މިއަހަރުގެ ތެރޭގައި 13 އައިސްޕްލާންޓް ގާއިމްކުރެވި، މަސްވެރިންނަށް އައިސް ލިބުމުގައި ދިމާވާ ދަތިތަކަށް ހައްލެއް ލިބިގެންދާނެ - މިނިސްޓަރ
22 ޖެނުއަރީ 2021 | ހުކުރު 14:51މިކަންތައް ހައްލުކުރުމަށް ބޭނުންވާ ފައިސާ މިހާރު ވަނީ ލިބިފައި
މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ، ޒަހާ ވަހީދު
ދިވެހި މަސްވެރިންނަށް ދިމާވާ އެންމެ ބޮޑު އެއް ގޮންޖެހުމަކީ އައިސް ނުލިބުން ކަމަށާއި މި މައްސަލަ ހައްލުކުރުމަށްޓަކައި މިއަހަރުގެ ތެރޭގައި 13 ވަރަކަށް އައިސްޕްލާންޓް ރާއްޖޭގެ އެކި ސަރަހައްދުތަކުގައި ގާއިމްކުރުމަށް މަސައްކަތްކުރަމުން ދާކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ، ޒަހާ ވަހީދު ވިދާޅުވެއްޖެއެވެ.
ރާއްޖެޓީވީގެ ވިޔަފާރި މިއަދު ޕްރޮގްރާމަށް ދެއްވި އިންޓަވިއުއެއްގައި ރާއްޖޭގެ މަސްވެރިންގެ ކަންބޮޑުވުންތަކާއި ގުޅޭގޮތުން ވާހަކަދައްކަވަމުން މިނިސްޓަރ ވަނީ މަސްވެރިކަމުގެ އުޅަނދުތައް އެތައް ގުނައެއް އިތުރުވެފައިވާ ކަމަށާއި އުޅަނދުތަކަށް ބޭނުންވާ ވަރަށް އައިސްނުލިބުމުގެ މައްސަލައަކީ އޮތް ވަރަށް ބޮޑު މައްސަލައެއް ކަމަށް ވިދާޅުވެފައެވެ. މަސް ގެންނަން ބޭނުންވަނީ ތާޒާކަން މަތީގައި ކަމަށާއި އެހެންނަމަވެސް އުޅަނދުތަކަށް ބޭނުންވާ ވަރަށް އައިސް ނެތުމުން އެތާޒާކަން މަތީ މަސް ގެނައުމަށް ގޮންޖެހުންތަކާ ކުރިމަތިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިކަންތައް ހައްލުކުރުމަށް ބޭނުންވާ ފައިސާ މިހާރު ލިބިފައިވާ ކަމަށާއި މިއަހަރުގެ ތެރޭގައި 13 ވަރަކަށް އައިސްޕްލާންޓް ގާއިމްކުރެވިގެންދާނެ ކަމަށެވެ.
އޭގެ އިތުރުން ދޯނީގައި ފެން ފިނިކުރާނެ ނިޒާމް ގާއިމްކުރުމަށްޓަކައި އާރްއެސްޑަބްލިއު ހަރުކުރަން ލޯނުގެ ފުރުސަތު މި އަހަރުގެ ތެރޭގައި ހުޅުވިގެންދާނެ ކަމަށާއި މި ބަދަލުތަކާއިއެކު އައިސް ލިބުމުގެ ދަތިތަކަށް ވަރަށް ބޮޑު ހައްލެއް ލިބިގެންދާނެ ކަމަށް މިނިސްޓަރ ޒަހާ ވަނީ ވިދާޅުވެފައެވެ.
މީގެ އިތުރުން މިނިސްޓަރ ވަނީ މަސް ކިރުމުގައި ދިމާވާ ގޮންޖެހުންތަކަކީ މަސްވެރިންގެ ކަންބޮޑުވުން އޮތްކަމެއްކަން ފާހަގަކުރައްވާ މަސް ކިރުމަށް ކިއުގައި ޖެހިގެން ތިބެންޖެހޭ ތިބުން ކުޑަ ކުރުމަށް މަސައްކަތްކުރަމުން ދާކަން ފާހަގަކުރައްވާފައެވެ. އެގޮތުން މިފްކޯގެ ސްޓޯރޭޖް ކެޕޭސިޓީ އިތުރުކުރުމަށް މަސައްކަތްތައް މިހާރު ފެށިފައިވާކަން ފާހަގަކުރައްވާ މިނިސްޓަރ ވަނީ ފެލިވަރު އަދި ކޫއްޑޫގައި 4000 މެޓްރިކްޓަނުގެ ކެޕޭސިޓީ އިތުރުވެގެންދާނެ ކަމަށާއި މުލަކަށް 500 މެޓްރިކްޓަނުގެ ކެޕޭސިޓީ އަދި ތިނަދޫއަށް 1000 މެޓްރިކްޓަނުގެ ކެޕޭސިޓީ އިތުރުވެގެންދާނެ ކަމަށް ވިދާޅުވެފައެވެ.
މިނިސްޓަރ ވިދާޅުވީ މިހުރިހާ ކަމަކީ ރާއްޖޭގެ އެކި ކަންކޮޅުތަކުގައި އިންތިޒާމްކޮށް ހުރިހާ ސަރަހައްދެއްގައި މަސް ގަނެ ފިނިކުރެވޭނެ ނިޒާމް ގާއިމުކުރުމަށް ކުރެވޭ މަސައްކަތްކަމަށެވެ. އަދި ސަރުކާރުގެ އެއް ސިޔާސަތަކީ ރާއްޖެއިން މަސް ބޭރުކުރެވޭނީ އަގު އެއްކުރެވިގެން ކަމަށާއި މިނިސްޓްރީން މަސައްކަތް މިކުރަނީ އެއަމާޒަށް ވާސިލްވުމަށްޓަކައި ކަމަށެވެ.
މިނިސްޓަރ ވަނީ މި ތަރައްގީތައް ކުރެވޭއިރު، މަސްވެރި އާބާދީ ބޮޑު ސަރަހައްދުތަކުގައި މިފަދަ އިންތިޒާމްތައް ތަރައްގީކުރުމަށް މަސައްކަތްކުރާ ކަމަށާއި މ. އަތޮޅާއި ތިނަދޫ ފަދަ ރަށްތަކަށް ހާއްސަ ސަމާލުކަމެއް ދޭނެ ކަމަށް ވިދާޅުވެފައެވެ.
