ސެވިއްޔާއާއެކު ހަދާފައިވާ އެއްބަސްވުން އެ ޓީމުގެ ކޯޗު ހުލެން ލޮޕެޓެގީ އާކޮށްފިއެވެ.

އުމުރުން 54 އަހަރުގެ ލޮޕެޓެގީ ސެވިއްޔާގެ އެއްބަސްވުން އާކޮށްފައިވަނީ 2024 ވަނަ އަހަރުގެ ހޫނު މޫސމުގެ ނިޔަލަށެވެ. ސެވިއްޔާގެ އެއްބަސްވުން ލޮޕެޓެގީ އާކުރިއިރު، 2019 ވަނަ ސެވިއްޔާއާ ހަވާލުވި ލޮޕެޓެގީ މީގެ ކުރިން ހަދާފައި އޮތް އެއްބަސްވުން ހަމަވަން އޮތީ 2022 ވަނަ އަހަރުގެ ހޫނު މޫސމުގެ ނިޔަލަށެވެ.

އެއްބަސްވުން އާކުރުމަށްފަހު ލޮޕެޓެގީ ބުނީ މިއީ ލިބުނު ވަރަށް ބޮޑު ހިތްވަރެއް ކަމަށާއި، އޭނާ ބޭނުންވަނީ ސެވިއްޔާ އަކީ މިހާރަށް ވުރެ ބޮޑު ކުލަބަކަށް ހެދުމަށް ކަމަށެވެ. އަދި ސެވިއްޔާގެ ސަޕޯޓަރުންގެ ހުވަފެން ހަގީގަތަކަށް ހެދުމަށްޓަކައި ވަރަށް ގިނަ މަސައްކަތްތަކެއް ކުރަން ޖެހޭ ކަމަށްވެސް ލޮޕެޓެގީ ވަނީ ބުނެފައެވެ.

މީގެ ކުރިން ސްޕެއިނުގެ ގައުމީ ފުޓްބޯޅަ ޓީމަށް އިރުޝާދު ދިން ލޮޕެޓެގީ ވަނީ 2018 ވަނަ އަހަރު ރަޝިއާގައި ބޭއްވި ފީފާ ވޯލްޑް ކަޕް ފެށުމުގެ ކުރިން ރެއާލް މެޑްރިޑާ ހަވާލުވާން އެއްބަސްވެފައެވެ. އެއާއެކު ރަޝިއާގައި ލޮޕެޓެގީ ހުއްޓައި، މުބާރާތް ފެށުމުގެ ކުރިން ސްޕެއިނުން ވަނީ އޭނާ މަގާމުން ވަކިކޮށްފައެވެ. އޭގެ ފަހުން ރެއާލާ ހަވާލުވެ އެ ޓީމުގައި ލޮޕެޓެގީ ހޭދަކޮށްފައިވަނީ އެންމެ ހަތަރު މަހެވެ.

ރެއާލުގައި ލޮޕެޓެގީއަށް ރަނގަޅު މަސައްކަތްތަކެއް ނުކުރެވުނު ނަމަވެސް، 2019 ވަނަ އަހަރުގެ ޖޫން މަހު ސެވިއްޔާއާ ހަވާލުވި ލޮޕެޓެގީގެ އިރުޝާދުގެ ދަށުން އެ ޓީމު މިހާތަނަށް ވަނީ މޮޅު ކުޅުމެއް ދައްކާފައެވެ. އެގޮތުން ލޮޕެޓެގީގެ ކޯޗުކަމުގައި ސެވިއްޔާއިން ވަނީ މިދިޔަ ސީޒަނުގެ ޔުއެފާ ޔޫރޮޕާ ލީގު ކާމިޔާބުކޮށްފައެވެ.