ކުރީ އަހަރުގެ ރަމަޟާން މަހާއި އަޅައި ބަލާއިރު ނިމިގެންދިޔަ ރަމަޟާންމަހު ފޭރުމުގެ މައްސަލަތައް ގާތްގަނޑަކަށް ދެގުނައަށް އިތުރުވެފައިވާކަން ފުލުހުންގެ ތަފާސް ހިސާބުތަކުން ދައްކައިފިއެވެ.

ބުދަ ދުވަހުގެރޭ ފުލުހުން ހާމަކުރި ތަފާސް ހިސާބުތަކުން ދައްކާގޮތުން 1437 ވަނަ އަހަރުގެ ރަމަޟާން މަހު ފޭރުމުގެ 29 މައްސަލައެއް ވަނީ ފުލުހުންނަށް ހުށަހަޅާފައެވެ. ނިމިގެންދިޔަ ރަމަޟާން މަހު މި އަދަދު ވަނީ 50 އަށް އުފުލިފައެވެ. މި އަދަދަކީ ފުލުހުންނަށް ހުށަހެޅުނު މައްސަލަތައް ކަމުގައިވާއިރު، މި އަހަރުގެ ރަމަޟާން މަހު ފޭރުމުގެ ޝިކާރައަށްވެ، މައްސަލަ ފުލުހުންނަށް ހުށަނާޅައި، އެކަމުގެ ވާހަކަ އެކިއެކި ސޯޝަލް މީޑިއާ ޕްލެޓްފޯމްތަކުގައި ހިއްސާކުރި ފަރާތްތަކުގެ އަދަދަށް ބަލާއިރު، ނިމިގެންދިޔަ ރަމަޟާން މަހު ހިނގި ފޭރުމުގެ ހާދިސާތައް 50 އަށް ވުރެ އިތުރުވާނެ ކަމަށް ބެލެވެއެވެ.

ފުލުހުން ހާމަކޮށްފައިވާ އެހެނިހެން ކުށްތަކުގެ ތަފާސް ހިސާބަށް ބަލާއިރު، ކުރީ އަހަރުގެ ރަމަޟާން މަހާއި އަޅައި ބަލާއިރު، މި އަހަރުގެ ރަމަޟާން މަހު، މާރާމަރީގެ މައްސަލަތަކުގެ އަދަދުވެސް ވަނީ މައްޗަށް ގޮސްފައެވެ. އެގޮތުން ކުރީ އަހަރު މާރާމާރީގެ 63 މައްސަލައެއް ފުލުހުންނަށް ހުށަހެޅުނުއިރު، މި އަހަރު މި އަދަދު ވަނީ 69 އަށް އުފުލިފައެވެ.

ނިމިގެންދިޔަ ރަމަޟާން މަހު ފޭރުމާއި މާރާމާރީގެ މައްސަލަތައް އިތުރުވެފައި ވީނަމަވެސް، ވައްކަމާއި ޓްރެފިކް އެކްސިޑެންޓްގެ މައްސަލަތަކުގެ އަދަދު ވަނީ ދަށްވެފައެވެ. އެގޮތުން، މިދިޔަ އަހަރާއި އަޅާއި ބަލާއިރު، ފުލުހުނަށް ހުށަހެޅުނު ވައްކަމުގެ މައްސަލަތަކުގެ އަދަދު 271 އިން 220 އަށް މަދުވެފައިވާއިރު، ޓްރެފިކް އެކްސިޑެންޓްގެ މައްސަލަތައް މިއަހަރު ވަނީ 180 އިން 177 އަށް ތިރިވެފައެވެ.

މީގެ އިތުރުން، ކުރީ އަހަރުގެ ރަމަޟާން މަހު، ދުވާލު ވަގުތުގައި ކައިގެން/ބޮއިގެން 21 މައްސަލައެއްގައި 17 މީހަކު ހައްޔަރުކޮށްފައިވާއިރު، ނިމިގެންދިޔަ ރަމަޟާންމަހު އެފަދަ 26 މައްސަލައެއްގައި 29 މީހަކު ވަނީ ހައްޔަރުކޮށްފައެވެ.

މި ހިސާބުތަކަށް ބަލާއިރު، މި ކުށްތައް ކުރި ޖުމްލަ ނިސްބަތް މި އަހަރު ވަނީ ދަށަށް ގޮސްފައެވެ.