ހއ ހޯރަފުށީ މެޖިސްޓްރޭޓް ކޯޓުގެ އިސް މެޖިސްޓްރޭޓް މުޙައްމަދު ޝަރީފުގެ ސުލޫކީ މައްސަލައެއް ޖުޑީޝަލް ސަރވިސް ކޮމިޝަން (ޖޭއެސްސީން) ބަލަން ފަށައިފިއެވެ.
އެކަން ހާމަކޮށް ހޮނިހިރު ދުވަހު ޖޭއެސްސީން ނެެރުނު ބަޔާނެއްގައި ބުނީ، އެއީ މެޖިސްޓްރޭޓް ޝަރީފް ތަނާޒުލްވާން ޖެހޭ މައްސަލައަކަށް ތަނާޒުލްނުވެ، އެ މައްސަލަ ހިންގައި ނިންމިކަމަށް ބުނެ ޖޭއެސްސީއަށް ހުށައެޅިފައިވާ މައްސަލައެއް ކަމަށެވެ. އެގޮތުން އެ މައްސަލަ ތަހުޤީޤު ކުރުމަށް ކޮމިޝަނުން ނިންމާފައިވަނީ މިހިނގާ ޖެނުއަރީ މަހުގެ 13 ވަނަ ދުވަހުއެވެ.
ޖޭއެސްސީން މިހާރު ވަނީ އެ މައްސަލަ ތަހުޤީޤު ކުރުމަށްޓަކައި ޚާއްސަ ތަހުޤީޤު ކޮމިޓީއެއްވެސް އެކުލަވާލާފައެވެ.
ޖޭއެސްސީއަށް ހުށައެޅޭ މައްސަލަތައް ބަލައި، ނިންމާ ސްޕީޑު ކުރިއަށްވުރެ އަވަސްވެފައިވާއިރު، އެ ކޮމިޝަނުން މިހާރު ގެންދަނީ ވީހާވެސް ދެފުށް ފެންނަ ގޮތެއްގައި މައްސަލަތައް ބެލުމުގެ ކަންކަން ކުރިއަށް ގެންދަމުންނެވެ. އެގޮތުން ފަނޑިޔާރުންނާ ގުޅިގެން ސުލޫކީ މައްސަލައެއް ހުށައެޅިއްޖެނަމަ، އެ މައްސަލަތައް ކުރިއަށްދާ, ނުދާ ގޮތްވެސް ރައްޔިތުންނަށް ގެންދަނީ ހާމަ ކުރަމުންނެވެ. އެއާއެކު، ޖޭއެސްސީއަށް އާންމުން ކުރާ އިތުބާރުވެސް އެތައް ގުނައަކަށް އިތުރުވެފައިވާކަމަށް ގިނަ ބަޔަކު ބުނެއެވެ.
ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައި ބަންޑާރަނައިބު އިބްރާހިމް ރިއްފަތުވެސް ވަނީ، މީގެ ކުރިންވެސް ފަނޑިޔާރުންނާ ގުޅިގެން ޝަކުވާ ހުށައެޅޭ ކަމަށާއި، ނަމަވެސް އޭރު އެ ޝަކުވާތަކަށް ވާނުވާ ރައްޔިތުންނަށް ވެސް އޮޅުން ނުފިލާކަން ފާހަގަ ކުރައްވާފައެވެ. އެހެން ނަމަވެސް މިހާރު ޖޭއެސްސީން އެ މަސައްކަތް ކުރިއަށް ގެންދަނީ ވަރަށް ދެފުށް ފެންނަ ގޮތެއްގައިކަން ފާހަގަ ކުރައްވައި ބަންޑާރަނައިބު ވިދާޅުވީ، ފަނޑިޔާރުން މަޤާމަށް ހޮއްވަވާއިރުވެސް އެ ފަނޑިޔާރެއްގެ ނަޒާހަތްތެރިކަމާއި، ފަނޑިޔާރަކާއި ގުޅިގެން ހުށައެޅިފައިވާ ތުހުމަތުތަކަށް ރިއާޔަތް ކުރައްވައި ބައްލަވާ ކަމަށެވެ.
އައު މެމްބަރުންތަކާއެކު ޖޭއެސްސީން ކުރަމުންދާ މަސައްކަތްތަކަށް މިއަދު ގިނަ ބައެއްގެ ތައުރީފު ދަނީ ލިބެމުންނެވެ. އެގޮތުން ފަނޑިޔާރުންނާ ގުޅިގެން ހުށައެޅޭ ސުލޫކީ މައްސަލަތައް ބަލަމުންދާއިރު، ކުރެވޭ ތުހުމަތުތަކާ ގުޅިގެން ތަހުޤީޤު ކުރުމަށްފަހު ފަނޑިޔާރުންނާމެދު އަޅަންޖެހޭ ފިޔަވަޅު އަޅާ މަންޒަރުވެސް މިއަދު ފެންނަމުންދާ ކަމަށް ގިނަ ބަޔަކު ބުނެއެވެ.
