ޖިހާދު ފުރުން މަނާކުރި އަމުރު ހައިކޯޓުން ބާތިލްކުރުމުން ދައުލަތުން ސުޕްރީމް ކޯޓަށް
އުފުލާފައިވަނީ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ކުށުގެ ދައުވާ
ކުރީގެ ނައިބު ރައީސް އަބްދުﷲ ޖިހާދުގެ މައްޗަށް އުފުލާފައިވާ ދައުވާތަކާ ގުޅިގެން ކުރިއަށް ގެންދިޔަ ޝަރީއަތެއްގެ ތެރެއިން - މުހައްމަދު ފަޒީން
ކ. ފުށިދިއްގަރު ފަޅު މައްސަލައިގައި ކުރީގެ ނައިބު ރައީސް އަބްދުﷲ ޖިހާދުގެ މައްޗަށް އުފުލާފައިވާ ދައުވާއާ ގުޅިގެން ފުރުން މަނާކުރި އަމުރު ހައި ކޯޓުން ބާތިލުކުރުމުން އެ ޤަޟިއްޔާ އިލްތިމާސް ކޮށްދެއްވުން އެދި ޕްރޮސެކިއުޓާގެ ޖެނެރަލްގެ ފަރާތުން އެ މައްސަލަ ސުޕްރީމް ކޯޓަށް ހުށަހަޅައިފިއެވެ.
ޖިހާދުގެ މައްޗަށް އުފުލާފައިވާ ދައުވާއާ ގުޅިގެން ފުރުން މަނާކޮށްފައި އޮތް އަމުރު ބާތިލްކޮށް، ޖިހާދާއި އެއްކޮޅަށް ހައިކޯޓުން ޙުކުމް ކޮށްފައިވަނީ ބުދަ ދުވަހު ބޭއްވި އަޑުއެހުމުގައެވެ.
މި މައްސަލަ ހައި ކޯޓުން ނިންމާފައިވާ ގޮތާމެދު ހިތްހަމަނުޖެހުން ފާޅުކުރައްވާ ޕްރޮސެކިއުޓާ ޖެނެރަލް ވަނީ އެ ޤަޟިއްޔާ އިލްތިމާސް ކޮށްދެއްވުން އެދި ސުޕްރީމް ކޯޓަށް މައްސަލަ ހުށަހަޅާފައެވެ.
މި މައްސަލައިގައި ޖިހާދާއި އެއްކޮޅަށް ހައި ކޯޓުން ކުރި ޙުކުމުގައި ބުނެފައިވަނީ، އޭނާ ފުރުން މަނާކޮށް ކްރިމިނަލް ކޯޓުން ނެރިފައިވާ އަމުރަކީ ޝަރުއީ އަދި ޤާނޫނީ އުސޫލުތަކާ ޚިލާފަށް ނެރިފައިވާ އަމުރެއް ކަމަށެވެ. އަދި މައްސަލަ ބެއްލެވި ފަނޑިޔާރުންގެ އިއްތިފާޤުން އެ އަމުރު ބާތިލްކުރާ ކަމަށެވެ. ހައި ކޯޓުގައި މި މައްސަލަ ނިންމަވާފައިވަނީ ފަނޑިޔާރު ހުސައިން ޝަހީދާއި، އިސްފަނޑިޔާރު ހާތިފް ޙިލްމީގެ އިތުރުން، ފަނޑިޔާރު އަބްދުލްރައޫފް އިބްރާހީމެވެ.
