ރިޝްވަތުގެ ބޮޑެތި ކުށްތަކެއް ސާބިތުވެފައިވާ ލައި ޒިއާއޮމިންގެ މައްޗަށް އިއްވާފައިވާ މަރުގެ ޙުކުމް ޗައިނާއިން ތަންފީޒުކޮށްފިއެވެ.

ޗައިނާއިން މި ޙުކުމް ތަންފީޒު ކޮށްފައިވަނީ ހުކުރު ދުވަހުގެ ވަގުތެއްގައެވެ.

ލައިއަކީ ޗައިނާގެ ސަރުކާރުގެ ކޮންޓްރޯލް އޮންނަ އެސެޓް މެނޭޖްމަންޓް ފާރމްތަކުގެ ތެރެއިން އެންމެ ބޮޑު ފާރމްކަމަށްވާ "ހުއަރޮންގ" ގެ ޗެއަރމަންކަން ކުރައްވައި، އެ މަޤާމުގައި ހުންނެވިއިރު، ބޮޑެތި އަދަދުތަކުން ރިޝްވަތު ނެންގެވިކަން ސާބިތުވެފައިވާ މީހެކެވެ. އެގޮތުން އޭނާ ރިޝްވަތުގެ ގޮތުގައި އެކި ބޭނުންތަކަށް ނަގާފައިވާ ފައިސާގެ އަދަދު 260 މިލިއަން އެމެރިކާ ޑޮލަރަށް އަރާނެ ކަމަށް ޗައިނާގެ ނޫސްތަކުން ރިޕޯޓް ކޮށްފައިވެއެވެ. އޭގެ ތެރޭގައިވެސް ކޮރަޕްޝަނާއި ރިޝްވަތުގެ ސީރިއަސް ބޮޑެތި މައްސަލަތަކެއް ހިމެނެއެވެ.

ލައިގެ މައްޗަށް ޓިއާންޖިންގެ ކޯޓަކުން މިމަހުގެ ކުރީކޮޅު ކޮށްފައިވާ މަރުގެ ޙުކުމް ތަންފީޒު ކޮށްފައިވާއިރު، އޭނާ މަރާލުމުގެ ކުރިން އާއިލާގެ އެންމެ ގާތް މެމްބަރުންނާ ބައްދަލު ކުރުމަށް ވަނީ ފުރުސަތެއް ދީފައެވެ.

ކޮރަޕްޝަނާއި ރިޝްވަތުގެ އިތުރުން، ލައިގެ މައްޗަށް ވަނީ މީހަކާއި ކައިވެނި ކޮށްގެން ހުރެ އެހެން މީހަކާއެކު ކައިވެނީގެ ގުޅުން ބާއްވައި (ބައިގަމީ)، އެ ގުޅުމުގެ މައްޗަށް ދަރިން ހޯދާފައިވާކަމުގެ ކުށްވެސް ސާބިތުވެފައެވެ.

ޗައިނާއިން ކޮންމެ އަހަރަކުވެސް އެތައް ބަޔަކަށް މަރުގެ ޙުކުމް އިއްވައެވެ. އެހެންނަމަވެސް، އެ ޤައުމުން މަރުގެ ޙުކުމް އިއްވައި، އެ ޙުކުމް ތަންފީޒު ކުރާ އަދަދަކީ ދައުލަތުން ސިއްރު ކޮށްފައި އޮންނަ ކަމެއް ކަމަށް "ޗެނަލް ނިއުސް އޭޝިއާ" ގައި ރިޕޯޓް ކޮށްފައިވެއެވެ.

އެމްނެސްޓީ އިންޓަރނޭޝަނަލުން ލަފާ ކުރާ ގޮތުގައި ޗައިނާއަކީ މުޅި ދުނިޔެއިންވެސް އެންމެ ގިނަ މީހުންނަށް މަރުގެ ޙުކުމް ތަންފީޒު ކުރާ ޤައުމެވެ. އެގޮތުން ކޮންމެ އަހަރަކުވެސް އެތައް ހާސް ބަޔަކަށް މަރުގެ ޙުކުމް އިއްވައި، ތަންފީޒު ކުރަމުން ގެންދާކަމަށް އެމްނެސްޓީން އަންދާޒާ ކޮށްފައިވެއެވެ.