މިއަދު ޕޮޒިޓިވްވީ 53 މީހުން، އެކްޓިވް ކޭސްތަކުގެ އަދަދު ހާހުން މަތީގައި!
21 ޖެނުއަރީ 2021 | ބުރާސްފަތި 17:43ރިސޯޓުތަކުން ޕޮޒިޓިވްވެފައި ވަނީ 17 މީހުން
ކޮވިޑް-19ގެ ރޭންޑަމް ސާމްޕަލިންގ ނަގަމުން ދަނިކޮށް
ފާއިތުވެދިޔަ 24 ގަޑިއިރު ރާއްޖެއިން 53 މީހުން ކޮވިޑް-19 އަށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން އެންމެ ފަހުން ހާމަކުރި ތަފާސް ހިސާބުތައް ދައްކާ ގޮތުން ބުދަ ދުވަހުގެ ހަވީރު 06:00 އިން ފެށިގެން ބުރާސްފަތި ދުވަހުގެ ހަވީރު 06:00 އާއި ހަމައަށް 2،541 މީހެއްގެ ގައިން ކޮވިޑްގެ ސާމްޕަލް ވަނީ ނަގައިފައެވެ. އަދި އޭގެ ތެރެއިން 53 މީހަކު ބައްޔަށް ޕޮޒިޓިވްވެފައިވާ ކަމަށް އެޗްޕީއޭގެ ތަފާސް ހިސާބުތަކުން ދައްކައެވެ.
ޕޮޒިޓިވްވެފައިވާ 53 މީހުންގެ ތެރެއިން 29 މީހުން މާލެ ސަރަހައްދުން ޕޮޒިޓިވްވެފައިވާއިރު، އަތޮޅުތެރެއިން 5 މީހަކު ވަނީ ޕޮޒިޓިވްވެފައެވެ. މީގެ އިތުރުން ރިސޯޓުތަކުން 17 މީހުން ޕޮޒިޓިވްވެފައިވާއިރު، އެކްޓިވް ކޭސްތަކުގެ އަދަދު އިތުރުވަމުން އަންނަ ރަށްތަކުގެ ތެރެއިން ރަށަކާއި، ރާއްޖެއިން ބޭރުން އެކަކު ވަނީ ބައްޔަށް ޕޮޒިޓިވްވެފައެވެ.
އެއާއިއެކު ރާއްޖެއިން މިހާތަނަށް ކޮވިޑަށް ޕޮޒިޓިވްވި މީހުންގެ އަދަދު މިވަނީ 14،765އަށް އަރައިފައެވެ. އަދި ބުރާސްފަތި ދުވަހު ޕޮޒިޓިވްވި 53 މީހުންނާއިއެކު އެކްޓިވް ކޭސްތަކުގެ އަދަދު 1،025އަށް އަރާފައިވާއިރު، ހޮސްޕިޓަލުގައި އެޑްމިޓްކޮށްގެން 74 މީހަކަށް އަންނަނީ ފަރުވާދެމުންނެވެ. ރާއްޖެއިން މިހާތަނަށް 13،683 މީހަކު ބަލިން ފަސޭހަވެފައިވާއިރު، 50 މީހަކު ވަނީ މި ބަލީގައި ނިޔާވެފައެވެ.
