އެން.ޑީ.އޭ އިސްލާޙުކުރުމުގެ މަސައްކަތް ލަސްވުމަކީ ރާއްޖެއަށް ލިބޭ ބޮޑު ގެއްލުމެއް: ނަޝީދު
24 ޖެނުއަރީ 2021 | އާދީއްތަ 05:44އެން.ޑީ.އޭ.އަށް އިސްލާޙު ގެންނަން ޖެހިފައިވާކަމީ ޝައްކު ހިނގާކަމެއް ނޫންކަމަށް ނަޝީދު ވިދާޅުވި
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު
ނޭޝަނަލް ޑްރަގް އެޖެންސީ (އެންޑީއޭ) އިސްލާޙުކުރުމުގެ މަސައްކަތް ލަސްވުމަކީ ރާއްޖެއަށް ލިބޭ ބޮޑު ގެއްލުމެއްކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
މަސްތުވާތަކެތި ބޭނުންކުރާ މީހުންނަށް ފަރުވާދިނުމުގެ ކަންކަން ކުރިޔަށް ގެންދާ އެން.ޑީ.އޭ.ގެ ގިނަ މައްސަލަތަކެއް ފެންމަތިވެފައިވާ މި ދަނޑިވަޅުގައި، ރައީސް މުޙައްމަދު ނަޝީދު ކުރެއްވި ޓުވީޓެއްގައި ވަނީ އެން.ޑީ.އޭ.އަށް އިސްލާޙު ގެންނަން ޖެހިފައިވާކަމީ ޝައްކު ހިނގާކަމެއް ނޫންކަމަށް ވިދާޅުވެފައެވެ. މި މަސައްކަތް ފަސްވެ, ލަސްވަމުން ދިއުމަކީ މުޅި ރާއްޖެއަށް ލިބޭ ބޮޑު ގެއްލުމެއްކަމަށް މަޖިލީހުގެ ރައީސް ނަޝީދު ވިދާޅުވިއެވެ.
އެން.ޑީ.އޭ.ގެ ހިންގުމާ މެދު ރައްޔިތުންގެ މެދުގައި ވަނީ ހިތްހަމަނުޖެހުން އުފެދިފައެވެ. އެގޮތުން ފަރުވާގެ ނިޒާމު ދޯހަޅިކަމުގެ ސަބަބުން އެން.ޑީ.އޭ. ގެ ކަންކަން އިސްލާހުކުރަން ގޮވާލައި އެ އެޖެންސީ ކުރިމަތީގައި ވަނީ މުޒާހަރާ ވެސް ވަނީ ކޮށްފައެވެ. އަދި ބޭން އެން.ޑީ.އޭ. ހޭޝްޓެގް ބޭނުންކޮށްގެން ސޯޝަލް މީޑިއާގައި ވެސް އާންމުން ދަނީ ޝުޢޫރު ފާޅުކުރަމުންނެވެ.
ގާނޫނާ އެއްގޮތަށް މިދިޔަ ނުވަ އަހަރު ކަންތައް ނުކުރި ސަބަބު ބަލައި ފިޔަވަޅު އެޅުމަށް ގޮވާލައި، އަދި އެން.ޑީ.އޭ. ރިފޯމްކުރަން ގޮވާލައި ކުރި މުޒާހަރާގައި އެންމެ ބޮޑު ކަންބޮޑުވުމަކަށް ފާހަގަކޮށްފައިވަނީ ފަރުވާގެ ނިޒާމު ބޮއްސުންލާފައި ވުމެވެ.
އެން.ޑީ.އޭ. އިސްލާޙުކުރުމަށް ގޮވައިލަމުންދާއިރު، އެ އޭޖެންސީގެ ޗީފް އެކްޒެކްޓިވް އޮފިސަރަކު ހޯދަން ތިން ވަނަ ފަހަރަށް އިޢުލާންކުރުރުމަށްފަހު 18 ޖެނުއަރީ 2021 ވީ ހޯމަ ދުވަހު ވަނީ މުޙައްމަދު ޙަބީބު ހަމަޖައްސަވައިފިއެވެ. އެން.ޑީ.އޭ.އަށް ސީއީއޯ އެއް ހޯދަން އިޢުލާން ކޮށްފައި މިވަނީ ކުރިން އެ މަގާމުގައި ހުންނެވި ހަސަން ޝަހީލް އިސްތިޢުފާ ދެއްވުމާ ގުޅިގެންނެވެ. އޭނާ އިސްތިޢުފާދެއްވީ ސެޕްޓެމްބަރު މަހުގެ 27 ވަނަ ދުވަހުއެވެ.
