ރާއްޖެޓީވީން އުފައްދާ ރިއަލިޓީ ޝޯއާ ގުޅޭގޮތުން ބައެއް މީޑިއާތަކުން ފަތުރަމުންދާ ވާހަކަތަކަކީ އެމް.އެން.ޑީ.އެފް. އާއި ރާއްޖެޓީވީގެ ތަސައްވުރު ގޯސްކުރަން ދައްކާ ސިޔާސީ ވާހަކަތަކެއް: ރާއްޖެޓީވީ
28 ޖެނުއަރީ 2021 | ބުރާސްފަތި 08:16އެވާހަކަ ފަތުރާފައި ވަނީ ސިޔާސީ މަޤްޞަދެއްގައި
ސެލެބްރިޓީ ރޭސް ޝޯގެ ޝޫޓިންގެ ތެރެއިން
ރާއްޖެޓީވީގެ ރިއަލިޓީ ޝޯއެއް ތައްޔާރުކުރުމުގައި އެމް.އެން.ޑީ.އެފް. އިން ވެފައިވާ އެހީތެރިކަމާ ގުޅޭގޮތުން ހަގީގަތެއް ނެތް ގޮތަށް މީޑިއާތަކުން ފަތުރަމުންދާ ވާހަކަތަކަކީ ރާއްޖެޓީވީއާއި އެމް.އެން.ޑީ.އެފް. އާ މެދު ރައްޔިތުންގެ ހިތުގައި ނުބައި ތަޞައްވުރެއް އުފައްދަން ފަތުރާފއިވާ ދޮގު ޚަބަރުތަކެއް ކަމަށް ރާއްޖެޓީވީ އިން ބުނެފިއެވެ.
ރާއްޖެޓީވީގެ ޝޯއެއްގައި އެމް.އެން.ޑީ.އެފް. ގެ އުޅަނދުތައް ބޭނުންކޮށްފައިވާ ކަމަށް ބުނެ މީޑިއާތަކުން ފަތުރާފައިވާ ވާހަކައާ ގުޅިގެން ރާއްޖެޓީވީން ނެރުނު ބަޔާނެއްގައި ބުނީ އެ ޚަބަރަކީ ކަމުގެ ހަގީގަތް ނުހޯދާ އަދި ރާއްޖެޓީވީގެ ބަހެއް ވެސް ނެތި ފަތުރާފައިވާ ދޮގު ޚަބަރެއް ކަމަށެވެ.
އެމް.އެން.ޑީ.އެފް. އިން މީގެ ކުރިން ވެސް އެކި ޓީވީ ޗެނަލްތަކުގެ ޕްރޮގްރާމްތަކާއި އިޝްތިހާރުތަކާއި އަމިއްލަ ކުންފުނިތަކުގެ ބައެއް ހަރަކާތްތަކުގައި ވެސް ނުރައްކަލެއް އޮތް ކަމެއް ނަމަ އެހީތެރިކަން ފޯރުކޮށްދީފައިވާކަން ފާހަގަކޮށް ރާއްޖެޓީވީން ބުނީ އެއީ އަލަށް ރާއްޖޭގައި ކުރާ ކަމެއް ނޫން ކަމަށާއި ވަކި އުސޫލެއްގެ ދަށުން އެމް.އެން.ޑީ.އެފް.އާ މަޝްވަރާކޮށް އެފަދަ އެހީތައް ހޯދޭ ކަމަށެވެ. ނަމަވެސް މީގެ ކުރިން ކޮށްފައިވާ އެފަދަ ކަންކަން އެނގިތިބެ އެކަންކަން ފޮރުވޭނެ ފަދަ ގޮތަކަށް ޚަބަރުތައް ފަތުރާފައި ވަނީ ސިޔާސީ ވަކި މަޤްޞަދެއްގައި ކަމަށް ވެސް ރާއްޖެ ޓީވީން ބުނެފައިވެއެވެ.
ރާއްޖެޓީވީން ބުނީ އެމް.އެން.ޑީއެފް.ގެ އެހީތެރިކަން ފޯރުކޮށްދީފައިވާނީ އެކަމުގައި ކަނޑައަޅާފައި އޮންނަ އުސޫލުގެ ތެރެއިން ކަމަށެވެ. އެގޮތުން ދ. އަތޮޅުގެ 11 ފަޅުރަށެއްގައި ކުރިއަށްގެންދިޔަ ހަރަކާތްތަކާ ގުޅޭގޮތުން އެމް.އެން.ޑީ.އެފް.އާ އެކު ރަސްމީކޮށް މަޝްވަރާކޮށްފައިވާނެ ކަމަށެވެ. އަދި އެ އެހީއަށް އެދުނީ އެފަދަ ރިސްކު ބޮޑު ކަމެއް އެމް.އެން.ޑީ.އެފް.ގެ އެހީތެރިކަމާ ނުލައި ކުރުމަކީ ރަނގަޅު ކަމަކަށް ނުވާތީ ކަމަށް ވެސް ރާއްޖެޓީވީން ބުންޏެވެ.
އެމް.އެން.ޑީ.އެފް. އިން ވެދީފައިވާ އެހީތެރިކަން ފާހަގަކޮށް ރާއްޖެޓީވީން ބުނީ ބައިވެރިންނަށް ފަސްޓް އެއިޑް އަދި ސަވައިލެންސް ޓްރެއިނިން ދިނުމާއި ޝޫޓިން ތެރޭގައި ލިބުނު އިންޖަރީތަކަށް ވަގުތުން ވަގުތަށް ފަރުވާދިނުމާއި ވެދިން އެހީ ފާހަގަކޮށް ޝުކުރު އަދާކޮށްފައިވެއެވެ.
މީޑިއާތަކުން ފަތުރަމުންދާ ވާހަކަތަކާ ގުޅިގެން އެމް.އެން.ޑީ.އެފް. އިން ވެސް ބުނީ ވަކި އުސޫލެއްގެ ދަށުން އެކަން ކުރުމުގެ ހުއްދަ އޮންނަ ކަމަށާއި މީގެ ކުރިން ވެސް އެފަދަ އެހީ އެހެން މީޑިއާތަކާ އަމިއްލަ ފަރާތްތަކަށް ވެސް ފޯރުކޮށްދީފައިވާނެ ކަމަށެވެ.
