ފާއިތުވި އަހަރުގެފަހު ކުއާޓަރ ނިމުނުއިރު ރާއްޖޭގެ ހޯލްސޭލް އަދި ރީޓެއިލް ވިޔަފާރި ވަނީ އިތުރަށް ކުރިއަރަން ފަށާފައި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އެމްއެމްއޭއިން ނެރެފައިވާ 2020 ވަނަ އަހަރުގެ ފަހު ކުއާޓަރގެ ކުއާޓަރލީ ބިޒްނަސް ރިޕޯޓްގައިވާ ގޮތުން ހޯލްސޭލް އަދި ރީޓެއިލް ވިޔަފާރީގެ ސޭލްސް އިންޑެކްސް ވަނީ ހަތަރު ޕޮއިންޓް އިތުރުވެފައެވެ. އެގޮތުން ތިން ވަނަ ކުއާޓަރގައި ސޭލްސް އިންޑެކްސް ޕޮއިންޓް 61 ގައި ހުރިއިރު، ހަތަރު ވަނަ ކުއާޓަރ ނިމުނުއިރު އެ ނަންބަރު ވަނީ 65ކަށް މައްޗަށް ޖެހިލާފައެވެ.
މި ރިޕޯޓްގައިވާ ގޮތުން ސަޕްލަޔަރުން އޯޑަރު ކުރާވަރު އިތުރުވެ މި އިންޑެކްސް ވަނީ ތިންވަނަ ކުއާޓަރގެ 43 ޕޮއިންޓުން 10 ޕޮއިންޓު އިތުރުވެ 53 ޕޮއިންޓަށް ޖެހިލާފައެވެ.
އެމްއެމްއޭގެ ރިޕޯޓްގައިވާ ގޮތުން ހޯލްސޭލް އަދި ރީޓެއިލް ވިޔަފާރިތަކުގެ ވަޒީފާގެ އިންޑެކްސް ތިން ކުއާޓަރގައި މައިނަހުގައި އޮތުމަށް ފަހު، ހަތަރު ވަނަ ކުއާޓަރ ނިމުނުއިރު ވަނީ 26 ޕޮއިންޓަށް އިތުރުވެފައެވެ. އަދި މުވައްޒަފުންގެ މުސާރައިގެ އިންޑެކްސް ވަނީ ހަ ޕޮއިންޓަށް އިތުރުވެފައެވެ.
ފާއިތުވި އަހަރުގެ ފަހު ކުއާޓަރގައި ތަކެތީގެ އަގު އިތުރަށް އުފުލުނު ކަމަށާއި ކޯސްޓް އޮފް ސޭލްސް އިންޑެކްސް 52 ޕޮއިންޓަށް އިތުރުވެފައިވާ ކަމަށް އެމްއެމްއޭއިން ބުނެއެވެ. އެގޮތުން އެމްއެމްއޭގެ ސާރވޭގައި ބައިވެރިވި 60 އިންސައްތަ ވިޔަފާރިތަކުން ވަނީ ތަކެތީގެ އަގު އުފުލިގެންދާކަން ފާހަގަކޮށްފައިކަމަށް އެމްއެމްއޭއިން ބުނެއެވެ. އެމްއެމްއޭއިން ބުނީ އިންޑެކްސް ފޮރ އެވްރެޖް ސެލިން ޕްރައިސަސް 17 ޕޮއިންޓަށް އިތުރުވެފައިވާ ކަމަށެވެ.
އެމްއެމްއޭއިން ވަނީ 2020 ވަނަ އަހަރުގެ ފަހު ކުއާޓަރގައި ހޯލްސޭލް އަދި ރީޓެއިލް ވިޔަފާރި އިތުރުވެ އެސިނާއަތުގެ މަސައްކަތްތައް އޯވަރޯލްކޮށް ކުރިއަރަން ފަށާފައިވާ ކަމަށެވެ. އަދި 2021 ވަނަ އަހަރުގެ ފުރަތަމަ ކުއާޓަރގައި މި ސިނާއަތް އިތުރަށް ކުރިއަރާނެ ކަމަށް ދެކެވޭ ކަމަށެވެ.
