ކޮވިޑް-19 އުފެދުނު ގޮތުގެ ދެ ފުށް ފެންނާނެ ތަހުގީގެއް ހިންގަން ޗައިނާއިން ފުރުސަތު ދޭނެ ޖެހޭ – އެމެރިކާ
3 ފެބުރުއަރީ 2021 | ބުދަ 13:39ކޮވިޑް އެންމެ ފުރަތަމަ ފެނުނު ގައުމަކީ ޗައިނާ
އެމެރިކާގެ ސެކެޓްރީ އޮފް ސްޓޭޓް އެންޓޮނީ ބިލިންކެން | ރޮއިޓަރސް
ކޮވިޑް-19 ފުރަތަމަ ފެނުނު ގައުމުކަމަށްވާ ޗައިނާއިން ވައިރަސް އުފެދުނު ގޮތުގެ ދެ ފުށް ފެންނާނެ ތަހުގީގެއް ހިންގަން ފުރުސަތު ދޭނެ ޖެހޭނެކަމަށް އެމެރިކާގެ ސެކެޓްރީ އޮފް ސްޓޭޓް އެންޓޮނީ ބިލިންކެން ވިދާޅުވެއްޖެއެވެ.
މީގެ ކުރިން ޓްރަމްޕްގެ ވެރިކަމުގައި ސެކެޓްރީ އޮފް ސްޓޭޓްކަމުގެ މަގާމުގައި ހުންނެވި މައިކް ޕޮމްޕެއޯވެސް މި ކަމަށް ގޮވާލައްވާފައިވާއިރު ބިލިންކެން ވިދާޅުވީ ޗައިނާގެ ވޫހާން ސިޓީން އުފެދުނު ކޮވިޑް-19ގެ ފުރިހަމަ ތަހުގީގެއް ހިންގަން ޖެހޭ ކަމަށެވެ. އަދި ޗައިނާއިން ވައިރަސް އުފެދި ފެތުރުނުއިރު، އެގައުމުގެ އިހުމާލެއް މިކަމުގައިވާނަމަ ޗައިނާއަށް ފިޔަވަޅުއަޅަން ޖެހޭނެކަމަށްވެސް ބިލިންކެން ވިދާޅުވިއެވެ.
ބިލިންކެން ވިދާޅުވީ ކޮވިޑް އެންމެ ފުރަތަމަ ފެނުނު ގައުމަކީ ޗައިނާ ކަމަށާއި، އެކަމަކު މިއަދާއި ހަމައަށްވެސް ޗައިނާއިން ކަމާބެހޭ އިދާރާތަކަށް ދޮގު މައުލޫމާތުދީ އެކަށޭނެ ތަހުގީގެއް ހިންގުމުގެ ފުރުސަތު ދީފައިނުވާ ކަމަށެވެ. އަދި އެކަމުގެ ސަބަބުން ކޮވިޑް އުފެދުނު ގޮތް ދެނެގަތުމަށް މަސައްކަތް ކުރާ ދުނިޔޭގެ ސިއްހަތާއި ބެހޭ އިދާރާގެ ފަންނީ ތަޖުރިބާކާރުންނަށް ދަތިތަކަކާއި ކުރިމަތިލާން ޖެހިފައިވާކަމަށް ވިދާޅުވިއެވެ.
ޑަބްލިއުއެޗްއޯއިން ވަނީ މީގެ ކުރިން ކޮވިޑް އުފެދުނު ގޮތް ދެނެގަތުމަށް ޗައިނާއަށް ފަންނީ ތަޖުރިބާކާރުންގެ ޓީމެއް ފޮނުވާފައެވެ. ނަމަވެސް ޗައިނާއިން ފުރަތަމަވަނީ ޑަބްލިއުއެޗްއޯގެ ޓީމަށް އެގައުމަށް ނުވަދެވޭނެ ކަމަށް ބުނެފައެވެ. އެހެންނަމަވެސް ޗައިނާއިން ވަނީ ފަހުން ޑަބްލިއުއެޗްއޯގެ ޓީމަށް އެ ފުރުސަތު ދީފައެވެ.
