އަދިވެސް ސުޕަ ޔުނައިޓެޑް ސްޕޯޓްސް (ސަސް) ގެ އަމާޒަކީ ގަދަ ހައެއްގައި ލީގު ނިންމާލުން ކަމަށް އެ ޓީމުގެ ކޯޗުގެ މަގާމާ ދާދި ފަހުން ހަވާލުވި މުޙައްމަދު ޝިޔާޒް (މޯހަން) ބުނެފިއެވެ.

މި ސީޒަނުގެ ފުރަތަމަ ޑިވިޝަނުގައި މުޅިން އަލަށް ވާދަކުރަމުން އަންނަ ސަސްއިން ސީޒަނާ ކުރިމަތިލީ ގަދަ ހައެއްގައި ލީގު ނިންމާލަން އަމާޒުހިފައިގެންނެވެ. އެގޮތުން އެ ޓީމުގެ ކުރީގެ ކޯޗު އަޙްމަދު ނާޝިދު (ނާދު) ގެ އިރުޝާދުގެ ދަށުން ސަސްއިން މި ސީޒަނުގައި މޮޅު ކުޅުމެއް ދެއްކިއިރު، ދިރާގު ދިވެހި ޕްރިމިއާ ލީގުގައި މިހާތަނަށް ކުޅުނު ހަ މެޗުން ސަސް ބަލިވެފައިވަނީ އެންމެ މެޗަކުންނެވެ. އެއީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަތުންނެވެ.

އެކަމަކު ދެ ފަރާތް އެއްބަސްވެގެން ނާދުގެ އެއްބަސްވުން އުވާލައި، ދާދި ފަހުން ސަސްއިން ވަނީ އެ ޓީމުގެ ކޯޗަކަށް މޯހަން ހަމަޖައްސާފައެވެ. މޯހަން ސަސްގެ ކޯޗުގެ މަގާމާ ހަވާލުވިއިރު، އެ ޓީމު އޮތީ ތާވަލުގެ ފަސްވަނައިގައި ކުޅުނު ހަ މެޗުން ލިބުނު ހަތް ޕޮއިންޓާއެކުއެވެ.

ލީގުގައި ބުރާސްފަތި ދުވަހުގެ ހަވީރު ކުލަބު ވެލެންސިއާއާ ދެކޮޅަށް ނުކުތުމުގެ ކުރިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މޯހަން ބުނީ ނާދުއާއެކު ސަސްއިން މިހާތަނަށް ރަނގަޅު ނަތީޖާތަކެއް ނެރެފައިވާ ކަމަށާއި، އެ މަސައްކަތް ވަރަށް ފުރިހަމަ ކަމަށެވެ. އެކަމަކު ސަސްގެ މެނޭޖުމަންޓުން އޭނާއާ ހަވާލުކުރީ ދިގު މުއްދަތުގެ މަޝްރޫއެއް ކަމަށާއި، އެގޮތުން ޓީމުގެ ބައެއް ކަންތައްތައް ބަދަލުކޮށް، ޓީމުގެ ކުޅުން ރީތި ކުރުމަށްވެސް މަސައްކަތްކުރާނެ ކަމަށްވެސް މޯހަން ބުންޏެވެ.

މޯހަން އިތުރަށް ބުނީ ކޯޗު ބަދަލުވި ނަމަވެސް، އަދިވެސް ސަސްގެ އަމާޒަކީ މި ސީޒަނުގެ ގަދަ ހައެއް ހޯދުން ކަމަށެވެ. އަދި އެއާއެކުވެސް މެނޭޖުމަންޓުގެ އެންމެ ބޮޑު އެދުމަކީ މި ސީޒަނުގައި ޓީމުގެ ކުޅުން ވީހާވެސް ބޮޑަށް ބަދަލުކުރުން ކަމަށްވެސް މޯހަން ވަނީ ބުނެފައެވެ.

ސަސްއާ ދެކޮޅަށް ވެލެންސިއާ ނުކުންނައިރު، އެ ޓީމު ވަނީ އެންމެ ފަހުން ކުޅުނު މެޗުން ދަ ގްރާންޑޭ ސްޕޯޓްސް ކުލަބު އަތުން 2-1 ގެ ނަތީޖާއަކުން ބަލިވެފައެވެ. މިއީ ލީގުގައި ވެލެންސިއާ ބަލިވި ފުރަތަމަ މެޗެވެ.

ސަސް މެޗުގެ ކުރިން ވެލެންސިއާގެ ކޯޗު މުޙައްމަދު އާތިފް (އާތީ) ބުނީ ލީގުގައި ބައްޔަކަށްފަހު އަންނައިރު، އެންމެ މުހިންމު ކަމަކީ ކުރިއަށް އޮތް މެޗަށް ކުޅުންތެރިން މެންޓަލީ ތައްޔާރުވުން ކަމަށެވެ. އަދި ކުޅުންތެރިންގެ ކުޅުމުގެ ފެންވަރު ހުންނާނީ އެއް ހަމައެއްގައި ކަމަށާއި، މިދިޔަ މެޗުން ބަލިވިއިރު، އެކަމުގެ ސަބަބުން އަސަރުކުރާނީ އެ ކުޅުންތެރިން ސައިކޮލޮޖިކަލީ ތައްޔާރުވެފައި ތިބި މިންވަރަކަށް ކަމަށްވެސް އާތީ ބުންޏެވެ. އެހެންކަމުން މިއީ ވެލެންސިއާގެ ކޯޗުންނަށްވެސް އައު ތަޖުރިބާއަކަށް ވެގެންދާނެ ކަމަށްވެސް އާތީ ވަނީ ބުނެފައެވެ.

ލީގުގައި މިހާތަނަށް ވެލެންސިއާ އެންމެ މެޗަކުން ބަލިވެފައިވާއިރު، އެ ޓީމު އޮތީ ތާވަލުގެ ދެވަނައިގައި ކުޅުނު ހަ މެޗުން ލިބުނު 11 ޕޮއިންޓާއެކުއެވެ. އެއްވަނައިގައި އޮތް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ވަނީ ހަ މެޗުން 14 ޕޮއިންޓް ލިބިފައެވެ.

ދިރާގު ދިވެހި ޕްރިމިއާ ލީގުގައި ވެލެންސިއާ އާއި ސަސް ބައްދަލުކުރާ މެޗު ފަށާނީ ބުރާސްފަތި ދުވަހުގެ ހަވީރު 16:00 ގައެވެ.