ރާއްޖެއަކީ ބައިނަލްއަޤްވާމީގޮތުން އިތުބާރުހިފޭ ގާތް ބައިވެރިއެއް: ޗައިނާ
މިމަހުގެ 26 ވަނަ ދުވަހު ވަނީ ބައިލޭޓަރަލް ކޮންސަލްޓޭޝަންއެއް ބާއްވާފައި
ދިވެހި ސަރުކާރާއި ޗައިނާ ސަރުކާރާ ދެމެދު ބޭއްވި ބައިލޭޓަރަލް ކޮންސަލްޓޭޝަންސްގެ ތެރެއިން
ރާއްޖެއަކީ ބައިނަލްއަޤްވާމީ ގޮތުން އިތުބާރުހިފޭ ގާތް ބައިވެރިއެއްކަމަށް ޗައިނާއިން ބުނެފިއެވެ.
މިފަދައިން ޗައިނާއިން ބުނެފައި މިވަނީ މިމަހުގެ 26 ވަނަ ދުވަހު ދިވެހި ސަރުކާރާއި ޗައިނާ ސަރުކާރާ ދެމެދު ބޭއްވި ބައިލޭޓަރަލް ކޮންސަލްޓޭޝަންސްގެ 7 ވަނަ ބުރުގެ ތެރެއިންނެވެ.
ދިވެހި ސަރުކާރުގެ ފަރާތުން މި މަޝްވަރާތަކުގައި އިސްކޮށް ބައިވެރިވެވަޑައިގަންނަވާފައިވަނީ މިނިސްޓަރ އޮފް ސްޓޭޓް ފޮރ ފޮރިން އެފެއަރޒް އަހުމަދު ޚަލީލުއެވެ. އަދި ޗައިނާ ސަރުކާރުގެ ފަރާތުން އިސްކޮށް ބައިވެރިވެވަޑައިގަންނަވާފައިވަނީ ވައިސް މިނިސްޓަރ އޮފް ފޮރިން އެފެއަރޒް ލޫ ޝައުހުއީއެވެ. މި ބައްދަލުވުމުގައި ދެޤައުމުގެ ގުޅުން އިތުރަށް ބަދަހި ކުރުމާއި، ކޮވިޑް-19 އާ ދެކޮޅަށް ކުރެވޭ މަސައްކަތްތަކާއި، އަދި ބައިނަލްއަޤްވާމީ މަސްރަހުގައި ގުޅިގެން މަސައްކަތްކުރުމާ ބެހޭ ގޮތުން ވަނީ މަޝްވަރާކޮށްފައެވެ.
މި ބައްދަލުވުމުގައި ވާހަކަދައްކަވަމުން، މިނިސްޓަރ އޮފް ސްޓޭޓް ފޮރ ފޮރިން އެފެއަރޒް އަހުމަދު ޚަލީލުވަނީ ވަން ޗައިނާ ޕޮލިސީއިން ރާއްޖެއަށް ލިބޭ ފައިދާތަކުގެ މައްޗަށް އަލިއަޅުއްވާލައްވާފައެވެ. އަދި ކޮވިޑްގެ މި ދަތި ދަނޑިވަޅުގައި ޗައިނާގެ ސަރުކާރާއި ކުންފުނިތަކުން ރާއްޖެއަށް ވެދެމުންދާ އެހީތަކަށް ސްޓޭޓް މިނިސްޓަރ ޚަލީލު ޝުކުރުއަދާކުރެއްވިއެވެ. މި ބައްދަލުވުން ފެށުމުގެ ގޮތުން ވާހަކަދައްކަވަމުން ސްޓޭޓް މިނިސްޓަރ ޚަލީލް ވަނީ ޗައިނާގެ ފަތުރުވެރިން ރާއްޖެއަށް ގެނައުމަށް ދެ ޤައުމުގެ ދެމެދު ދަތުރުތައް ފަށައި، ބައިނަލްއަޤްވާމީ ދަތުރުތައް ފެށުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އަދި ދެޤައުމުގެ ދެމެދުގައި ވިޔަފާރިއާއި ފަތުރުވެރިކަން ވީހާވެސް އަވަހަކަށް އިޢާދަކުރުމާ ބެހޭ ގޮތުން ވަނީ މަޝްވަރާކޮށްފައެވެ. މި މަސައްކަތް އަވަސްކުރުމަށް ދެ ފަރާތުގެ ކަމާބެހޭ ފަރާތްތަކާއެކު މަޝްވަރާތައް އަވަސްކުރުން މުހިންމުކަމަށް އެމަނިކުފާނު ވިދާޅުވިއެވެ.
