އަންހެނުންނަށް ކައުންސިލުން ގޮނޑި ޚާއްސަ ކުރި މައްސަލައިގެ ޙުކުމް ކުރުން މާދަމާ ލައިވްކޮށް
މި މައްސަލަ ފުރަތަމަ ހުށައަޅާފައިވަނީ ސުޕްރީމް ކޯޓަށް
މި މައްސަލައިގެ ދައުވާއަށް ޖަވާބުދާރީވަމުން ބަންޑާރަ ނައިބުގެ އޮފީހުގެ ވަކީލު ވާހަކަ ދައްކަވަނީ
ކައުންސިލްތަކުގެ 33 ޕަސެންޓް އަންހެނުންނަށް ޚާއްސަ ކުރުމާ ގުޅިގެން ޖުމްހޫރި ޕާޓީގެ ޒުވާނުންގެ ގޮފީގެ ކުރީގެ ރައީސް މޫސާ އަންވަރު ހައިކޯޓަށް ހުށައެޅި ދުސްތޫރީ މައްސަލައިގައި ޙުކުމް ކުރުމަށް ތައްޔާރުވެއްޖެއެވެ.
އަންވަރުގެ ފަރާތުން ހައިކޯޓަށް ހުށައެޅި މި މައްސަލައިގައި ބުނެފައިވަނީ، އަންހެނުންނަށް ގޮނޑި ޚާއްސަކުރަން ޖެހޭ ގޮތަށް ލާމަރުކަޒީ ނިޒާމަށް ގެނައި އިސްލާޙަކީ ޖިންސީ ގޮތުން ތަފާތު ކުރުމަށް މަގުފަހިވާ އިސްލާޙެއް ކަމަށެވެ.
މި މައްސަލައިގެ ޙުކުމް ކުރުމަށް ތާވަލު ކޮށްފައިވަނީ އާދިއްތަ ދުވަހުގެ މެންދުރު 1400 އަށެވެ. އެގޮތުން މި މައްސަލަ ހައިކޯޓުގެ ޔޫޓިއުބް ޗެނަލްއިން ލައިވް ކުރުމަށް ވަނީ ނިންމާފައެވެ.
މި އަޑުއެހުމުގައި ބައިވެރިވެވަޑައިގެން ދައުވާއަށް ޖަވާބުދާރީވަމުން ބަންޑާރަ ނައިބުގެ އޮފީހުގެ ވަކީލު ވިދާޅުވީ، މި ޤާނޫނުގެ ސަބަބުން ޖިންސީ ގޮތުން ތަފާތު ނުވާ ކަމަށެވެ. އެގޮތުން ދިވެހި ރާއްޖޭގެ އިދާރީ ދާއިރާތައް ލާމަރުކަޒީ ގޮތުން ހިންގުމުގެ ޤާނޫނަށް އިސްލާޙުތަކެއް ގެންނަން ޖެހޭކަން ފާހަގަ ކުރައްވައި ވަކީލު ވިދާޅުވީ، މި ދާއިރާތަކުގައި އަންހެނުންގެ ދައުރު އިތުރު ކުރުމަކީ މި ސަރުކާރުންވެސް އިސްކަންދޭ ކަމެއް ކަމަށެވެ.
އޭގެ އިތުރުން، މިހާރުވެސް ލޯކަލް ކައުންސިލްތަކުގައި އަންހެނުންގެ ދައުރު ކުޑަކަން ފާހަގަ ކުރައްވައި ބަންޑާރަ ނައިބު އޮފީހުގެ ވަކީލު ވިދާޅުވީ، 2011 ވަނަ އަހަރުން ފެށިގެން ކައުންސިލުތަކަށް އިންތިޚާބުވާ އަންހެނުންގެ އިންސައްތަ 10ށް ވުރެވެސް ދަށް ކަމަށެވެ. އެއާއެކު އަންހެނުންނަށް ކައުންސިލްގައި ގޮނޑިތަކެއް ހާއްސަ ކުރުމަކީ ތަފާތު ކުރުމެއް ނޫން ކަމަށާއި، އެއީ ހަގީގަތުގައި ހަމަހަމަ ފުރުސަތުތަކެއް ހޯދައިދިނުންކަން ވަކީލު ފާހަގަ ކުރެއްވިއެވެ.
ވަކީލު ވިދާޅުވީ، މުޖުތަމައުގެ އާންމު ޙާލަތަށްވުރެ ނިކަމެތިކަމެއް ލިބިފައިވާ މީހަކަށް ނުވަތަ ބަޔަކަށް ނުވަތަ އިޖުތިމާއީ ގޮތުން ޚާއްސަ ރައްކާތެރިކަމެއް ލިބިދޭންޖެހޭ ބަޔަކަށް އެހީތެރިވެދިނުމަށްޓަކައި ކުރާ ކަންކަމަކީ ތަފާތު ކުރުން ކަމަށް ނުބެލެވޭކަމަށް ސީދާ ޤާނޫނު އަސާސީގައި ބަޔާން ކޮށްފައިވާ ކަމަށެވެ. އަދި ކައުންސިލްތަކުގެ 33 ޕަސެންޓް އަންހެނުންނަށް ހާއްސަކުރަން ޖެހޭ ގޮތަށް ލާމަރުކަޒީ ނިޒާމަށް ގެނައި އިސްލާހަކީ އެ އަސާސްގެ މައްޗަށް ބިނާވެގެންވާ އިސްލާޙެއްކަމަށް ވަކީލު ވިދާޅުވިއެވެ.
ވަކީލު ވިދާޅުވީ، މިއީ ބައިނަލްއަޤުވާމީ ގޮތުންވެސް މިހާރު ބަލައިގެންފައިވާ އުސޫލުތަކެއް ކަމަށެވެ. އަދި އެކަން ބޭރުގެ ޤައުމުތަކުގެ ނިންމުންތަކުންވެސް ފެންނަން އޮތްކަން ވަކީލު ފާހަގަ ކުރެއްވިއެވެ. އަދި އަންހެނުންނަށް ވަކި ގޮނޑިތަކެއް ހާއްސަކޮށްފައި އޮތުމަކީ ގާނޫނު އަސާސީއާ ތައާރަޒުވާ ކަމެއް ނޫން ކަމަށް ކަނޑައަޅައިދިނުމަށް އޭޖީ އޮފީހުން ވަނީ އެދިފައެވެ.
އަންވަރުގެ ފަރާތުން ހުށައެޅި މި މައްސަލަ ފުރަތަމަ ހުށައަޅާފައިވަނީ ސުޕްރީމް ކޯޓަށެވެ. އެހެން ނަމަވެސް މި މައްސަލަ ނުބެލޭނެ ކަމަށް ނިންމައި ސުޕްރީމް ކޯޓުގެ ރެޖިސްޓްރަރ، މޫސާ އަންވަރަށް ފޮނުވާފައިވާ ސިޓީގައި ބުނެފައިވަނީ، ފުރަތަމަ މަރުހަލާގައި އެ މައްސަލަ ބެލުމުގެ ބާރުލިބިގެންވަނީ ހައިކޯޓަށް ކަމަށެެެވެ. އެހެން ކަމުން އެ މައްސަލަ ސުޕްރީމް ކޯޓުން ބެލެން ނެތްކަމަށް އެ ކޯޓުން ފޮނުވި ސިޓީގައިވެއެވެ. އެއާއެކު އަންވަރު ވަނީ އެ މައްސަލަ ހައިކޯޓަށް ހުށަހަޅާފައެވެ.
