ރިޝްވަތުގެ ތުހުމަތުގައި ސްރީ ލަންކާގެ ރައީސް މައިތިރިޕާލާ ސިރިސޭނާގެ ޗީފް އޮފް ސްޓާފް ޑރ. އައިއެޗްކޭ މަހާނަމާ ހައްޔަރުކޮށްފިއެވެ.
މާހަނަމާއެކު ސްރީ ލަންކާ ސަރުކާރުން ހިންގަމުންދާ ޓިމްބަރ ކޯޕަރޭޝަންގެ އިސްވެރިޔާ ދިސިނަޔަކާ ވެސް ވަނީ މި މައްސަލައިގައި ހައްޔަރުކޮށްފައެވެ. ލަންކާގެ ބްރައިބަރީ ކޮމިޝަނުން ބުނެފައިވާ ގޮތުގައި މަހާނަމާ ވަނީ ރިޝްވަތުގެ ގޮތުގައި 20 މިލިއަން ރުޕީސް ދިނުމަށް އިންޑިއާގެ އިންވެސްޓަރެއްގެ ކިބައިން އެދިފައެވެ. މަހާނަމާ ހައްޔަރުކުރެވުނުކަން ސިރިސޭނާއަށް ވަނީ އަންގާފައެވެ.
މި އިންވެސްޓަރު މަސައްކަތްކުރަމުންދިޔައީ ލަންކާގެ އީސްޓާން ޕްރޮވިންސަށް ނިސްބަތްވާ ކަންޓަލައިގައި ހުންނަ ސަރުކާރުގެ ހަކުރު އުފައްދާ ކާރުހާނާއެއް ގަތުމަށް ކަމަށާއި އެކަމަށް މަގުފަހި ކުރުމުގެ ގޮތުން މަހާނަމަ އަދި ޑިސިނަޔާކޭގެ އެހީތެރިކަން ހޯދުމަށް މަސައްކަތްކޮށްފައިވާ ކަމަށެވެ. މި އިންވެސްޓަރު އެކަމަށް އެދުނުއިރު މަހާނަމާ ހުންނެވީ ލަންކާގެ މިނިސްޓްރީ އޮފް ލޭންޑްސްގެ ސެކްރެޓަރީގެ ގޮތުގައެވެ. ސިރިސޭނާގެ ސަރުކާރުގެ އެންމެ ނުފޫޒުގަދަ އެއް މަގާމުގެ ގޮތުގައި ބެލެވޭ ޗީފް އޮފް ސްޓާފްގެ މަގާމަށް މަހާނަމާ އައްޔަނުކުރެވުނުތާ މާ ގިނަ ދުވަސްވެފައެއް ނުވެއެވެ.
ސިރިސޭނާގެ ކުރިން ލަންކާގެ ރައީސްކަން ކުރެވި މަހިންދަ ރާޖަޕަކްސާގެ ޗީފް އޮފް ސްޓާފް، ގަމިނީ ސެނަރަތަ ވެސް ވަނީ ދާދިފަހުން ކޮރަޕްޝަންގެ މައްސަލައެއްގައި ހައްޔަރުކޮށްފައެވެ. އޭނާ ހުންނެވީ ކަފާލާތުގެ ދަށުން މިވަގުތު ދޫކޮށްލާފައެވެ.
ރައީސްކަމުގެ ކެމްޕެއިން 2015 ވަނަ އަހަރު ސިރިސޭނާ ކުރައްވަމުންދިޔައިރު އެމަނިކުފާނު ވަނީ ސަރުކާރުގައި ހިމެނޭ ކޮރަޕްޓް އޮފިޝަލުންނާއި ދެކޮޅަށް ފިޔަވަޅު އަޅުއްވާނެ ކަމަށް ވައުދުވެ ވަޑައިގެންފައެވެ. ހަމައެހެންމެ ދާދިފަހުން އެމަނިކުފާނު ވަނީ ބޮޑުވަޒީރު ރަނިލް ވިކްރަމްސިންގްގެ ސަރުކާރަކީ ރާޖަޕަކްސާގެ ސަރުކާރަށްވުރެ ވެސް ކޮރަޕްޓް ސަރުކާރެއް ކަމަށް ވިދާޅުވެފައެވެ.
