"މުޖްތަމަޢު ބައިބައި ކުރުމަށް، އެއްވެސް ބަޔަކަށް މިފަސްގަނޑުގައި އެއްވެސް ފުރުޞަތެއް ނުދެވޭނެ"

މުޖްތަމަޢު ބައިބައިކުރުމަށް، އެއްވެސް ބަޔަކަށް މިފަސްގަނޑުގައި އެއްވެސް ފުރުޞަތެއް ނުދެވޭނެކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވެއްޖެއެވެ.

2021 ވަނަ އަހަރުގެ ރިޔާސީ ބަޔާން އިއްވަވައިދެއްވަމުން ރައީސް ޞާލިޙު ވިދާޅުވީ، ދިވެހިރާއްޖޭގެ ޤައުމިއްޔަތުގެ އެންމެ ވަރުގަދަ އަސާސަކީ އިސްލާމް ދީނުގެ ޞައްޙަ ޢަޤީދާ ކަމަށެވެ. އެގޮތުން ދިވެހިންގެ ހިތްތަކުގައި اللهގެ އެއްކައުވަންތަކަމުގެ ޢަޤީދާ އަށަގެންނެވުމަށާއި، އިސްލާމް ދީނުގެ ރިވެތި އުޞޫލުތައް ނެގެހެއްޓުމަށް މިދިޔަ އަހަރުގެ ތެރޭގައި ވެސް ސަރުކާރުން މުހިއްމު މަސައްކަތްތަކެއް ކޮށްފައިވާނެކަން ފާހަގަ ކުރައްވައި ރައީސް ވިދާޅުވީ، އޭގެ ތެރެއިން ވެސް އެންމެ މުހިންމު އެއް ކަމަކީ ހަރުކަށި ފިކުރުގެ އޮއިވަރުން ދިވެހި ރައްޔިތުން ސަލާމަތްކުރުމަށް ކުރެވުނު މުހިންމު މަސައްކަތްތައް ކަމަށެވެ.

ރައީސް ވިދާޅުވީ، އިސްލާމް ދީނުގެ މަތިވެރި އިޖްތިމާޢީ އުޞޫލަކީ، ކުޑަކުދިންނަށް އަޅައިލުމާއި، އެކަކު އަނެކަކަށް އެހީތެރިވެ އެކުވެރިކަމުގައި އުޅުން ކަމަށެވެ. އަދި މުޖްތަމަޢު ބައިބައިކުރުމަށް، އެއްވެސް ބަޔަކަށް މިފަސްގަނޑުގައި އެއްވެސް ފުރުޞަތެއް ނުދެވޭނެކަމަށް ރައީސް ޞާލިޙު ވިދާޅުވިއެވެ.

ދީނުގެ ނަމުގައި ހައްދުފަހަނައަޅާފައިވާ ހަރުކަށި ފިކުރު ފެތުރުމާއި، ދީނާ ޚިލާފު ޚިޔާލު ފާޅުކުރުމަކީ، ރާއްޖޭގެ ސަލާމަތާއި ރައްކާތެރިކަމަށް އޮތް ބޮޑު ގޮންޖެހުމެއްކަމާއި، އެކަން ރާއްޖޭގައި ފެތުރިފައިވާ މިންވަރު ސަރުކާރުން ޢާންމުކޮށް، އެކަމާ ދެކޮޅަށް ގިނަ މަސައްކަތްތަކެއް ކުރެވިފައިވާ ކަމަށް ރައީސް ޞާލިޙު ވަނީ މީގެ ކުރިން ވެސް ވިދާޅުވެފައެވެ.

ރައީސް އެހެން ވިދާޅުވެފައިވާއިރު، ހަރުކަށި ފިކުރު ފަތުރައި ޕްރޮމޯޓް ކުރުން ހުއްޓުވުމަށް މާފުށި ޖަލުގައި ޤާއިމު ކުރި "ސްޕެޝަލް މެނޭޖްމަންޓް ޔުނިޓް" ބުދަ ދުވަހު ވަނީ ހުޅުވާފައެވެ. އެގޮތުން ސްޕެޝަލް މެނޭޖްމަންޓް ޔުނިޓް ހުޅުވުމުން އެފަދަ ކުއްވެރިން އެތަނަށް ބަދަލުކުރެވި އެމީހުންނަށް ޚާއްޞަ ޕްރޮގްރާމްތައް ހިންގި އެމަސައްކަތް ފެށިގެން ދިއުމުން ޖުމްލަ ގޮތެއްގައި ޖަލުގައި ހަރުކަށި ފިކުރު ފެތުރުން ހުއްޓޭނެކަން ސަަރުކާރުން ފާހަގަ ކޮށްފައިވެއެވެ.