ސްޕެނިޝް ސުޕަ ކަޕުގެ ފައިނަލުގައި އެތުލެޓިކް ބިލްބާއޯ އަތުން 3-2 ން ބާސެލޯނާ ބަލިވި މެޗުގައި އެ ޓީމުގެ ކެޕްޓަން ލިއޮނެލް މެސީއަށް ދެއްކި ރަތް ކާޑާ ގުޅިގެން، އޭނާ ދެ މެޗަށް ސަސްޕެންޑް ކޮށްފިއެވެ.

އާދީއްތަ ދުވަހުގެރޭ ކުޅުނު މެޗުގެ އިތުރު ވަގުތުގެ ދެވަނަ ހާފުގެ ފަހުކޮޅުގައި މެސީއަށް ވަނީ ސީދާ ރަތް ކާޑެއް ދައްކާފައެވެ. އޭނާއަށް ރަތް ކާޑު ދެއްކީ ބޯޅަ ނެތިސް ބިލްބާއޯގެ އެސިއާ ވިޔަލިބްރޭއަށް އަތުން ހަމަލާދިނުމުން، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހުއެވެ. މިއީ ބާސާގެ މެޗެއްގައި މެސީއަށް ރަތް ކާޑެއް ދެއްކި ފުރަތަމަ ފަހަރެވެ.

މި ރަތް ކާޑާ ގުޅިގެން ސްޕެނިޝް ފުޓްބޯލް ފެޑެރޭޝަނުން ވަނީ މެސީ ދެ މެޗަށް ސަސްޕެންޑް ކުރަން ނިންމާފައެވެ. އެހެންކަމުން މި ސަސްޕެންޝަނާއެކު ސްޕެނިޝް ކަޕުގައި ކޯނެއްޔާ އާއި ސްޕެނިޝް ލީގުގައި އެލްޗޭއާ ދެކޮޅަށް ބާސާ ކުޅެން އޮތް މެޗުތައް ގެއްލޭނެއެވެ. އެކަމަކު ބާސާއިން ވަނީ މެސީއަށް ދިން ދެ މެޗުގެ ސަސްޕެންޝަން އިސްތިއުނާފުކުރަން ނިންމާފައެވެ.

ބާސާގެ މެޗެއްގައި މެސީއަށް ފުރަތަމަ ފަހަރަށް ރަތް ކާޑެއް ދެއްކިއިރު، މީގެ ކުރިން ދެ ފަހަރެއްގެ މަތިން އޭނާއަށް ވަނީ ރަތް ކާޑު ދައްކާފައެވެ. އެ ދެ ރަތް ކާޑަކީވެސް އާޖެންޓީނާގެ ގައުމީ ފުޓްބޯޅަ ޓީމަށް ކުޅުނު ދެ މެޗެއްގައި މެސީއަށް ދެއްކި ރަތް ކާޑުތަކެވެ.

ސްޕެނިޝް ފުޓްބޯލް ފެޑެރޭޝަނުން ދިން ސަސްޕެންޝަނާއެކު މެސީއަށް ބާސާއިން ކުޅޭ ދެ މެޗެއް ގެއްލޭއިރު، ސްޕެނިޝް ލީގުގައި މި ވަގުތު ބާސާ އޮތީ ތާވަލުގެ ތިންވަނައިގައެވެ. އެގޮތުން ކުޅުނު 18 މެޗުން ބާސާއަށް ލިބިފައިވަނީ 34 ޕޮއިންޓެވެ.