އިންޑިއާއިން ބޫޓަންއަށް ވެކްސިންގެ ޝިޕްމަންޓް ފޮނުވަން ފަށައިފި

އިންޑިއާއިން ބޫޓަންއަށް ވެކްސިންގެ ޝިޕްމަންޓް ފޮނުވަން ފަށައިފިއެވެ.

އިންޑިއާގެ ފޮރިން މިނިސްޓްރީގެ ސްޕޯކްސްޕާސަން އަނޫރާގް ސްރީވާސްތަވާ ވިދާޅުވީ ވެކްސިންގެ ފުރަތަމަ ޝިޕްމަންޓް ބޫޓަންއަށް ފޮނުވާފައިވާ ކަމަށާއި, އިންޑިއާއިން އަވަށްޓެރި ޤައުމުތަކަށާއި ކީ ޕާޓްނަރ ޤައުމުތަކަށް ވެކްސިން ފޮނުވުމުގެ މަސައްކަތް މިހާރު ފަށާފައިވާ ކަމަށެވެ.

ދުނިޔޭގައި އެންމެ ބޮޑު ވެކްސިން އުފައްދާ ޤައުމު އިންޑިއާއިން ދިވެހިރާއްޖެ، ބޫޓާން، ނޭޕާލް މިޔަންމާ އަދި ސީޝެލްސްއަށް ވެކްސިން ފޯރުކޮށްދިނުމަށް ހަމަޖެހިފައިވެއެވެ.

އިންޑިއާއިން ވަނީ ދުނިޔޭގައި ކުރިއަށްގެންދެވޭ އެންމެ ބޮޑު ވެކްސިންދިނުމުގެ ޕްރޮގްރާމް އެ ގައުމުގައި ފަށާފައެވެ. އިންޑިއާގެ 1.3 ބިލިއަން މީހުންގެ މުޅި އާބާދީއަށް ވެކްސިންދިނުމުގެ އަމާޒުގައި އެގައުން ވެކްސިނޭޝަން ޕްރޮގްރާމް ފަށާފައިވާ އިރު، އެގައުމުގެ ގިނަ އަދަދެއްގެ ފާމަސޫޓިކަލް ކުންފުނިތަކަކުން ދަނީ ވެކްސިން އުފެއްދުމުގެ މަސައްކަތްކުރަމުންނެވެ.

އިންޑިއާގެ އެކްސްޓަރނަލް އެފެއަރޒް މިނިސްޓަރ ސުބްރަމާނިޔަމް ޖައިޝަންކަރު ވަނީ އިންޑިއާގެ އެކި ހިސާބުތަކަށް ވެކްސިން ފޯރުކޮށްދެވުމާ އެކު، އެހެން ގައުމުތަކަށް ވެކްސިން ފޯރުކޮށްދިނުމުގެ މަސައްކަތް އެގައުމުން ފަށާނެ ކަމަށް ވިދާޅުވެފައެވެ.

އިންޑިއާއިން ވަނީ މިހާތަނަށް އައި އިރު ކޮވިޑްގެ ދެ ވެކްސިނެއް އެ ގައުމުގައި ބޭނުންކުރުމުގެ ހުއްދަ ދީފައެވެ. އެއީ އެގައުމުގެ ފާމަސޫޓިކަލް ކުންފުންޏެއް ކަމަށްވާ ބާރަތް ބައޯޓެކް އިން ކޮވިޑް-19 އަށް އުފެއްދި ވެކްސިނާއި ސިރަމް އިންސްޓިޓިއުޓުން އުފައްދާ އެސްޓްރަޒެނެކާ އާއި އޮކްސްފޯޑް ޔުނިވާސިޓީގެ ކޮވިޑް ވެކްސިނެވެ. ސެރަމް އިންސްޓިޓިއުޓުން ވަނީ އެކުންފުނިން އުފައްދާ ވެކްސިން އެމަޖެންސީކޮށް ބޭނުންކުުރުމުގެ ހުއްދަދިނުމަށް އެދި ދުނިޔޭގެ ސިއްޙަތު ޖަމިއްޔާއަށް މިހާރު ހުށަހަޅާފައެވެ.