ތިމާވެށި ރައްކާތެރި ކުރުމަށް ކުރަމުންދާ މަސައްކަތުގައި ސްޕެއިންގެ އެއްބާރުލުން ލިބޭނެ: ސްޕެއިން ރަސްގެފާނު

ދިވެހިރާއްޖޭގެ ފަތުރުވެރިކަމާއި ތިމާވެއްޓާއި އޮތީ ވަރަށް ގާތްގުޅުމެއް ކަމަށާއި ދުނިޔޭގެ ތިމާވެށި ރައްކާތެރިކުރުމަށް ކުރަމުންދާ މަސައްކަތުގައި ސްޕެއިންގެ އެއްބާރުލުން އެންމެ ފުރިހަމައަށް ލިބޭނެ ކަމަށް ސްޕެއިންގެ ރަސްގެފާނު ކިންގް ފިލިޕް ވިދާޅުވެއްޖެއެވެ.

ރަސްގެފާނު ފިލިޕް މިހެން ވިދާޅުވީ، ޔޫއެންޑަބްލިއުޓީއޯގެ 113 ވަނަ އެގްޒެކެޓިވް ކައުންސިލްގެ ބައްދަލުވުމުގައި ބައިވެރިވި ވަފުދުތަކުގެ ވެރިންނާ ވަކިވަކިން ބޭއްވެވި ބައްދަލުކުރެއްވުމުގައި ރާއްޖޭގެ ޓޫރިޒަމް މިނިސްޓަރު ޑރ އަބްދުﷲ މައުސޫމާއި ބައްދަލުކުރައްވާ ދެއްކެވި ވާހަކަފުޅުގައެވެ.

މެޑްރިޑްގެ ބާރޑޯ ޕެލެސްގައި ޖަނަވަރީ 18 ވަނަ ދުވަހު ހަވީރު ބޭއްވި މި ބައްދަލުވުމުގެ ބައިވެރިންނާއި މުޚާތަބުކޮށް ކިންގް ފިލިޕް ދެއްކެވި ވާހަކަފުޅުގައި އިންވެސްޓްމަންޓްތަކާއި ވަޒީފާގެ ފުރުޞަތު އިތުރުކުރުމަށް ފަތުރުވެރިކަމުގެ ސިނާޢަތުގެ މުހިއްމުކަން ފާހަގަ ކުރެއްވިއެވެ. އަދި މި ބައްދަލުވުމުގެ ބައިވެރިންނާއި ވަކިވަކިން ބައްދަލުކުރައްވާ އެގައުމުތަކާއި ގުޅޭ ގޮތުން ރަސްގެފާނު ވަނީ ވާހަކަފުޅުދައްކަވާފައެވެ.

އެގޮތުން ދިވެހިރާއްޖޭގެ ފަތުރުވެރިކަމަށް ތިމާވެއްޓާއި އޮތް ގާތްގުޅުން ފާހަގަ ކުރައްވާ ދުނިޔޭގެ ތިމާވެށި ރައްކާތެރިކުރުމަށް ކުރަމުންދާ މަސައްކަތުގައި ސްޕެއިންގެ އެއްބާރުލުން ލިބޭނެކަން ފާހަގަ ކުރެއްވިއެވެ.

މި ބައްދަލުކުރެއްވުމުގައި ޓޫރިޒަމް މިނިސްޓަރު ޑރ މައުސޫމް ވަނީ ރާއްޖޭގެ ފަތުރުވެރިކަން ތަރައްޤީކުރުމުގައި ގެންގުޅޭ ދެމެހެއްޓެނިވި ތަރައްޤީގެ ސިޔާސަތާއި ގުޅޭ މަޢުލޫމާތު ރަސްގެފާނާއި ޙިއްސާކުރައްވާފައެވެ.

މި ބައްދަލުވުމުގައި ޔޫ.އެން.ޑަބުލިއު.ޓީ.އޯ ގެ ސެކްރެޓަރީ ޖެނެރަލް މިސްޓަރ ސޫރަޖް ޕޮލޮލިކަޝްވިލީ އާއި ސްޕެއިންގެ ޓޫރިޒަމް މިނިސްޓަރ ރެއިސް މަރޯތޯވެސް ވަނީ ވާހަކަފުޅުދައްކަވާފައެވެ.

ކޮވިޑް-19 ގެ ސަބަބުން ދުނިޔޭގެ ފަތުރުވެރިކަމަށް ކުރިމަތިވެފައިވާ ގޮންޖެހުންތަކަށް ހައްލު ހޯދައި، މައުނަވީ ގޮތެއްގައި ފަތުރުވެރިކަން އަލުން ފެށުމަށް މަޝްވަރާކުރުމަށް ބޭއްވި އެ ބައްދަލުވުމުގައި ކޮވިޑް-19 އަށް އުފައްދާފައިވާ ވެކްސިންތައް ދުނިޔޭގެ އާބާދީގެ ބޮޑު ބަޔަކަށް ބޭނުންކުރެވި، ވެކްސިން ޖެހިކަމުގެ ސެޓުފިކެޓް ހިފައިގެން އެއް ގައުމުން އަނެއް ގައުމަށް ދަތުރުކުރެވޭނެ މަގުފަހިވުމަކީ ފަތުރުވެރިކަން އަލުން ފެށުމަށް ކޮންމެހެންވެސް ބޭނުންކަމެއްގެ ގޮތުގައި ބައްދަލުވުމުގައި ބައިވެރިވި ގިނަ މެންބަރުން ވަނީ ފާހަގަކޮށްފައެވެ.

ގްލޯބަލް ޓޫރިޒަމް ކްރައިސަސް ކޮމިޓީއަކީ ކޮވިޑް-19 އާގުޅިގެން ދުނިޔޭގެ އެކި ގައުމުތަކުގެ ފަތުރުވެރިކަމަށް ދިމާވާނެ ކަންކަން ދިރާސާކޮށް، ޖުމްލަ ހައްލެއް ގެނައުމަށްޓަކައި ޔޫއެންޑަބްލިއުޓީއޯއިން އެކުލަވާލި ކޮމިޓީއެކެވެ.