މި މައްސަލައިގައި ކަން ހިނގާފައިވާ ގޮތަށް ބަލާއިރު، ޖިހާދުގެ ފަރާތުން ރާއްޖެއިން ބޭރަށް ފުރައިގެން ދިއުމުގެ ހުއްދައަކަށް އެދި ކްރިމިނަލް ކޯޓަށް ހުށަހަޅާފައިވަނީ މިދިޔަ ޑިސެމްބަރު މަހުގެ 21 ވަނަ ދުވަހުއެވެ. އޭރު ކްރިމިނަލް ކޯޓުން މި މައްސަލަ ބެލުމަށްފަހު، މި މަހުގެ 20 ވަނަ ދުވަހުގެ ނިޔަލަށް ޖިހާދު ފުރުން މަނާކޮށް އަމުރެއް ނެރުނެވެ. އެގޮތުން ކްރިމިނަލް ކޯޓުން އޭރު މި އަމުރު ނެރިފައިވަނީ ޖިހާދު ރާއްޖެއިން ބޭރަށް ގޮސްފިނަމަ އަނބުރާ ނައުމުގެ ފުރުސަތު އޮތް ކަމަށް ބުނެއެވެ.
ކްރިމިނަލް ކޯޓުގެ މި އަމުރާ ގުޅިގެން ޖިހާދުގެ ފަރާތުން ހައިކޯޓަށް ހުށައެޅި މައްސަލައިގައި މައިގަނޑު ހަތަރު އިސްތިއުނާފީ ނުކުތާއެއް ބަޔާންކޮށްފައިވެއެވެ.
ޖިހާދުގެ ފަރާތުން ހުށަހެޅި ނުކުތާތައް:
މި މައްސަލަ އިސްތިއުނާފުކޮށް ޖިހާދުގެ ފަރާތުން ހުށަހެޅި ފުރަތަމަ ނުކުތާއަކީ އޭނާ ރާއްޖެއިން ބޭރަށް ފުރުން މަނާކޮށްފައިވަނީ ޖިނާއީ އިޖުރާއަތުގެ ޤާނޫނުގައި ކަނޑައަޅާފައިވާ އުސޫލުތަކާ ޚިލާފަށް ކަމަށެވެ.
ދެވަނަ ނުކުތާއެއްގެ ގޮތުން ޖިހާދުގެ ވަކީލުން ބުނެފައިވަނީ، އޭނާގެ މައްޗަށް ހުށައަޅާފައިވާ ދައުވާ އަކީ ޖިނާއީ އިޖުރާއަތުގެ ޤާނޫނުގައި ބުނާ ބޮޑު ކުށަކަށް ނުވާއިރު، އިސްތިއުނާފު ކޮށްފައިވާ އަމުރުގައި އެއީ ބޮޑު ކުށެއް ކަމުގައި އޮތް އޮތުންވެސް އެއީ ހުށަހެޅިފައިވާ ދައުވާއާ ޚިލާފަށް ޝަރީއަތުން ކަނޑައަޅާފައިވާ ކަމެއް ކަމަށެވެ.
ތިންވަނަ ކަމެއްގެ ގޮތުން ޖިހާދުގެ ފަރާތުން ވަނީ، ކްރިމިނަލް ކޯޓުގެ މި އަމުރަކީ ޤާނޫނޫ އަސާސީގެ 41 ވަނަ މާއްދާއިން ލިބިދޭ ދަތުރުފަތުރު ކުރުމުގެ އަސާސީ ޙައްޤަށް އުނިކަން އަންނަ ފަދަ އަމުރެއްކަން ބަޔާންކުރައްވާފައެވެ. އަދި ފުރުމަށް ހަމަޖެހިފައިވާ ތާރީޚާއި، ދެކޮޅު ޓިކެޓުވެސް ޖިހާދުގެ ފަރާތުން ހުށައަޅާފައިވާކަން އިސްތިއުނާފުގައި ފާހަގަކޮށްފައިވެއެވެ.
ފަހު ނުކުތާއެއްގެ ގޮތުން ޖިހާދުގެ ފަރާތުން ހުށަހަޅާފައިވާ ނުކުތާއަކީ ކްރިމިނަލް ކޯޓުގެ މި އަމުރު ނެރުމުގައި ޙަވާލާދީފައިވާ ހައި ކޯޓުގެ ގަޟިއްޔާ ތަތްބީޤު ކޮށްފައިވަނީ ޤާނޫނީ އުސޫލުތަކާ ޚިލާފަށްކަމަށް ބަޔާންކޮށް ހުށައަޅާފައިވާ ނުކުތާއެވެ.
