މާލެއިން ރަށަށް ދިރިއުޅުން ބަދަލުކުރަން ބޭނުންވާ ފަރާތްތަކުން ދަފުތަރުވުމުގެ ފުރުޞަތު ހުޅުވައިލައިފި
3 ފެބުރުއަރީ 2021 | ބުދަ 10:35މި ޕްރޮގްރާމްގައި ބައިވެރިވެވޭނީ އެކަމަށް ޚާއްޞަކޮށްފައިވާ ފޯމް މެދުވެރިކޮށް
މާލޭގައި ކޮވިޑްގެ ކޭސްތައް އަނެއްކާވެސް ވަނީ އިތުރުވާން ފަށައިފަ
އަތޮޅުތެރެއަށް ދިރިއުޅުން ބަދަލުކޮށް ވަޒަންވެރިވާން އަމިއްލައަށް އެދޭ ފަރާތްތަކަށް ހިންގާ ޕްރޮގްރާމްގައި ބައިވެރިވުމުގެ ފުރުޞަތު ހުޅުވައިލައިފިއެވެ.
މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ކުރި އިޢުލާނެއްގައި ވަނީ ބައިވެރިވެވޭނީ ޕްރޮގްރާމްގައި ބައިވެރިވުމަށް ޚާއްޞަކުރެވިފައިވާ "ހާލަތު ބަދަލުވުމުގެ ސަބަބުން އަތޮޅުތެރެއަށް ދިރިއުޅުން ބަދަލުކޮށް ވަޒަންވެރިވާން އަމިއްލައަށް އެދޭ ފަރާތްތަކުން އެހީތެރިކަމަށް އެދި ހުށަހަޅާ ފޯމު" ހުށަހަޅައިގެންކަމަށެވެ. މި ފޯމު އެ މިނިސްޓްރީގެ ކައުންޓަރުންނާއި މިނިސްޓްރީގެ ވެބްސައިޓް www.gender.gov.mv މެދުވެރިކޮށް ލިބެން ހުންނާނެއެވެ. ފޯމު ހުށަހަޅުއްވާނީ އެހީއަށް އެދޭ ފަރާތުން ވަޒަންވެރިވާން ބޭނުންވާ ރަށުގެ ކައުންސިލްގެ އިދާރާއަށެވެ.
ސަރުކާރުން ވަނީ، ހާލަތު ބަދަލުވުމުގެ ސަބަބުން އަތޮޅުތެރެއަށް ދިރިއުޅުން ބަދަލުކޮށް ވަޒަންވެރިވާން އަމިއްލައަށް އެދޭ ފަރާތްތަކަށް ހިންގާ ޕްރޮގްރާމުގެ ދަށުން އެހީ ފޯރުކޮށްދިނުމުގައި ޢަމަލުކުރާނެގޮތުގެ ގަވާއިދު ވެސް ގެޒެޓްކޮށްފައެވެ.
ހާލަތު ބަދަލުވުމުގެ ސަބަބުން އަތޮޅުތެރެއަށް ދިރިއުޅުން ބަދަލުކޮށް ވަޒަންވެރިވާން އަމިއްލައަށް އެދޭ ފަރާތްތަކަށް ހިންގާ ޕްރޮގްރާމުގެ ދަށުން އެހީ ފޯރުކޮށްދިނުމުގައި ޢަމަލުކުރާނެ ގޮތުގެ ގަވާއިދު ގެޒެޓްކުރުމާއެކު، މި ޕްރޮގްރާމްގެ ދަށުން އެހީއަށް އެދޭ ފަރާތްތަކާއި އެހީ ފޯރުކޮށްދެވޭ ފަރާތްތަކުގެ ދަފުތަރެއް އެކުލަވާލައި ބަލަހައްޓަން ޖެހޭނެއެވެ.
މި ޕްރޮގްރާމުގެ ދަށުން ފޯމް ހުށަހަޅަން ޖެހޭނީ އެހީ ބޭނުންވާ މީހާއެވެ. އާއިލާއަކުން ހުށަހަޅާނަމަ ފޯމު ހުށަހަޅާނީ އާއިލާ ތަމުސީލުކުރާ ފަރާތުން އެކަންޏެވެ. އެހީއަށް އެދި ހުށަހަޅާ ފޯމާއެކު ހުށަހަޅަންޖެހޭ ހުރިހާ ލިޔެކިއުމެއް ފުރިހަމަވާ ދުވަހުން ފެށިގެން، ގިނަވެގެން 30 ދުވަހުގެ ތެރޭގައި އެހީއަށް އެދި ހުށަހަޅާ ފަރާތަށް އެހީ ލިބޭކަން ނުވަތަ ނޫންކަން ޖެންޑަރ މިނިސްޓްރީން އަންގަންވާނެކަމަށް ވަނީ ކަނޑައަޅާފައެވެ. އަދި ލިޔެކިޔުން ހަމަނުވެއްޖެ ނަމަ 30 ދުވަހުގެ ތެރޭގައި ލިޔެކިޔުންތައް ހަމަކޮށް އަލުން ހުށަހެޅުމަށް އެންގުމަށްފަހު ލިޔެކިޔުންތައް މި މުއްދަތުގައި ވެސް ހަމަކޮށް ހުށަނާޅައިފިނަމަ އެ ފޯމު ބާޠިލުވާނެއެވެ. އެހެންނަމަވެސް، ބާޠިލުކުރެވޭ ފޯމު އަލުންް ހުށަހެޅުމުގެ ފުރުޞަތު ލިބޭނެއެވެ.
