ަހު ހާފުގައި އަސަދުﷲ އަބްދުﷲ ކާމިޔާބުކޮށްދިން ހަމައެކަނި ލަނޑާއެކު ޔުނައިޓެޑް ވިކްޓްރީ (ޔޫވީ) 0-1 އިން ބަލިކޮށް އެސްޓީއޯ މާލޭ ލީގުގެ ދެވަނަ މަގާމުގައި މާޒިޔާ ސްޕޯޓްސް އެންޑް ރެކްރިއޭޝަން ކްލަބު ހަމަޖެހިލައިފިއެވެ.

މިނަތީޖާއާއެކު މާޒިޔާ ދެވަނައިގައި އޮތީ އެއްވަނައިގައިވާ ނިއު ރޭޑިއަންޓާ އެއްވަރަށް ޕޮއިންޓް ހޯދައިގެން 15 ޕޮއިންޓާއެކު އެވެ. ނިއު އަށް ވެސް މިއަދަދަށް ޕޮއިންޓް ލިބުނު ނަމަވެސް އެޓީމު އެއްވަނައިގައި އޮތީ ޖެހި ގޯލުގެ ފައިދާއާ އެކުއެވެ. މެޗުން ބަލިވި ޔޫވީ އޮތީ 3 ޕޮއިންޓާއެކު އަދިވެސް ލީގުގެ ހަވަނައިގައެވެ.

ގަލޮޅު ރަސްމީ ބޯޅަ ދަނޑުގައި ހޮނިހިރު ދުވަހު ހަވީރު ކުޅުނު މެޗުގައި ޔޫވީގެ ފަރާތުން އޯގަނައިޒިން ފުޓުބޯޅައެއް ކުޅުނުތަން ފެނިގެންދިޔައިރު އެޓީމުން ވަނީ މާޒިޔާގެ ހާފަށް ބާރުބޮޑުކޮށްފައެވެ. އެހެން ނަމަވެސް މާޒިޔާއިން ވެސް ވަނީ ޔޫވީގެ ހާފަށް ބާރުބޮޑުކޮށް ޔޫވީގެ ގޯލާ އަމާޒުކޮށް ހަމަލާތަކެއް އުފައްދާފައެވެ.

ފުރަތަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިހާފުގައި ލަނޑު ޖެހުމަށް ހުސް ފުރުސަތުތަކެއް ލިބިގެންދިޔައީ މާޒިޔާ އަށެވެ. އެހެން ނަމަވެސް އަސައްކޮ އަދި އަހުމަދު އިމާޒް (އާއްކޮ) އާއި މުހައްމަދު އުމެއިރަށް ލިބުނު ފުރުސަތުތައް އެންމެ އެކަށީގެންވާ ގޮތުގައި ބޭނުން ނުކުރެވުނުކަން ފާހަގަކޮށްލެވެއެވެ.

މެޗުގެ ދެވަނަ ހާފު ފެށިގެން މާޒިޔާއިން ވަރުގަދަކޮށް ފެށިއިރު އެޓީމުން ވަނީ މިހާފުގައި ޔޫވީގެ ހާފަށް އިތުރަށް ބާރުބޮޑުކުރަން ފަށާފައެވެ. އެގޮތުން ބަދަލު ކުޅުންތެރިއެއްގެ ގޮތުގައި ކުޅެން ނުކުތް ހުސައިން ނިޔާޒް މުހައްމަދު (ބޮކުރީ)ގެ ފަރާތުން ވަނީ މޮޅު ކުޅުމެއް ފެނިގެންގޮސްފައެވެ. އޭނާވަނީ ދެވަނަ ހާފުގެ ފަހު 10 ވަރަކަށް މިނެޓުތެރޭގައި ކަނާތް ފަރާތު އަރިމަތިން ގިނަ ހުރަސްތަކެއް ޔޫވީގެ ގޯލުގެ ކުރިމައްޗަށް ހުރަސްކޮށްފައެވެ. ނަތީޖާއެއްގެ ގޮތުން 80 ވަނަ މިނެޓުގައި ބޮކުރީ ހުރަސްކޮށްލި ބޯޅައެއް ސީދާ އެއްފަހަރުންޖަހާ އަސައްކޮ ވަނީ މެޗުގައި ފެނިގެންދިޔަ ހަމައެކަނި ލަނޑު ކާމިޔާބުކޮށްފައެވެ.

މިލަނޑަށްފަހު ވެސް މާޒިޔާއަށް ވަނީ އިތުރު ލަނޑެއް ޖެހުމަށް ފުރުސަތުތަކެއް ލިބި ބޭކާރުވެފައެވެ.