ކަޅު ބިއްލޫރި ޖަހާފައިވާ ޓެކްސީތަކުގެ ބިއްލޫރި ބަދަލުކުރަން އަންގައިފި
31 ޖެނުއަރީ 2021 | އާދީއްތަ 04:0131 ޖަނަވަރީ 2021 އިން ފެށިގެން 06 މަސް ދުވަހުގެ ތެރޭގައި އެތެރެ ފެންނަ ސާފު ބިއްލޫރިއަށް ބަދަލުކުރަން ޖެހޭ
ޓެކްސީއެއް
ކަޅު ބިއްލޫރި ޖަހާފައިވާ ޓެކްސީތަކުގެ ބިއްލޫރި، ޓެކްސީ ޤަވާއިދާ އެއްގޮތަށް ބަދަލުކުރުމަށް ޓްރާންސްޕޯޓް މިނިސްޓްރީން އަންގައިފިއެވެ.
ޓްރާންސްޕޯޓް މިނިސްޓްރީން ނެރުނު ބަޔާނެއްގައި ބުނެފައިވަނީ 31 ޖަނަވަރީ 2021 އިން ފެށިގެން 06 މަސް ދުވަހުގެ ތެރޭގައި ޓެކްސީކުރާ އުޅަނދުތަކުގެ 4 ދޮރުފަތާއި ވިންޑްސްކްރީނުގެ ބިއްލޫރި އެތެރެ ފެންނަ ސާފު ބިއްލޫރިއަށް ބަދަލު ކުރުމަށް އަންގާ ކަމަށެވެ.
ޓެކްސީގެ ޚިދުމަތްދޭ އުޅަނދުތަކުގެ ދޮރުތަކުގައި ހުންނަން ޖެހެނީ އެތެރެ ފެންނަ ސާފު ބިއްލޫރިއެވެ. އެގޮތުން ޓެކްސީ ޤަވާއިދުގެ 11 ވަނަ މާއްދާގައި ބަޔާންކޮށްފައިވާ ގޮތުގައި ޓެކްސީކުރާ އުޅަނދުގެ ބިއްލޫރި ހުންނަންވާނީ މަގެއްގެ އަރިމަތީގައި ހުންނަ މީހަކު އާދައިގެ ގޮތަކަށް އެ އުޅަނދަށް ބަލާއިރު، އެ އުޅަނދުން ދަތުރު ކުރާ ފަސިންޖަރުން ފެންނަ ގޮތަށެވެ. އެހެންކަމުން ޓެކްސީތަކުގައި ކަޅު ބިއްލޫރި ޖަހައިގެން ދުއްވުމަކީ މަނާ ކަމެއް ކަމަށް ޓްރާންސްޕޯޓް މިނިސްޓްރީން ވަނީ ބުނެފައެވެ.
ޓެކްސީތަކުގައި ކަޅު ބިއްލޫރިޖެހުން މަނާކޮށްފައިވަނީ އެ ޚިދުމަތް ހޯދާ ފަރާތްތަކުގެ ރައްކާތެރި ކަމަށްޓަކައެވެ. ޓެކްސީތަކުގެ ކަޅު ބިއްލޫރި ބަދަލު ކުރުމަށް ޓްރާންސްޕޯޓް މިނިސްޓްރީން އަންގާފައިވާއިރު ޓެކްސީ ޑްރައިވަރުންނަށް ހިންގާ ތަމުރީނު ޕްރޮގްރާމްގެ މިއަހަރުގެ ފުރަތަމަ ބުރު ވަނީ ފަށާފައެވެ.
ފުލުހުން ބުނެފައިވަނީ މި ޕްރޮޮގްރާމަކީ، ޓެކްސީގެ ޚިދުމަތަށް އަލަށް ނުކުންނަ މީހުންނާއި މި ޚިދުމަތުގައި ތިބި މީހުންނަށް އިތުރަށް އަހުލުވެރިކުރުވުމަށް ހިންގާ ތަމްރީނު ޕްރޮގްރާމެއް ކަމަށެވެ.
މި ޕްރޮގްރާމުގައި، ޓެކްސީގެ ޚިދުމަތާ އަލަށް ގުޅޭ 200 މީހަކާއި މި ޚިދުމަތުގައި މިވަގުތު ތިބި މީހުންގެ ތެރެއިން 169 މީހަކު ބައިވެރިވެފައިވެއެވެ. ޓެކްސީ ޑްރައިވަރުންގެ ތަމްރީނު ޕްރޮގްރާމުގެ ހަތަރު ބުރެއް ކޮންމެ އަހަރަކު ވެސް ކުރިއަށް ގެންދެވެއެވެ. މިތަމުރީނަކީ ޓެކްސީ ޑްރައިވަރުން ޓެކްސީކުރުމުގެ ލައިސަންސަށް އެދޭއިރު ފުރިހަމަ ކުރުމަށް ގަވާއިދުގައި ކަނޑައަޅާފައިވާ ތަމުރީނެކެވެ.
