އައްޑޫ ޕޮލިސް އެކަޑަމީ އިމާރާތް ކޮށްފައިވަނީ ބިން ބޭނުން ކުރުމުގައި ނުވިސްނާ – ރައީސް ނަޝީދު
11 ޖެނުއަރީ 2021 | ހޯމަ 12:34އައްޑޫ ޕޮލިސް އެކަޑަމީގެ މަސައްކަތް މާޗް މަހަށް ނިންމުމަށް ވަނީ އަމާޒު ހިފައިފައި
އައްޑޫގައި އިމާރާތް ކުރަމުން އަންނަ ޕޮލިސް އެކަޑަމީ
އައްޑޫގައި ރައީސް އަބްދުﷲ ޔާމީން ދައުރު އިމާރާތް ކުރުމަށް ފެއްޓެވި ޕޮލިސް އެކަޑަމީ އިމާރާތް ކޮށްފައިވަނީ ބިން ބޭނުން ކުރުމުގައި ނުވިސްނާ ކަމަށާއި އެކަމަކު މިހާރު އެތަނަކީ ތައުލީމީ އިންސްޓިޓިއުޓެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ އައްޑޫ ޕޮލިސް އެކަޑަމީ އިމާރާތް ކޮށްފައިވަނީ ބިން ބޭނުން ކުރުމުގައި ނުވިސްނާ ކަމަށާއި، މިހާރު އެތަނަކީ ތައުލީމީ ބޮޑު އިންސްޓިޓިއުޓް އެއް ކަމަށެވެ. މީގެ އިތުރުން ޕީޕީއެމް ސަރުކާރުން އައްޑޫގައި މަތީ ތައުލީމަށް ފުރުސަތު ނެތީތޯ ވިދާޅުވެ ނަޝީދު ވަނީ ސުވާލު އުފައްދައިފައެވެ.
ރައީސް ނަޝީދު ވަނީ އައްޑޫ ސިޓީގެ އެމްޑީޕީ މޭޔަރު އަބްދުﷲ ސޯދިގާއި، ސިޓީ ކައުންސިލްގެ މެމްބަރުންގެ މަސައްކަތުން އައްޑޫ ސިޓީ ދަނީ މުޅި ދުނިޔެއަށް ހުޅުވިގެން ކަމަށް ވިދާޅުވެ އައްޑޫ ސިޓީ ކައުންސިލަށް ވަރަށް ބޮޑަށް ތައުރީފް ކުރައްވާފައެވެ.
އައްޑޫ ޕޮލިސް އެކަޑަމީގެ މަސައްކަތް މާޗް މަހަށް ނިންމުމަށް އަމާޒު ހިފާފައިވާއިރު، މި އިމާރާތުގެ މަސައްކަތް ކުރަމުން އަންނަނީ އިންޑިއާ ސަރުކާރުގެ އެހީގައެވެ.
މި އިމާރާތުގައި ހުންނާނެ ވަސީލަތްތަކުގެ ތެރޭގައި ފެންވަރު ރަނގަޅު އެކޮމެޑޭޝަން ބްލޮކްތަކާއި މެޑިކަލް ހިދުމަތް ދޭނެ ކްލިނިކާއި ޕީޓީ ގްރައުންޑާއި ހެލިޕޭޑާއި ޓްރެއިނިން ސެންޓަރާއި 800 މީހުންގެ ޖާގައިގެ ޖިމަކާއި ފުޓްބޯޅަ ދަނޑަކާއި ބާސްކެޓް ކޯޓަކާއި ޓެނިސް ކޯޓާއި 400 މީޓަރުގެ ޓްރެކާއި 340 މީހުންގެ އޮޑިޓޯރިއަމަކާއި 40 މީހުންގެ ޖާގަ ހިމެނޭ ގޮތަށް 320 މީހުންނަށް ކިޔަވައިދެވޭ ގޮތަށް އަށް ކްލާސްރޫމާއި ފަދަ ވަސީލަތްތައް ހިމެނެއެވެ.
ކުރިން މި އިމާރާތަށް ޕޮލިސް އެކަޑަމީ އާއި އިންސްޓިޓިއުޓް އޮފް ސެކިއުރިޓީ އެންޑް ލޯ އެންފޯސްމަންޓް ސްޓަޑީޒް ކިޔަން ނިންމި ނަމަވެސް މިހާރު އެތަނަށް ކިޔާނީ ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓް ކަމަށް ފުލުހުން ބުނެއެވެ.
