީ ވަކާލާތުކުރަމުންނެވެ. އެގޮތުން ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިޙް ވަނީ ފަލަސްޠީނަކީ މިނިވަން ދައުލަތެއްގެ ގޮތުގައި ބަލައިގަތުމަށް އެކި ފަހަރުމަތިން ބައިނަލްއަޤްވާމީ އެކި ޕްލެޓްފޯމްތަކުގައި ގޮވައިލާފައެވެ. ރައީސް ވަނީ އަމަންއަމާންކަމާއި، އިންސާފު ޤާއިމުކޮށް، މިނިވަން ދައުލަތެއް ހޯދުމަށް ކުރާ މަސައްކަތްތަކުގައި ދިވެހިރާއްޖޭގެ ރައްޔިތުން ފަލަސްތީނުގެ ރައްޔިތުންނާއި ފަލަސްތީނު ސަރުކާރާއެކު ދެމިތިބޭނެކަމަށް ބުނެފައެވެ.

ފަލަސްޠީނުގެ ރައްޔިތުންނަށް ތަޙައްމަލުކުރަންޖެހިފައިވާ ހިތްދަތިކަމާއި ދިރިއުޅެމުންދާ ދަތި އުނދަގޫ ޙާލަތު ބަދަލުކޮށް، ފަލަސްތީނަކީ މިނިވަން ދަޢުލަތެއްގެ ގޮތުގައި ބަލައިގަތުމަށް ރާއްޖެއިން އަބަދުވެސް ވަކާލާތުކުރާ ކުރުން ރައީސް ވަނީ އެކި ފަހަރުމަތިން ތަކުރާރުކުރައްވާފައެވެ. ރާއްޖެއިން ވަނީ ފަލަސްތީނުގެ މިނިވަން ދަޢުލަތުގެ ވެރި ރަށަކީ އިރުމަތީ ޤުދުސްކަމަށް ރާއްޖެއިން އަބަދުވެސް ވަކާލާތުކުރާ ކުރުން ތަކުރާރުކުރައްވާފައެވެ.

ރާއްޖެއިން ފަލަސްތީނަށް އަލަށް ސަފީރަކު ޢައްޔަންކުރަން މަސައްކަތްކުރަމުންދާއިރު، ފަލަސްތީނުން ރާއްޖެއަށް ކަނޑައަޅުއްވާފައި ހުންނަވާ ސަފީރެއްގެ ގޮތުގައި މިހާރު ހުންނެވީ ވަލީދު އަބޫ އަލީއެވެ.