މަތީ ތަޢުލީމުގެ ލޯނުގައި މިއަހަރު ނުކުޅެދުންތެރިކަން ހުންނަ ފަރާތްތަކަށް ޚާއްޞަ ޖާގަތަކެއް
24 ޖެނުއަރީ 2021 | އާދީއްތަ 04:17މި ފުރުސަތުގެ ދަށުން ދެނީ ކިތައް ޖާގަކަމެއް ހާމަކޮށްފައެއް ނުވޭ
ސްޓޫޑެންޓް ލޯންއަށް އެދުމުގެ ފުރުސަތު އަދި ހުޅުވާލާފައެއް ނުވޭ
މަތީ ތަޢުލީމާއި ތަމްރީނުގެ ފުރުސަތުތަކަށް މިއަހަރު ދޫކުރާ ލޯންގައި ނުކުޅެދުންތެރިކަން ހުންނަ ފަރާތްތަކަށް ޚާއްޞަ ޖާގަތަކެއް ދޭން ނިންމައިފިއެވެ.
މިމަހުގެ 21 ވަނަ ދުވަހު ހަޔަރ އެޑިއުކޭޝަން މިނިސްޓްރީއިން ކުރި ޓުވީޓެއްގައި ވަނީ މަތީ ތަޢުލީމާއި ތަމްރީނުގެ ފުރުސަތުތަކަށް މި އަހަރު ދޫކުރާ ލޯނުގެ އެހީގައި ނުކުޅެދުންތެރިކަން ހުންނަ ފަރާތްތަކަށް ހާއްސަކޮށް ޖާގަ ދިނުމަށް ހަޔަރ އެޑިއުކޭޝަން މިނިސްޓްރީއިން ނިންމާފައިވާކަން ހާމަކޮށްފައެވެ.
މި ކެޓެގަރީއިން ލޯނަށް ހުށަހަޅަން ޝައުގުވެރިވާ ފަރާތްތަކުން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ނުކުޅެދުންތެރިކަން ހުންނަ ފަރާތްތަކުގެ ދަފްތަރުގައި ރަޖިސްޓްރީވުމަށް ހަޔަރ އެޑިއުކޭޝަން މިނިސްޓްރީއިން ވަނީ އަންގާފައެވެ. މި ފުރުސަތުގެ ދަށުން މިއަހަރު ނުކުޅެދުންތެރިކަން ހުންނަ ފަރާތްތަކަށް ޚާއްޞަކުރާނީ ކިތައް ޖާގަކަން އަދި ނުނިންމާކަމަށް ހަޔަރ އެޑިއުކޭޝަން މިނިސްޓްރީއިން މަޢުލޫމާތުދެއެވެ. އަދި ކުރިއަށް އޮތްތަނުގައި މި ފުރުސަތުތަކުގެ އިތުރު ތަފްސީލު ހާމަކުރާނެކަމަށް ވެސް އެ މިނިސްޓްރީއިން ވަނީ ބުނެފައެވެ.
918.5 މިލިއަން ރުފިޔާ މަތީ ތަޢުލީމަށް ޚަރަދުކުރުމަށް 2021 ވަނަ އަހަރުގެ ބަޖެޓްގައި ހިމަނާފައިވާއިރު، ޒުވާނުންގެ ހުނަރު ތަރައްޤީކުރުމަށް ހުރި ފުރުސަތުތައް ފަހިކޮށްދިނުމުގެ ގޮތުން މިއަހަރުގެ ބަޖެޓުގައި ގިނަ މަޝްރޫޢުތަކަކާއި ޕްރޮގްރާމްތަކެއް ވަނީ ހިމަނާފައެވެ.
މިސަރުކާރުގެ ފުރަތަމަ އަހަރު ތަޢާރަފު ކުރި ޑިގްރީ ފެންވަރަށް ހިލޭ ކިޔެވުމުގެ ޕްރޮގްރާމްގެ ދަށުން މިހާތަނަށް 7,800 އަށް ވުރެ ގިނަ ކުދިންނަށް ހިލޭ ކިޔެވޭނެ މަގު ވަނީ ފަހިކޮށްދީފައެވެ. އަދި 2021 ވަނަ އަހަރު މަތީ ތަޢުލީމު ހާސިލް ކުރުމަށް ދަރިވަރުންނަށް ދެމުންގެންދާ ހަޔަރ އެޑިއުކޭޝަން ލޯން ސްކީމަށާއި، ހިލޭ ފަސްޓް ޑިގްރީއާ ހަމައަށް ކިޔެވުމުގެ ޕްރޮގްރާމަށާއި، ސްކޮލަރޝިޕްތަކަށް 551 މިލިއަން ރުފިޔާ ޚަރަދުކުރުމަށް ބަޖެޓުވަނީ ކުރެވިފައެވެ.
މަތީ ތަޢުލީމުގެ ފުރުޞަތު ފަހިކޮށްދިނުމަށްޓަކައި ސަރުކާރުން ދެމުން އަންނަ ސްޓޫޑެންޓް ލޯނަށް އެދުމުގެ ފުރުޞަތު މި މަހު ހުޅުވާލުމަށް ހަޔަރ އެޑިއުކޭޝަން މިނިސްޓްރީއިން ދަނީ މަސައްކަތް ކުރަމުންނެވެ. ސްޓޫޑެންޓް ލޯން އެންމެ ފަހުން ދޫކޮށްފައިވަނީ މިދިޔަ އަހަރުގެ ޖޫން މަހުގެ ތެރޭގައެވެ. އެފަހަރު އެކި ދާއިރާތަކުން ކިޔެވުމަށްޓަކައި ޖުމްލަ 514 ދަރިވަރަކަށް ލޯން ދޫކޮށްފައިވާއިރު އެއީ 151 މިލިޔަން ރުފިޔާއެވެ.
މިއަހަރުގެ ސްޓޫޑެންޓް ލޯން ސްކީމްގައި ނުކުޅެދުންތެރިކަން ހުންނަ ފަރާތްތަކަށް ޚާއްޞަ ޖާގަތަކެއް ދޭން ނިންމާފައިވާއިރު، ނުކުޅެދުންތެރިކަން ހުންނަ ފަރާތްތަކަށް ޚާއްޞަކޮށްގެން ގިނަ މަސައްކަތްތަކެއް މި ސަރުކާރުން އަންނަނީ ކުރަމުންނެވެ. އެގޮތުން ރާއްޖޭގައި ފުރަތަމަ ފަހަރަށް ނުކުޅެދުންތެރިކަން ހުންނަ މީހުންނަށް އެއް ފުރާޅެއްގެ ދަށުން ހިދުމަތް ދެވޭ ގޮތަށް ''ޑިސްއެބިލިޓީ މެނޭޖްމެންޓް އެންޑް ރީހެބިލިޓޭޝަން ސެންޓަރު"ގެ ނަމުގައި ސެންޓަރެއް ގާއިމުކުރުމުގެ މަސައްކަތް ފަށާފައިވާކަމަށް ދާދި ފަހުން ޖެންޑަރ މިނިސްޓަރު އައިޝަތު މުހައްމަދު ދީދީ ވަނީ ވިދާޅުވެފައެވެ.