މި ބައްދަލުވުމުގައި ދެ ފަރާތުން ވަނީ ޗައިނާގެ އެހީގެ ދަށުން ރާއްޖޭގައި ކުރިއަށްގެންދާ ޕްރޮޖެކްޓްތަކުގެ މައްޗަށް އަލިއަޅުއްވާލައްވާފައެވެ. އަދި ކުރިއަށްއޮތްތަނުގައި ވެސް މިފަދަ އިތުރު ޕްރޮޖެކްޓްތައް އިތުރުކުރުމާ ގުޅޭގޮތުން ވެސް ދެ ފަރާތުން ވަނީ މުހިންމު މަޝްވަރާތަކެއްކޮށްފައެވެ. އަދި 2022 ވަނަ އަހަރު ދެ ޤައުމުގެ ދެމެދު ޚާރިޖީ ގުޅުން ޤާއިމުކުރިތާ 50 އަހަރުފުރޭއިރު ދެ ޤައުމުގެ ގުޅުން އިތުރަށް ބަދަހިކުރުމާ ގުޅޭގޮތުން ވަނީ މަޝްވަރާކޮށްފައެވެ.
މި ބައްދަލުވުމުގައި ވާހަކަދައްކަވަމުން ޗައިނާގެ ވައިސް މިނިސްޓަރ އޮފް ފޮރިން އެފެއަރޒް ލޫ ޝައުހު ވަނީ ދެ ޤައުމުގެ ގާތް ގުޅުމުގެ މައްޗަށް އަލިއަޅުއްވާލައްވާފައެވެ. އަދި ދެ ޤައުމުގެ އިސްވެރިންގެ މެދުގައި މި ފަދަ ބައްދަލުވުމެއް ބޭއްވުމަކީ ދެ ޤައުމުގެ ގާތް ގުޅުމުގެ ރަމްޒެއްކަމަށް ވައިސް މިނިސްޓަރ ލޫ ޝައުހު ފާހަގަކުރެއްވިއެވެ. ޗައިނާގެ ވައިސް މިނިސްޓަރ ވަނީ ރާއްޖެއަކީ ބައިނަލްއަޤްވާމީގޮތުން އިތުބާރުހިފޭ ގާތް ބައިވެރިއެއްކަމަށް ވިދާޅުވެފައެވެ.
މީގެ އިތުރުން ކޮވިޑް-19އިން އަރައިގަނެ، އިޤްތިޞާދު ކޮޅަށްޖެހުމަށް ކުރެވިދާނެ މަސައްކަތްތަކާ ބެހޭ ގޮތުންނާއި، ދެޤައުމުގެ ދެމެދުގައި ވިޔަފާރިއާއި ފަތުރުވެރިކަން ވީހާވެސް އަވަހަކަށް އިޢާދަކުރުމާ ބެހޭ ގޮތުން މަޝްވަރާ ކުރެވޭނެއެވެ.
މި ގޮތަށް ބާއްވަމުން އަންނަ ބައިލޭޓަރަލް ކޮންސަލްޓޭޝަން ވެފައިވަނީ ދެޤައުމުގެ މެދުގައި އޮންނަ ގުޅުން ބަދަހިކޮށް، ކުރެވޭ މަސައްކަތްތަކާ ބެހޭ ގޮތުން މަޝްވަރާކުރުމަށް ވަރަށް މުހިއްމު މަގަކަށެވެ. ދިވެހިރާއްޖެއާއި ޗައިނާއާ ދެމެދު ބައިލޭޓަރަލް ކޮންސަލްޓޭޝަންސް އެންމެ ފަހުން ބާއްވާފައިވަނީ 2017 ވަނަ އަހަރު ދިވެހިރާއްޖޭގައެވެ.
ކޮވިޑް-19ގެ ބަލިމަޑުކަމާ ގުޅިގެން މި ފަހަރުގެ ކޮންސަލްޓޭޝަންސް ކުރިއަށްގެންގޮސްފައިވަނީ ވަރޗުއަލްކޮށެވެ.
