ރާއްޖޭގެ ހުރިހާ ރަށެއްގައި ކޮވިޑް-19 ވެކްސިން ޖަހަން ފަށަނީ!
ރާއްޖޭގައި ކޮވިޑް-19 ވެކްސިނޭޝަން ޕްރޮގްރާމް ފަށާފައި ވަނީ ފެބްރުއަރީ އެއް ވަނަ ދުވަހު
ރާއްޖޭގައި ކޮވިޑް-19 އަށް ވެކްސިން ދިނުމުގެ ތެރެއިން
ބުދަ ދުވަހުން ފެށިގެން ރާއްޖޭގެ ހުރިހާ ރަށެއްގައި ކޮވިޑް-19އަށް ވެކްސިން ޖަހަން ފަށާނެކަމަށް ހެލްތު އެމެޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
އަންގާރަ ދުވަހު އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްއީއޯސީގެ ޓެކްނިކަލް އެޑިވައިޒަރީ ގްރޫޕް އޮން އިމިއުނައިޒޭޝަންގެ ޑރ. އަހްމަދު ފައިސަލް ވިދާޅުވީ ރާއްޖޭގެ ހުރިހާ ރަށެއްގައި ކޮވިޑް-19އަށް ވެކްސިން ދެވެން ފެށޭނެ ކަމަށެވެ.
ރާއްޖޭގައި ކޮވިޑް-19އަށް ވެކްސިން ދިނުމުގެ ޕްރޮގްރާމް ހޯމަ ދުވަހު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ފައްޓަވާދެއްވާފައިވާއިރު، އެންމެ ފުރަތަމަ ވެކްސިން ޖަހާފައި ވަނީ އިންދިރާގާންދީ މެމޯރިއަލް ހޮސްޕިޓަލްގެ މެޑިކަލް އޮފިސަރެއް ކަމަށްވާ ޑރ. ޝިރާނީ އަބްދުއްރަޙްމާނެވެ. އަދި ދެވަނައަށް އައި.ޖީ.އެމް.އެޗް.ގެ ނަރުހަކަށް ވެކްސިން ދީފައިވާއިރު، ތިން ވަނައަށް ވެކްސިންޖަހާފައި ވަނީ ހަކުރު ބައްޔަށް ފަރުވާ ހޯދަމުންދާ ފަރާތެކެވެ.
ރާއްޖޭގެ ރައީސުލްޖުމްހޫރިއްޔާ ހަތަރު ވަނަ އަށް ވެކްސިން ޖެއްސެވިއިރު، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުުރުން އުއްތަމަ ފަނޑިޔާރު، މުޢުތަސިމް އަދްނާން ވަނީ ކޮވިޑް-19 ގެ ވެކްސިން ޖައްސަވާފައެވެ.
މީގެ އިތުރުން ހެލްތު މިނިސްޓަރ އަހްމަދު ނަސީމް އާއި ޑިފެންސް މިނިސްޓަރ މާރިއާ އަހްމަދުދީދީގެ އިތުރުން ފޮރިން މިނިސްޓަރ އަބްދުﷲ ޝާހިދު އަދި ޖެންޑަރ މިނިސްޓަރ އައިޝަތު މުހައްމަދު ދީދީ ވަނީ ވެކްސިން ޖައްސަވާފައެވެ. އަދި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ސަންޖޭ ސުދީރުވެސް ވަނީ ވެކްސިން ޖައްސަވާފައިއެވެ.
އެޗްއީއޯސީގެ އިސްފަރާތްތަކުންވެސް ވަނީ ހޯމަ ދުވަހު ކޮވިޑް ވެކްސިންގެ ފުރަތަމަ ޑޯޒް ޖައްސަވާފައެވެ.
