ތޫފާން އޮކި: ލަކްޝަދްވީޕަށް ބޮޑެތި ގެއްލުންތަކެއް ދަނީ ލިބެމުން
2 ޑިސެމްބަރު 2017 | ހޮނިހިރު 04:20ހާލުގައި ޖެހޭ ފަރާތްތަކަށް އެހީވުމަށް ކަމާއި ބެހޭ ފަރާތްތައް ތިބީ ތައްޔާރީ ޙާލަތުގައި
ތޫފާން އޮކި: މި ތޫފާން މިހާރުވަނީ އިންޑިއާގެ ލަކްޝަދްވީޕް ޖަޒީރާތަކަށް އަރާފައި
އިންޑިއާ ކަނޑުގެ ސަރަހައްދުގައި އުފެދުނު ތޫފާން އޮކިގެ ސަބަބުން އިންޑިއާގެ ޖަޒީރާ ރަށްތަކެއްކަމަށްވާ ލަކްޝަދްވީޕަށް ބޮޑެތި ގެއްލުންތަކެއް ލިބެމުން އެބަދެއެވެ.
ނިމިދިޔަ ހަފްތާގެ ފަހުކޮޅު ސްރީލަންކާ އަދި ދިވެހިރާއްޖޭ ސަރަހައްދުގައި ހުރި ތޫފާން މިހާރުވަނީ ހުޅަނގު އުތުރަށް ދަތުރުކޮށް، ލަކްޝަދްވީޕްގެ ރަށްތަކަށް ފޯރާފައެވެ. ހުކުރު ދުވަހު ލަކްޝަދްވީޕްގެ އެންމެ ދެކުނުން އޮންނަ މަލިކަށް ތޫފާންވަނީ ފޯރާފައެވެ. މަލިކަށް ބޯކޮށް ވާރޭ ވެހި، ވައިގަދަވެ، ވަރަށް ބޮޑެތި ރާޅުތައް އަރާފައިވެއެވެ. އަދި މިތޫފާނުގައި މަލިކުގައި ބުރާސްފަތި ދުވަހު އެހެލި ދޯނި ފިޔަވައި އެހެން ހުރިހާ ދޯންޏަކަށް ގެއްލުންވެ، ބައެއް ދޯނިތައް ފެތިފައިވާކަމަށް މައުލޫމާތު ލިބެއެވެ. މަލިކުގެ ފަޅުތެރޭގައި އަޅާފައި އޮތް 5 ދޯންޏެއް އަޑިއަށް ދިޔަކަމަށް ޚަބަރު ލިބެއެވެ.
އިއްޔެ މަލިކަށް ތޫފާނުގެ ސަބަބުން ޖެހުނު ގަދަ ވައިގައި ބޮޑެތި ގަސްތަކާއި ރުއްތައް ވެއްޓިފައިވެއެވެ. އަދި ރަށުން ކަރަންޓު ކަނޑައިގެން ގޮސް، ގިނަ އަދަދެއްގެ ބަޔަކު ރަށުގެ އިޖްތިމާޢި މަރުކަޒެއްގެ ގޮތުގައި ބޭނުންކުރާ ޖުބިލީ ހޯލަށް ބަދަލުކުރަން ޖެހުނެވެ. ގަދަވައިގައި ގިނަ ގެއެއްގެ ފުރާޅު އެއްލާލާފައިވާއިރު، ގެއެއްގެ މައްޗަށް ރުކެއް ވެއްޓި، ގެ ހަލާކުވިއެވެ. އަދި މަގުތަކުގެ މައްޗަށް ވެއްޓިފައިވާ ރުއްތަކާއި ގަސްތައް ނެގުމަށް ގަދަވައިގެ ސަބަބުން ހުރަސް އެޅުނުކަމަށް ލަކްޝަދްވީޕް ފުލުހުން ވަނީ ބުނެފައެވެ.
ތުފާން އޮކި މިހާރުވަނީ ލަކްޝަދްވީޕްގެ ކަވަރައްޓި އަދި އަގައްޓި އަށް އަރާފައެވެ. މިރަށްތަކުގައި ތޫފާނުގެ ސަބަބުން ލިބޭ ގެއްލުންތައް ކުޑަކުރުމަށް ގިނަ މަސައްކަތްތަކެއް އިންޑިއާގެ ކަމާއި ބެހޭ ފަރާތްތަކުން ދަނީ ކުރަމުންނެވެ.
ލަކްޝަދްވީޕްގެ އިތުރުން އިންޑިއާގެ ކެރެލާ އަދި ޓެމިލް ނާޑޫ ސްޓޭޓަށްވެސް ތޫފާނުގެ ސަބަބުން ބޯކޮށް ވާރޭ ވެހެމުންދާއިރު، ވައި ގަދަވުމުގެ ސަބަބުން ބޮޑެތި ގެއްލުންތައް ދަނީ ލިބެމުންނެވެ.
