މާލޭ ލީގުގެ ގަދަ ހަތަރަކަށް އަރަން ބޭނުންވާ ނަމަ ޔުނައިޓެޑް ވިކްޓްރީއާ ދެކޮޅަށް ވިކްޓްރީ ސްޕޯޓްސް ކްލަބް ކުޅޭ މެޗުގެ ތިން ޕޮއިންޓް މަޖުބޫރު ކަމަށް އެ ކްލަބުގެ ކޯޗު އަލީ ސުޒެއިން ބުނެފި އެވެ.

މެޗުގެ ކުރިން އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސުޒެއިން ބުނީ ޔޫވީއާ ދެކޮޅަށް ނިކުންނަ މެޗުގައި ތިން ޕޮއިންޓް ނުހޯދިއްޖެ ނަމަ ގަދަ ހަތަރަކަށް އަރާ ވާހަކަ ހުއްޓާލުމަށްފަހު މި ބުރު ހަމައެކަނި ޖެހޭނީ ކުޅެލަން ކަމަށެވެ.

އެގޮތުން ސުޒެއިން ބުނީ މިއީ ވަރަށް މުހިންމު ތިން ޕޮއިންޓް ކަމަށާއި، މި ތިން ޕޮއިންޓަކީ ވިކްޓްރީ އަށް ހޯދަން މަޖުބޫރު ތިން ޕޮއިންޓް ކަމަށެވެ. މީގެ އިތުރުން އޭނާ ބުނީ އެ ތިން ޕޮއިންޓް ހޯދަން ވިކްޓްރީން ވަރަށް ބުރަކޮށް މަސައްކަތްކުރަން ޖެހޭ ކަމަށެވެ.

ވިކްޓްރީއަށް ފަސޭހަކޮށްލައިގެން ވާނެ އެއްވެސް ގޮތެއް ނެތް ކަމަށް ފާހަގަކުރަމުން ސުޒެއިން ބުނީ ރަނގަޅު މެޗެއް ކުޅެލުމަށް ފަހު ޕްރެޝާ މެޗަކަށް ނިކުންނައިރު ގޮންޖެހުންތަކެއް ކުރިމަތިވެފައިވާ ކަމަށެވެ. އެގޮތުން އޭނާ ބުނީ ފުރަތަމަ އެގާރާގައި ހިމެނިގެން ކުޅޭ ރައިޓް ބެކް އަދި ބިދޭސީ ކުޅުންތެރިޔާ ވެލިޗްކޯއަށް ޔޫވީ މެޗުގައި ނުކުޅެވޭނެ ކަމަށެވެ.

ވިކްޓްރީގެ މިޑްފިލްޑަރު މުހައްމަދު އާރިފް (ބަކާ) އަށް ތައުރީފްކުރަމުން ސުޒެއިން ބުނީ ބަކާއަކީ ރާއްޖޭގައި މިވަގުތު ކުޅެމުންދާ އެންމެ މޮޅު މިޑްފިލްޑަރު ކަމަށާއި، އެގޮތުން މާޒިޔާ އަތުން ވިކްޓްރީ މޮޅުވި މެޗުގައި ވެސް އެންމެ ނުފޫޒް ގަދަ ކުޅުންތެރިޔަކަށް ފެނިގެންދިޔައީ ބަކާކަން އޭނާ ވަނީ ފާހަގަކޮށްފައެވެ.

މީގެ އިތުރުން ސުޒެއިން ބުނީ ބަކާ ގައުމީ ޓީމަށް ނަގާނެ ކަމަށް އޭނާ އުންމީދުކުރާ ކަމަށެވެ. އެގޮތުން އޭނާ ބުނީ އެއްވެސް މީހަކު ގައުމަށް ވުރެ ބޮޑު ނުވާނެ ކަމަށާއި، ދިވެހި ރާއްޖެއަށް ފައިދާ ވާނީ ބަކާ ގައުމީ ޓީމުގައި ހިމެނިގެން ކަމަށެވެ.

މާލޭ ލީގުގެ ޕޮއިންޓް ތާވަލަށް ބަލާއިރު، ވިކްޓްރީ ވަނީ އެޓީމު ކުޅުނު އަށް މެޗުން 11 ޕޮއިންޓް ހަމަކޮށް ޕޮއިންޓް ތާވަލުގެ ހަ ވަނައިގައެވެ. އެޓީމު ވަނީ ކުޅުނު އަށް މެޗުގެ ތެރެއިން ތިން މެޗު ކާމިޔާބުކޮށް ދެ މެޗު އެއްވަރުކޮށްފައެވެ. ބާކީ ތިން މެޗުން އެޓީމު ވަނީ ބަލިވެފައެވެ.