މާލޭގައި ފެށިގެން ދިޔަ ވެކްސިނޭޝަން ޕްރޮގްރާމްގައި ހައިރިސްކު ކެޓަގަރީގެ ފަރާތްތަކުގެ އިތުރުން ތެލެސީމިއާއަށް ފަރުވާ ހޯދާ ފަރާތްތަކާއި ފްރަންޓްލައިންގައި މަސައްކަތްކުރާ ފަރާތްތަކުން ވަނީ ވެކްސިންޖަހާފައެވެ. އޭގެތެރޭގައި ދިވެހި ސިފައިންނާއި ފުލުހުންގެ އިތުރުން ވެމްކޯގެ މުވައްޒަފުންނާއި އެއަރޕޯޓް އަދި ޓްރާންސްޕޯޓްގައި މަސައްކަތްކުރާ ފަރާތްތައް ހިމެނެއެވެ.
ފެބްރުއަރީ މަހުގެ އެއް ވަނަ ދުވަހު މާލެ ސިޓީގެ އިތުރުން އައްޑޫ ސިޓީ އަދި ކުޅުދުއްފުށި ސިޓީގައި ވަނީ ވެކްސިނޭޝަން ޕްރޮގްރާމް ފަށާފައިއެވެ.
އައްޑޫ ސިޓީގައި ވެކްސިންދިނުމުގެ ކަންތައްތައް ފެށުމުގެ ގޮތުން، އެސިޓީން އެންމެ ފުރަތަމަ ވެކްސިން ޖަހާފައި ވަނީ އައްޑޫ ސިޓީ ހޮސްޕިޓަލްގެ އެކްޓިން މެޑިކަލް ޑިރެކްޓަރ ޑރ. އަބްދުﷲ އަދްސަރުއެވެ. ކުޅުދުއްފުށި ސިޓީގައި އެންމެ ފުރަތަމަ ވެކްސިން ޖަހާފައި ވަނީ އެސިޓީގެ ހެލްތު ސަރވިސަސް މެނޭޖަރ، އަހްމަދު ދާވޫދުއެވެ.
މި ދެސިޓީގައި ވެކްސިން ޖެހުމުގެ މަސައްކަތް ފެށުމުގެ ގޮތުން ސިއްހީ ދާއިރާގައި މަސައްކަތްކުރާ 30 މީހުން ވަނީ ވެކްސިން ޖަހާފައެވެ. އޭގެތެރޭގައި ދިވެހިންގެ އިތުރުން ބިދޭސީންވެސް ހިމެނެއެވެ.
ވެކްސިނޭޝަން ޕްރޮގްރާމް ފައްޓަވާދެއްވާ ވާހަކަދައްކަވަމުން ރައީސް ސޯލިހް ވަނީ އަމާޒަކީ ކުރިއަށް އޮތް ހަވަރަަކަށް މަސް ދުވަހުގެ ތެރޭގައި، ރާއްޖޭގައި ދިރިއުޅޭ ހުރިހާ ރައްޔިތުންނަށް ވެކްސިން ދިނުން ކަމަށް ވިދާޅުވެފައެވެ. މިކަމުގައި ހުރިހާ ރައްޔިތުންގެ އެއްބާރުލުން ބޭނުންވާ ކަމަށާއި ވެކްސިންދިނުމުގެ ކަންކަން މެދުކަނޑާނުލައި ކުރިއަށް ގެންދެވޭނެ ކަމަށް ރައީސް ވިދާޅުވިއެވެ.
ރައީސް ސޯލިހް ވަނީ މާގިނަ ދުވަސްތަކެއް ނުވެ މިކަމުން އަރައިގަނެވޭނެ ކަމަށް ވިދާޅުވެފައެވެ.
ކޮވިޑް-19 އަށް ވެކްސިންދިނުމުގެ ޕްރޮގްރާމް ރާއްޖޭގައި ފަށާފައިވާއިރު، ރާއްޖޭގައި އެމެޖެންސީކޮށް ބޭނުންކުރުމުގެ ހުއްދަ ދީފައިވާ ކޮވިޝީލްޑް ވެކްސިނާ މެދު އިތުބާރު އެބައޮތް ކަމަށް ރައީސް ވަނީ ވިދާޅުވެފައެވެ.
އިންޑިއާއިން ވަނީ މި ވެކްސިންގެ އެއް ލައްކަ ޑޯޒް ރާއްޖެއަށް ފޯރުކޮށްދީފައެވެ.
