ފާއިތުވެދިޔަ 24 ގަޑިއިރު ތެރޭގައި ރާއްޖެއިން 215 މީހުން ކޮވިޑަށް ޕޮޒިޓިވްވެފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން ނެރުނު އެންމެ ފަހުގެ ތަފާސް ހިސާބުތައް ދައްކާ ގޮތުން އާދީއްތަ ދުވަހުގެ ހަވީރު 06:00 އިން ފެށިގެން ހޯމަ ދުވަހުގެ ހަވީރު 06:00 އާއި ހަމައަށް ރާއްޖެއިން 4،126 މީހުން ކޮވިޑަށް ޓެސްޓު ކޮށްފައިވާއިރު، އޭގެ ތެރެއިން 215 މީހުން ވަނީ ބައްޔަށް ޕޮޒިޓިވްވެފައެވެ.

އެޗްޕީއޭގެ ތަފާސް ހިސާބުތައް ދައްކާ ގޮތުން ބައްޔަށް ޕޮޒިޓިވްވި މީހުންގެ ތެރެއިން 159 މީހުން ޕޮޒިޓިވްވެފައި ވަނީ މާލެ ސަރަހައްދުންނެވެ. އަތޮޅު ތެރެއިން 8 މީހަކު ޕޮޒިޓިވްވެފައިވާއިރު، ރިސޯޓުތަކުން 20 މީހުން ވަނީ ޕޮޒިޓިވްވެފައެވެ. އަދި ހަދަމުން އަންނަ ރިސޯޓުތަކުން 27 މީހަކު ޕޮޒިޓިވްވެފައިވާކަމަށްވެސް އެޗްޕީއޭގެ ތަފާސް ހިސާބުތަކުން ދައްކައެވެ.

ހޯމަ ދުވަހު އިތުރު 215 މީހުން ކޮވިޑަށް ޕޮޒިޓިވްވެ، ރާއްޖެއިން މިހާތަނަށް ޕޮޒިޓިވްވި މީހުންގެ އަދަދު މިވަނީ 16،056ށް އަރައިފައެވެ. އެއާއިއެކު އެކްޓިވް ކޭސްތަކުގެ އަދަދު 1،807ށް އަރާފައިވާއިރު، ހޮސްޕިޓަލުގައި އެޑްމިޓްކޮށްގެން 184 މީހަކަށް އަންނަނީ ފަރުވާ ދެމުންނެވެ. ރާއްޖެއިން މިހާތަނަށް 52 މީހަކު މިބަލީގައި ނިޔާވެފައިވާއިރު، 14،190 މީހުން ވަނީ ބަލިން ފަސޭހަވެފައެވެ.

ރާއްޖެއިން ކޮވިޑްގެ ކޭސްތައް އިތުރުވެފައިވާ މި ދަނޑިވަޅު ވެކްސިން ދިނުމުގެ ޕްރޮގްރާމް ސަރުކާރުން ވަނީ ފަށާފައެވެ. އެގޮތުން ހޯމަ ދުވަހު ވެކްސިން ދިނުމުގެ ޕްރޮގްރާމް ސަރުކާރުން ފަށާފައިވާއިރު، މާލޭ ސިޓީގެ އިތުރުން ކުޅުދުއްފުށި ސިޓީގައިވެސް ވަނީ ވެކްސިން ދިނުމުގެ ޕްރޮގްރާމް ފަށާފައެވެ.

ކޭސްތައް ވަރަށް މަދުވެފައި އޮތުމަށްފަހު މިއަހަރުގެ ޖެނުއަރީމަހުގެ މެދެއްހާ ހިސާބުން ކޭސްތައް އިތުރުވާން ފެށިއެވެ. އަދި ޖެނުއަރީމަހުގެ 24 ވަނަ ދުވަހުން ފެށިގެން 100ށް ވުރެ މަތިން ކޭސްތައް ދަނީ ރިޕޯޓުކުރެވެމުންނެވެ. އެހެންކަމުން ދީފައިވާ ލުއިތަކަށް ބަދަލު ގެނެސް ބައެއް ފިޔަވަޅުތައް މިހާރު ވަނީ ހަރުކަށި ކޮށްފައެވެ.