މި ފުރުޞަތުގެ ދަށުން އެހީ ހޯދުމަށް ދަފުތަރުވާ މީހުންގެ ކިބައިގައި ހުންނަންޖެހޭ 7 ޝަރުޠެއް ޤަވައިދުގައި ވަނީ ބަޔާންކޮށްފައެވެ. އެގޮތުން އެހީއަށް އެދި ހުށަހަޅާ ފަރާތުގެ ބެލުމުގެ ދަށުގައި، މަދުވެގެން 18 އަހަރުން ދަށުގެ 1 ކުއްޖަކު ހުންނަން ޖެހޭނެއެވެ. އަދި އެހީއަށް އެދި ހުށަހަޅާ ފަރާތަކީ، ދިރިއުޅުން އެހެން ރަށަކަށް ދިގު މުއްދަތަކަށް ބަދަލުކުރުމަށް ބޭނުންވެ، އެކަން ކުރުމަށް ދަތިވެފައިވާ މީހަކަށް ވާންޖެހެއެވެ. މި ފުރުޞަތުގެ ދަށުން ރަށަށް ބަދަލުވާއިރު، ބަދަލުވާން ބޭނުންވާ ރަށުގައި ދިރިއުޅެވޭނެ އިންތިޒާމު ހަމަޖެހިފައިވުން، ނުވަތަ އެފަދަ އިންތިޒާމެއް ހަމަޖެއްސޭނެ ފަދަ ގޮތެއް ހުރުން ލާޒިމެވެ.
މި ފުރުޞަތު ހުޅުވައިލާފައިވަނީ ދިވެހި ރައްޔިތުންނަށް އެކަނި ކަމުގައިވާއިރު، މާލީ އެހީ ފޯރުކޮށްދެވޭ ފަރާތެއްނަމަ، ފަގީރުކަމުގެ ހާލަތު ދެނެގަތުމާބެހޭ ގޮތުން އެޖެންސީން ކަނޑައަޅައިފައިވާ ގަވާއިދުގައި ބަޔާންކޮށްފައިވާ މިންވަރަށްވުރެ މަދުން، މީލާދީ މަހެއްގެ މައްޗަށް އާމްދަނީ ލިބޭ، ދިރިއުޅުމުގެ ހާލަތު ދަށް ފަރާތެއް ކަމުގައި ވާންޖެހޭނެއެވެ. މި ޤަވައިދުގައި ވަނީ މި ފުރުޞަތުގެ ދަށުން މާލެއިން ދިރިއުޅުން ބަދަލުކުރަން އަމިއްލައަށް އެހީއަށް އެދެވޭނީ މަދުވެގެން 1 އަހަރު މާލޭގައި އުޅެފައިވާނަމަ ކަމަށް ވެސް ބުނެފައިވެއެވެ. މި ގަވާއިދުގައި މި ޝަރުޠުތައް ކަނޑައަޅާފައި އޮތްނަމަވެސް، ޖެންޑަރ މިނިސްޓްރީން ކަނޑައަޅާ ފަރާތްތަކަށް، މި ގަވާއިދުގައި ބަޔާންކޮށްފައިވާ އެހެން ޝަރުޠުތައް ފުރިހަމަވާނަމަ، އެހީ ހަމަޖައްސައިދިނުމަށް އެ މާއްދާ ހުރަހެއް ނާޅާނެކަމަށް ވަނީ ކަނޑައަޅާފައެވެ.
ހާލަތު ބަދަލުވުމުގެ ސަބަބުން އަތޮޅުތެރެއަށް ދިރިއުޅުން ބަދަލުކޮށް ވަޒަންވެރިވާން އަމިއްލައަށް އެދޭ ފަރާތްތަކަށް ހިންގާ ޕްރޮގްރާމުގެ ދަށުން މާލީ އެހީގެ ގޮތުގައި އެސްޓަބްލިޝްމަންޓް ސަޕޯޓް އެލަވަންސްގެ ގޮތުގައި އެހީ ހަމަޖެހުމަށްފަހު، 6 މަސްދުވަހަށް، ކޮންމެ މަހަކަށް އާއިލާއަކަށް ތިން ހާސް ރުފިޔާ ޖަމާކޮށްދޭނެއެވެ. މީގެ އިތުރުން ރީލޮކޭޓްވުމަށް ކުރަންޖެހޭ ދަތުރުފަތުރުގެ ޚަރަދު ހަމަޖައްސައިދިނުމަށް ފޯރުކޮށްދެވޭ މާލީ އެހީގެ ގޮތުގައި ވަޒަންވެރިވާން އެދޭ ރަށަށް ދަތުރުކުރުމުގެ އެއްކޮޅު ޓިކެޓަށް ހިނގާ ޚަރަދު ހަމަޖައްސައިދޭނެއެވެ.
