16 އަހަރުންދަށުގެ ކުދިންނަށް ވެކްސިންޖެހުމުގެ ހުއްދައެއް ނެތް
ވެކްސިންޖަހަން ފަށާނީ ޑަބްލިއު.އެޗް.އޯ.ގެ ހުއްދަ ލިބުމުން
ރާއްޖެއަށް ވަނީ ވެކްސިން ގެނައުމުގެ މަސައްކަތް ފަށާފައި
ކޮވިޑް-19އިން ރައްކާތެރިވުމަށް ޖަހާ އެއްވެސް ވެކްސިނެއް 16 އަހަރުންދަށުގެ ކުޑަކުދިންނަށް ޖެހުމުގެ ހުއްދައެއް ދުނިޔޭގެ ސިއްޙަތު ޖަމްޢިއްޔާއިން ދީފައިނުވާކަމަށް ހެލްތް ޕްރޮޓެކްޝަން އޭޖެންސީ (އެޗް.ޕީ.އޭ) އިން ހާމަކޮށްފިއެވެ.
އެޗް.ޕީ.އޭ.އިން މިކަން ހާމަކޮށްފައިވަނީ އެ އޭޖެންސީއިން ކޮވިޑް-19ގެ ވެކްސިނާ ގުޅޭގޮތުން އާއްމުން ހޭލުންތެރިކުރުވުމަށް "ކޮވިޑް-19 ދިފާޢު"ގެ ނަމުގައި ކަމާބެހޭ ފަރާތްތަކާގުޅިގެން ކުރިއަށްގެންދާ ޚާއްޞސ ކެމްޕޭންގެ ތެރެއިންނެވެ.
ކޮވިޑް-19ގެ ވެކްސިންއާ ގުޅޭގޮތުން އާންމުގޮތެއްގައި ކުރާ ސުވާލުތަކަށް މި ކެމްޕޭންގެ ތެރެއިން ދަނީ ޖަވާބު ދެމުންނެވެ. އެގޮތުން ދިވެހިރާއްޖޭގައި ބޭނުންކުރަން ހަމަޖެހިފައިވަނީ ކޯވިޑް-19ގެ ކޮން ވެކްސިންތަކެއްކަމާއި، އިންޑިއާގެ ސިރަމް އިންސްޓިޓިއުޓުން އުފައްދާ 'ކޮވިޝީލްޑް'ގެ ރައްކާތެރިކަމާ ގުޅޭގޮތުން ވެސް ވަނީ ޖަވާބު ދީފައެވެ. މީގެ އިތުރުން 'ކޮވިޝީލްޑް' ވެކްސިންގެ ސައިޑް އިފެކްޓްސް ފެންނައިރު، އާންމުކޮށް ހަށިގަނޑުން ފެންނަ އަލާމާތްތަކަކީ ވައިރަސްއާ ދެކޮޅަށް ހަށިގަނޑު ރައްކާތެރިކުރުމަށް ދިފާޢީ ނިޒާމުން މަސައްކަތްކުރާކަމުގެ އަލާމާތްތަކެއްކަމަށް އެޗްޕީއޭއިން ވަނީ ބުނެފައެވެ. އަދި މި އަލާމާތްތައް ދެތިން ދުވަހެއްގެ ތެރޭގައި ފިލައި ރަނގަޅުވާނެކަމަށް އެ އޭޖެންސީއިން ވަނީ ބުނެފައެވެ.
ދިވެހިރާއްޖޭގައި ދޭ ހުރިހާ ވެކްސިންތަކަކީ ވެސް މޯލްޑިވްސް ފުޑް އެންޑް ޑްރަގް އޮތޯރިޓީން ހުއްދަ ލިބިގެން ބޭނުންކުރެވޭ ވެކްސިންތަކެއްކަމަށް އެޗް.ޕީ.އޭ.އިން ވަނީ ހާމަކޮށްފައެވެ. އަދި އެކި ކާރުޚާނާތަކުން ހޯދާ ވެކްސިން ރާއްޖެ ގެނެޔަސް ވެކްސިން ޖަހަން ފަށާނީ ދުނިޔޭގެ ޞިއްޙަތު ޖަމްޢިއްޔާގެ ރައްކާތެރިކަމުގެ މިންގަނޑުތަކަށް ފެތޭތޯ ޔަޤީންވުމުންކަމަށް މި ކެމްޕޭންގެ ތެރެއިން ނެރެފައިވާ ލިޔުމުގައިވެެއެވެ.
މި ލިޔުމުގައި ވަނީ ކުޑަކުދިންނަށް ކޮވިޑް-19 ވެކްސިން ޖަހާނެތޯ ކުރާ ސުވާލަށް ވެސް ޖަވާބު ދީފައެވެ. އެޗް.ޕީ.އޭ.އިން ވަނީ ކޮވިޑް-19 އާ ގުޅިގެން މިހާތަނަށް އުފައްދާފައިވާ ވެކްސިން ތަކަކީ ކަނޑައަޅާފައިވާ ވަކި އުމުރުފުރާއަކަށް ޓެސްޓްކޮށްފައިވާ ވެކްސިންތަކެއްކަމަށް ބުނެފައެވެ. މި ވެކްސިން ޓެސްޓުކުރުމުގައި 16 އަހަރުންދަށުގެ ކުދިން ހިމެނިފައި ނުވާތީ މި އުމުރުފުރާގެ ކުދިންނަށް ވެކްސިނެއް ނުޖަހާނެކަމަށް ވަނީ ބުނެފައެވެ.
