ކޮވިޑް-19 ގެ ވެކްސިން ޖެހުމަށް ރަޖިސްޓްރީ ވުމުގެ ފުރުސަތު ހޯމަ ދުވަހުން ފެށިގެން ހުޅުވާލާނެކަމަށް ހެލްތް ޕްރޮޓެކްޝަން އޭޖެންސީ (އެޗްޕިއޭ) އިން ހާމަކޮށްފިއެވެ.
ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވީ، ރާއްޖޭގައި ވެސް ކޮވިޑް ވެކްސިން ޖެހުމަށްޓަކައި ވާންޖެހޭ ތައްޔާރީތައް ކަމާބެހޭ ފަރާތްތަކުން ވަމުންދާ ކަމަށެވެ. އަދި ވެކްސިން ޖަހަން އިސްކަންދޭނެ ފަރާތްތައް ކަނޑައަޅައި، އެ ފަރާތްތަކުގެ މައުލޫމާތު އެއްކުރުމަށް ކުރަމުންދާ މަސައްކަތުގެ ދަށުން ޕޯރޓަލްއެއް މެދުވެރިކޮށް އެ މަސައްކަތް ކުރެވޭނެ އިންތިޒާމު ހަމަޖައްސާފައިވާކަން ޑރ ނަޒްލާ ފާހަގަ ކުރެއްވިއެވެ. އެގޮތުން ފުރަތަމަ އިސްކަންދެއްވާނީ ސިއްހީ ހިދުމަތްތެރިންނަށް ކަމަށް ވެސް ޑރ. ނަޒްލާ ވިދާޅުވިއެވެ.
ޑރ ނަޒްލާ ވަނީ ވެކްސިން ޖެހުމުގައި އިސްކަންދޭނެ ތަރުތީބު ގޮތުގައި ކަނޑައަޅައި އާންމު ކޮށްފައިވާ ގިންތީގައި ހިމެނޭ ހުރިހާ އެންމެންވެސްމައި.ހެލްތް.އެމްވީވެބްސައިޓް މެދުވެރިކޮށް ރަޖިސްޓަރ ވުމަށް އެދިވަޑައިގަންނަވާފައެވެ. އެގޮތުން ހޯމަ ދުވަހުން ފެށިގެން ރަޖިސްޓަރ ވުމަށް ފުރުސަތު ހުޅުވާލާނެއެވެ.
މި ވެބްސައިޓް މެދުވެރިކޮށް ރަޖިސްޓަރ ވުމަށްޓަކައި އެމީހެއްގެ މައުލޫމާތު ވެބްސައިޓްގެޕޯޓަލްގައިހިމަނަން ޖެހެއެވެ. އަދި އެ މައުލޫމާތުތައް ކަށަވަރު ކުރުމަށްޓަކައި ރަޖިސްޓަރ ވުމަށްފަހު، ފޯނަށް އަންނަ "އޯޓީޕީ" ކޯޑް ޖެހުމުން، އެޗްޕީއޭއިން ރަޖިސްޓްރޭޝަންގެ ކަންކަން ބަލަމުން ގެންދާނެއެވެ.
ރާއްޖެއަށް ކޮވިޑް-19 ވެކްސިން ގެނައުމާއި ގުޅޭގޮތުން މިނިސްޓަރ އޮފް ހެލްތް އަހްމަދު ނަސީމް ވަރލްޑް ހެލްތް އޯގަނައިޒޭޝަން (ޑަބްލިއުއެޗްއޯ) ގެ ޑިރެކްޓަރ ޖެނެރަލްއާއި ޑަބްލިއުއެޗްއޯގެ ސައުތް އީސްޓް އޭޝިއާ ރީޖަންގެ ޑިރެކްޓަރ ޖެނެރަލްއާއި ބައްދަލު ކުރައްވާ ނިމިގެންދިޔަ ޑިސެމްބަރު މަހުގެ 25 ވަނަ މަޝްވަރާ ކުރައްވާފައިވެއެވެ.
ވެކްސިން ހޯދުމުގެ މަސައްކަތުގައި މިހާރު ކޮވެކްސް ފެސިލިޓީން ރާއްޖޭގެ އާބާދީގެ 20 އިންސައްތައަށް ހިލޭ ވެކްސިން ހޯދުމަށް ހުށައެޅި ހުށައެޅުން ރަސްމީކޮށް ޑަބްލިޔުއެޗްއޯއިން ވަނީ ގަބޫލުކޮށްފައެވެ. ކޮވެކްސް ފެސިލިޓީގެ ދަށުން ރާއްޖެއަށް އެންމެ ފުރަތަމަ ވެކްސިން ލިބޭނީ އާބާދީގެ ދެ ލައްކަ މީހުންނަށެވެ. އަދި ކޮވެކްސް ފެސިލިޓީގެ ދަށުން ރާއްޖެއަށް ލިބޭ ވެކްސިނެއްގެ ހަތަރު ލައްކަ ޑޯޒް ލިބޭނެ ކަމަށް ވަނީ މައުލޫމާތު ލިބިފައެވެ.
މިމަހުގެ ފަހުކޮޅު ވެކްސިން ލިބޭނެކަން ޔަގީންވެފައިވާއިރު ދިވެހި ސަރުކާރާއި ސިންގަޕޫރުގެ ކުންފުންޏެއް ކަމުގައިވާ އެސްޓްރާޒެނެކާ ސިންގަޕޯރ ޕްރައިވެޓް ލިމިޓެޑާ ދެމެދު އެއްބަސްވުމެއްގައި ސޮއިކުރުމަށް ވެސް ވަނީ ނިންމާފައެވެ. އަދި މިކަމަށް މާލިއްޔަތު ގަވާއިދަށް ބަދަލެއް ގެނައުމަށް ވަނީ ނިންމާފައެވެ.