އެހީއަށް އެދޭ ފަރާތުގެ މާލީ ހާލަތާއި، ދިރިއުޅުން ބަދަލުކުރަން އެދޭ މެންބަރުންގެ އަދަދާއި، ވަޒަންވެރިވާން އެދޭ ރަށަށް ރިޢާޔަތްކޮށް، ޚަރަދުގެ އިންސައްތައެއް އެހީގެ ގޮތުގައި ހަމަޖައްސައިދޭގޮތަށް ވަނީ ކަނޑައަޅާފައެވެ. އަދި ގޯތި ނުވަތަ އިމާރާތް މަރާމާތުކުރުމަށް ފޯރުކޮށްދޭ މާލީ އެހީއާއި، ގޭބީސީގައި ހިފައިގެންގުޅޭ ތަކެތި ހޯދުމަށް ފޯރުކޮށްދެވޭ މާލީ އެހީއާއި، ގޭބީސީގެ ފަރުނީޗަރު ހޯދުމަށް ފޯރުކޮށްދެވޭ މާލީ އެހީ ފޯރުކޮށްދޭނެއެވެ.
މީގެ އިތުރުން ދަފުތަރު ކުރެވޭ ފަރާތްތަކަށް ފޯރުކޮށްދޭ އިތުރު އެހީތެރިކަމެއްގެ ގޮތުގައި ތަޢުލީމާއި ތަމްރީނުގެ އެހީއާއި، އާމްދަނީ، އިޖުތިމާޢީ، ޞިއްޙީ ޚިދުމަތްތަކުގެ އެހީއާއި މިނޫނަސް އެހެނިހެން އެހީތެރިކަން ދައުލަތުގެ ކަމާ ގުޅުން ހުރި މުއައްސަސާތައް މެދުވެރިކޮށް ހޯދުމަށް އެހީތެރިވެދޭނެއެވެ. މި ގަވާއިދުގެ ދަށުން ފޯރުކޮށްދެވޭ މާލީ އެހީ ފޯރުކޮށްދެވޭނީ، އެހީއަށް އެދި ހުށަހަޅައިފައިވާ ފޯމުގައި ބަޔާންކޮށްފައިވާ ބޭންކް އެކައުންޓަށެވެ. މިގޮތުން އެހީ ލިބެންވާ ފަރާތަށް ފޯރުކޮށްދޭންޖެހޭ މާލީ އެހީއަކީ ކޮބައިކަން އެ ފަރާތަށް އަންގައި، އެހީ ފޯރުކޮށްދެވޭނެ ގޮތް ހަމަޖެހޭކަން އަންގާތާ ފަނަރަ ދުވަހުގެ ތެރޭގައި ބީ.އެމް.އެލް.އިން އެ ފަރާތުގެ ބޭންކް އެކައުންޓަށް ޖަމާކުރާނެއެވެ.
މި ޤަވައިދުގެ ދަށުން އެހީ ލިބޭ ފަރާތުގެ ހާލަތު މޮނިޓަރކުރުމުގެ މަސައްކަތް ކުރާނެއެވެ. އެގޮތުން ކޮންޓިނުއަސް މޮނިޓަރިންގްގެ ދަށުން އެހީ ލިބެމުންދާ ފަރާތްތަކުގެ ހާލަތު، އެހީ ލިބެން ފަށާތާ މަދުވެގެން އެއް އަހަރުދުވަސް ވަންދެން މޮނީޓަރ ކުރާނެއެވެ.
މި ގަވާއިދުގެ ދަށުން އެހީ ލިބެމުންދާ ފަރާތެއްގެ ހާލަތު ބަދަލުވެއްޖެ ނަމަ، ނުވަތަ އެ ފަރާތުގެ މަޢުލޫމާތެއް ބަދަލުވެއްޖެ ނަމަ، އެހީ ލިބެމުންދާ ފަރާތުން އެކަން "ހާލަތު ވަޒަންކުރާ ފޯމު" މެދުވެރިކޮށް ދިރިއުޅޭ ރަށުގެ ކައުންސިލްގެ އިދާރާއަށް ހުށަހަޅަންޖެހޭނެއެވެ.
އެހީ ލިބެމުންދާ ފަރާތުން ދޮގު މަޢުލޫމާތު ފޯރުކޮށްދީފައިވާނަމަ، އެކަން ފާހަގަވާ ހިސާބުން، އެ ފަރާތަށް ދެމުންގެންދާ އެހީ ފޯރުކޮށްދިނުން ހުއްޓާލައި، އިތުރަށް ދެވިފައިވާ ފައިސާ ހޯދުމަށްޓަކައި ފިޔަވަޅު އަޅާނެއެވެ.