މީގެ އިތުރުން މިހާތަނަށް އުފައްދާފައިވާ ވެކްސިންތަކަކީ މާބަނޑު އަންހެނުންނާއި ގާތުން ކިރުދޭ މައިންނަށް ވެސް އެންމެ ރައްކާތެރި ވެކްސިންތަކެއްކަން ކަށަވަރުކުރެވިފައި ނުވުމުން މި މީހުންނަށް ވެކްސިން ނުދިނުމަށް ވަނީ ނިންމާފައެވެ.
މި ބައްޔަށް ހުށަހެޅިއްޖެނަމަ، އެކަމުގެ ނުރައްކާ އެންމެ ބޮޑުވާނެ މީހުންގެ ތެރޭގައި ހިމެނެނީ އުމުރުން 50 އަހަރުން މަތީގެ މީހުންނާއި އުމުރުން 50 އަހަރާއި 18 އަހަރާ ދެމެދުގެ މީހުންގެ ތެރެއިން ދާއިމީ ބަލިތަކަށް ބޭސްކުރާ މީހުންކަމުން ވެކްސިންތައް މިހާރު ތައްޔާރުކުރަނީ މި އުމުރުފުރާއަށް އަމާޒުކޮށްކަމަށް އެޗްޕީއޭއިން ހާމަކުރެއްވިއެވެ.
މި ލިޔުމުގައި ވަނީ ރާއްޖެއަށް ވެކްސިން ޖަހަންވާއިރަށް ވަމުންދާ ތައްޔާރީތަކުގެ މަޢުލޫމާތު ވެސް ހިއްސާކޮށްފައެވެ. އެގޮތުން ވެކްސިން ދިނުމަށް ނިންމާފައިވާ ޚާއްޞަ ގުރޫޕްތަކަކަށް ވެކްސިން ދޭނެ ތަރުތީބު ވަނީ އެކަމަށް އެކުލަވައިލާފައިވާ ބައިނަލްއަޤްވާމީ އޮނިގަނޑުތަކާ އެއްގޮތަށް ކަނޑައަޅާފައެވެ. ވެކްސިން ރައްކާކުރުމުގައި ޢަމަލުކުރަންވީ މިންގަނޑުތަކަށް ބަލައި، ކޯލްޑްޗެއިން ނިޒާމު ހަރުދަނާކުރުމުގެ މަސައްކަތް ކުރަމުންދާއިރު ވެކްސިން ފޯރުކޮށްދިނުމުގެ ޕްލޭނެއް ވަނީ އެކުލަވައިލާފައެވެ. ވެކްސިން ދޭނެގޮތާއި ވެކްސިންގެ ސަބަބުން ހަށިގަނޑަށް ކޮށްފާނެ ނޭދެވޭ އަސަރުތައް ސިއްޙީ ޚިދުމަތްތެރިންނަށް އުނގަންނައިދީ ތަމްރީނުކުރުމުގެ މަސައްކަތް ވެސް މިހާރު ދަނީ ކުރަމުންނެވެ.
ދުނިޔޭގެ ސިއްޙަތު ޖަމިއްޔާގެ ތަފާސްހިސާބުތައް ދައްކާގޮތުން، 64 ވައްތަރެއްގެ ވެކްސިނެއް އިންސާނުންނަށް ޖަހައިގެން ޓެސްޓްކުރުމުގެ މަރުޙަލާގައިވާއިރު، 173 ވެކްސިނެއް މިހާރު ދަނީ ތައްޔާރުކޮށް ލެބޯޓްރީގައި ޓެސްޓްކުރަމުންނެވެ. އަދި ވެކްސިން ޓެސްޓްކުރުމުގެ އެންމެ ފަހު މަރުޙަލާގެ ތެރޭގައި 15 ވެކްސިނެއް ފުޅާ ދާއިރާއެއްގައި ޓެސްޓްކުރެވެމުން އެބަދެއެވެ. ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވަނީ ރާއްޖެއަށް ބޭނުންވާ ވަރަށް ވެކްސިން ލިބޭނެކަމުގެ ޔަޤީންކަން ދެއްވާފައެވެ. މި މަހުގެ 20 ވަނަ ދުވަހު އިންޑިއާ ސަރުކާރުން ކޮވިޝީލްޑް ވެކްސިންގެ އެއް ލައްކަ ޑޯޒް ރާއްޖެއަށް ހަދިޔާކޮށްފައިވާއިރު، ކޮވެކްސް ފެސިލިޓީގެ ތެރެއިން ދިވެހިރާއްޖެއަށް ވެކްސިން ލިބޭނެކަމަށް ލަފާކުރެވެނީ 2021 ގެ ފުރަތަމަ 3 މަސްދުވަހުގެ ތެރޭގައިކަމަށް ވަނީ ބުނެފައެވެ.
