ވ. ކެޔޮދޫގައި ފުލުހުންގެ ހިދުމަތްފަށައި އެރަށުގައި ގާއިމްކުރި ޕޮލިސް ޕޯސްޓް ރަސްމީކޮށް ހުޅުވައިފިއެވެ.
މިކަމަށްޓަކައި ކެޔޮދޫގައި ބޭއްވި ރަސްމިއްޔާތު ޝަރަފްވެރިކޮށްދެއްވީ މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދުއެވެ.
މި ރަސްމިއްޔާތުގައި ޕޮލިސް ޕޯސްޓް ހުޅުއްވައި ދެއްވީ މިނިސްޓަރ އޮފް ހޯމް އެފެއަރޒް އިމްރާން ޢަބްދުﷲ އާއި ކޮމިޝަނަރ އޮފް ޕޮލިސް މުޙައްމަދު ހަމީދުއެވެ. ޕޮލިސް ޕޯސްޓް ހުޅުއްވައި ދެއްވުމަށްފަހު ޕޮލިސް ޕޯސްޓްގައި ދިވެހިރާއްޖޭގެ ދިދަ ނަންނަގަވައި ދެއްވީ މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދުއެވެ. ފުލުހުންގެ ދިދަ ނަންގަވައި ދެއްވީ ކޮމިޝަނަރ އޮފް ޕޮލިސް މުޙައްމަދު ހަމީދުއެވެ.
މި ރަސްމިއްޔާތުގައި މިނިސްޓަރ އޮފް ފޮރިން އެފެއަރޒް ދެއްކެވި ވާހަކަފުޅުގައި ފުލުހުން އެ ރަށުގައި މިފަށާ ހިދުމަތް ކާމިޔާބު ވެގެންދާނީ ރައްޔިތުން އެޚިދުމަތް ބަލައިގަތް މިންވަރަކުންކަމަށް ވިދާޅުވިއެވެ. އަދި ރައްޔިތުންނަށް ހިދުމަތެއް ދިނުމަށްޓަކައި ފެށި މި ހިދުމަތް ކާމިޔާބު ވެގެންދާނީ މިކަމުގައި އާންމު ރައްޔިތުން ބައިވެރިވާ ނިސްބަތުންކަން ފާހަގަކުރައްވައި، ފުލުހުންނާ މުޖުތަމައުއާ ގުޅިގެން މި ހިދުމަތް ދެވިގެންދާނީ ހިދުމަތް ބަލައިގަނެ ރަށުގައި މަސައްކަތްކުރާ ފުލުހުންނާ ގުޅިގެން މަސައްކަތް ކުރެއްވުމުން ކަމުގައި ވިދާޅުވިއެވެ.
ފުލުހުންނަކީ ދިމާވާ ކޮންމެދަތި ކަމެއްގައި ނުވަތަ ހާލަތެއްގައި އަމިއްލަ ނަފްސާއި ފުރާނައަށް ބެލުމެއް ނެތި ރައްޔިތުންގެ ހައްގުގައި ނުކުތުމަށް ހުވާކޮށްގެން ތިބެ އެކަން ސާބިތުކޮށްދީފައިވާ ބައެއް ކަމަށާއި ފުލުހުންނަށް އިހުތިރާމްކުރަން ޖެހެނީ އެހެންވެ ކަމަށް ވިދާޅުވިއެވެ. އެގޮތުން މިހާރު މިއޮތް ކޮވިޑްގެ ހާލަތުގައިވެސް ފުލުހުން އެންމެ އިންޗިއެއްވެސް ފަހަކަށް ނުޖެހޭކަމަށާއި ފުލުހުން ވެވަޑައިގެންނެވި ގުރުބާނީ އަބަދުވެސް ހަނދާން ކުރަންވާނެ ކަމަށް ވިދާޅުވިއެވެ.
މިރަސްމިއްޔާތުގައި ކޮމިޝަނަރ އޮފް ޕޮލިސް ދެއްކެވި ވާހަކަފުޅުގައި ފުލުހުންގެ ފަސް އަހަރުގެ ސްޓްރެޓީޖިކް ޕްލޭން އަމާޒުކުރެވިފައިވަނީ ފުލުހުން ދޭ ހިދުމަތް އަލުން ތަރުތީބުކޮށް، ޑިމޮކްރެޓިކް ވެއްޓަކަށް އެކަށޭނަ އަދި ތަރައްގީވެފައިވާ ފުލުހުންގެ ހިދުމަތްތަކެއް މުޅި ރާއްޖެއަށް ފޯރުކޮށްދޭ މުއައްސަސާއަކަށް ފުލުހުންގެ ހިދުމަތް ބަދަލުކުރުމަށްކަމަށް ވިދާޅުވިއެވެ. އަދި ލޯކަލް ޕޮލިސިންގ ފުލުހުންގެ ސްޓްރެޓީޖިކް ޕްލޭންގައި ހިމެނޭ ލަނޑުދަނޑިތަކުގެ ތެރޭގައި ކަނޑައަޅާފައިވަނީ އަތޮޅު ތެރޭގައި ދެވޭ ހިދުމަތަށް ވަރަށް ބޮޑެތި ބަދަލުތަކެއް ގެނައުމުގެ މަގުޞަދުގައި ކަމަށާއި ކެޔޮދޫގައި ހުޅުވިގެން ދިޔަ ޕޮލިސް ޕޯސްޓަކީ އެ އަމާޒަށް ވާސިލްވުމަށްޓަކައި ކުރިއަށް އެޅުނު ފިޔަވަޅެއްކަމަށް ވިދާޅުވިއެވެ.
ހަމައެއާއެކު ފުލުހުންގެ ހިދުމަތަށް ގެނެވޭ ބަދަލުތަކުގެ ތެރެއިން އިންގިލާބީ އެއް ބަދަލަކީ އަވަށްޓެރި ފުލުހުންގެ ހިދުމަތް ކަމަށާއި މިހިދުމަތް މާލެ، ވިލިމާލެ އަދި ހުޅުމާލޭގެ އިތުރުން އައްޑޫ ސިޓީއާއި ފުވައްމުލަކު ސިޓީއާއި ގއ. އަތޮޅު އަދި ގދ. އަތޮޅުގައި ފެށިފައިވާ ކަމަށް ވިދާޅުވިއެވެ. އަދި ހުޅުވިގެންދިޔަ މި ޕޯސްޓްގެ ސަބަބުން ކެޔޮދޫގައިވެސް އަވަށްޓެރި ފުލުހުންގެ މަސައްކަތް ފެށުމަށް އިތުރު ހިތްވަރަކަށް ވެގެންދާނެކަމަށް ވިދާޅުވިއެވެ.
ކެޔޮދޫގައި ޕޮލިސް ޕޯސްޓް ހުޅުވުމަށް ބޭއްވި ރަސްމިއްޔާތުގައި ރައްޔިތުންގެ މަޖިލީހުގެ ކެޔޮދޫ ދާއިރާގެ އިއްޒަތްތެރި މެމްބަރު ޙުސައިން ޤާސިމް އާއި ވ. އަތޮޅު ކައުންސިލްގެ ރައީސް އިބްރާހިމް ނިޔާޒް އާއި ކެޔޮދޫ ކައުންސިލްގެ ރައީސް އަޙްމަދު ޔޫސުފްއާއި ކައުންސިލްގެ މެމްބަރުންނާއި ފުލުހުންގެ އެގްޒެކެޓިވް އޮފިސަރުންނާއި ވ. އަތޮޅުގައި މަސައްކަތްކުރާ ފުލުހުން ބައިވެރިވެލެއްވިއެވެ.
