ބޭރު ޤައުމުތަކުން އަންނަ އުޅަނދުފަހަރުގެ މުދަލާ ގުޅުންނެތް ވަކި ޚިދުމަތްތަކެއް ފޯރުކޮށްދިނުމަށް ސެކަންޑްރީ ޝިޕިންގ އޭޖެންޓް ނުވަތަ ހަޒްބެންޑަރީ އެޖެންޓުން ޢައްޔަންކުރެވޭގޮތަށް ހަމަޖައްސައިފިއެވެ.

މޯލްޑިވްސް ކަސްޓަމްސް ސަރވިސްއިން ވަނީ ރާއްޖެއަށް އަންނަ އަދި ރާއްޖެއިން ފުރާ އުޅަނދުފަހަރުގެ ކަންކަން ބެލެހެއްޓުމަށް ޢައްޔަންކުރެވޭ ޝިޕިންގ އެޖެންޓުންގެ އިތުރުން، އުޅަނދުފަހަރުގެ ވެރިފަރާތުން ނުވަތަ މާސްޓަރ ބޭނުންވެއްޖެނަމަ، މުދަލާ ގުޅުންނެތް ވަކި ޚިދުމަތްތަކެއް ފޯރުކޮށްދިނުމަށް، 15 ފެބުރުއަރީ 2021 އިން ފެށިގެން، ސެކަންޑްރީ ޝިޕިންގ (ހަޒްބެންޑަރީ އެޖެންޓް) އެޖެންޓުން ޢައްޔަންކުރެވޭގޮތަށް ހަމަޖައްސައިފައިވާކަން ހާމަކޮށްފައެވެ.

މިގޮތުން، ސެކަންޑަރީ ޝިޕިންގ އެޖެންޓް ޚިދުމަތުގެ ގޮތުގައި ކުރަން އެއްބަސްވާ ކަންކަން ފޯރުކޮށްދެވޭނީ ހަމައެކަނި ސެކަންޑަރީ ޝިޕިންގ އެޖެންޓަށެވެ. އަދި ސެކަންޑަރީ ޝިޕިންގ އެޖެންޓް ފޯރުކޮށްދިނުމަށް އެއްބަސްވާ ޚިދުމަތްތައް އަދާކުރުމުގައި ކަސްޓަމްސްގެ ޤާނޫނާ ގަވާއިދާޚިލާފަށް އެފަރާތުން ހިންގާކަންކަމަށް ޒިންމާވާނީ ސެކަންޑަރީ ޝިޕިންގ އެޖެންޓެވެ.

ސެކަންޑަރީ ޝިޕިންގ އެޖެންޓުން ޢައްޔަންކުރުމުގައި އަމަލުކުރާނެގޮތް ވެސް ކަސްޓަމްސްއިން ވަނީ ހާމަކޮށްފައެވެ. ސެކަންޑްރީ ޝިޕިންގ އެޖެންޓް ޢައްޔަންކުރެވޭނީ ކަނޑައެޅިފައިވާ ވަކި ޚިދުމަތްތަކެއް ފޯރުކޮށްދިނުމަށް، ސެކަންޑަރީ ޝިޕިންގ އެޖެންޓް ހަމަޖެއްސިކަން ބަޔާންކޮށް އުޅަނދުގެ ވެރިފަރާތުގެ ނުވަތަ މާސްޓަރގެ ލިޔުމަކާއެކު "ސެކަންޑްރީ ޝިޕިންގ އެޖެންޓަކަށް ޢައްޔަނުވުމަށް އެދޭ ފޯމް" ފުރުމައްފަހު މޯލްޑިވްސް ކަސްޓަމްސް ސަރވިސްއަށް ހުށަހެޅުމުންނެވެ. ސެކަންޑަރީ ޝިޕިންގ އެޖެންޓްގެ ގޮތުގައި ޢައްޔަންކުރެވޭ ފަރާތަކީ ޝިޕިންގ އެޖެންޓެއްގެ ގޮތުގައި ކަސްޓަމްސްގައި ރަޖިސްޓްރީވެފައިވާ ފަރާތަކަށް ވާންޖެހޭނެއެވެ. ސެކަންޑަރީ ޝިޕިންގ އެޖެންޓްގެ ގޮތުގައި ޢައްޔަންކުރެވޭނީ އުޅަނދުގެ ކްރޫ ޗޭންޖް، ގާބޭޖް ކްލީނިންގ، ރިޕެއަރ، ތެލާއި، ފެނާއި ކާބޯތަކެތި އެރުވުމާއި، ހަތިޔާރާއި، ބޯޓުފަހަރުގައި ހަތިޔާރު ބަލަހައްޓާ ފަރާތްތައް (އާމްޑް ގާޑްސް) ފަދަ އިމްޕޯޓް އަދި އެކްސްޕޯޓް މުދަލާ ގުޅުންނެތް ޚިދުމަތްތަކަށެވެ.

ސެކަންޑްރީ އެޖެންޓްގެ ގޮތުގައި ޢައްޔަންވުމަށް ހުށަހަޅާއިރު، އެފަރާތް ސެކަންޑަރީ ޝިޕިންގ އެޖެންޓްގެ ގޮތުގައި ޢައްޔަންކުރިކަން ބަޔާންކުރާ އުޅަނދުގެ ވެރިފަރާތުގެ ނުވަތަ މާސްޓަރ ނުވަތަ ޕްރިންސިޕަލްގެ ލިޔުން ހުށަހަޅަންވާނެއެވެ. އުޅަނދުގެ ކޮންމެ ބައިނަލްއަޤްވާމީ ދަތުރަކަށް ޢައްޔަންކުރެވޭނީ 1 ސެކަންޑްރީ ޝިޕިންގ އެޖެންޓެވެ. ސެކަންޑްރީ ޝިޕިންގ އެޖެންޓް ބަދަލުކުރަން ޖެހިއްޖެނަމަ، އެކަންކުރާނީ ކަސްޓަމްސްގެ ޢާންމު ޤަވާއިދުގައި ޝިޕިންގ އެޖެންޓް ބަދަލުކުރުމަށް އެކަށައެޅިފައިވާ ގޮތުގެ މަތީންކަމަށް ކަސްޓަމްސްއިން ވަނީ ބުނެފައެވެ.