އިހަވަންދޫ ބަނދަރު ތަރައްޤީ ކުރުން، މަސައްކަތުގެ 35 އިންސައްތަ ނިމިއްޖެ
މިބަނދަރަކީ 51.72 މިލިއަން ރުފިއާއަށް ހަވާލުކުރެވިފައިވާ މަޝްރޫއެއް
އިހަވަންދޫ ބަނދަރު ތަރައްގީ ކުރުން
ހއ. އިހަވަންދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ 35 ޕަސެންޓް ނިންމާލެވިއްޖެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ން ބުނެފިއެވެ.
މި މަޝްރޫޢުގެ ދަށުން، ބަނދަރަށް އަލަށް އިތުރުކުރެވޭ ސަރަޙައްދު ފުންކުރުމުގެ މަސައްކަތުގެ 59 ޕަސެންޓް ވަނީ ނިމިފައި ކަމަށް އެމްޓީސީސީން ބުނެއެވެ.
މި މަޝްރޫޢުގެ ދަށުން، 21،295 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 95 މީޓަރުގެ ސަރަޙައްދެއްގައި އެއްގަމު ތޮށި ލުމާއި، 284 މީޓަރުގެ ސަރަޙައްދެއްގައި ބޭރު ތޮށިލުމާއި، 178 މީޓަރުގެ ސަރަހައްދެއްގައި ރިވެޓްމަންޓް ޖެހުން ހިމެނެއެވެ.
އަދި މަގުބައްތިއާއި ނެރު ބައްތި ހަރުކުރުމާއި، 4،582 އަކަ މީޓަރު ސަރަޙައްދެއްގައި ޕޭވްމަންޓް ހެދުން ހިމެނޭ ކަމަށް އެމްޓީސީސީން ބުނެއެވެ.
ހއ. އިހަވަންދޫ ބަނދަރު ތަރައްގީ ކުރުމުގެ މަޝްރޫއު އާއެކު ރައްޔިތުން އެދޭފަދަ ބަދަލުތަކެއް ފެންނާނެ ކަމުގެ އުއްމީދު އާވެފައިވާ ކަމަށް އިހަވަންދޫ ކައުންސިލްގެ ރައީސް މުހައްމަދު ރަޝީދުވެސް ވަނީ ވިދާޅުވެފައެވެ.
ރަޝީދު ވިދާޅުވެފައިވަނީ އިހަވަންދޫ އަކީ މަސްވެރިކަން ކުރާ ރަށެއްގެ އިތުރުން ވިޔަފާރި ބޭނުމަށް ގިނަ އުޅަނދު ގެންގުޅޭ ރަށެއް ކަމަށެވެ. އަދި މާލެ ދަތުރު ކުރުމަށްވެސް ގިނަ ބޯޓު ފަހަރު އެރަށުގައި އޮންނަ ކަމަށާއި ބަނދަރު ތަރައްގީ ކުރުމުގެ މަޝްރޫއު ފެށުމުގެ ކުރިން ފަޅުގައި ޖާގައިގެ ދަތިކަން އިންތިހާއަށް އޮންނަ ކަމަށްވާއިރު މިކަމަށް ހައްލު ލިބިގެންދާނެ ކަމަށެވެ.
19 ވަރަކަށް މަސް ދޯނި އޮންނަ އިރު މި ދޯނިތައް ފަޅުގައި އެޅޭނެ ގޮތެއް ނޯންނަ ކަމަށާއި މޫސުން ގޯސް ވާ ދުވަސްދުވަހު މޫދުގެ ބާނިތަކުގެ ސަބަބުން ވެސް އެކި އެކި ގޮންޖެހުންތަކާ ކުރިމަތި ވާކަމަށް އޭނާ ވިދާޅުވި އެވެ.
މީގެ އިތުރުންވެސް ފަޅުގެ ބައެއް ހިސާބުތައް ތިލަ ވުމާއެކު އެކި ހިސާބުތަކަށް ވެލި އެރުމުގެ މައްސަލަވެސް ދިމާވާކަމަށް ވެސް ރަޝީދު ފާހަގަކުރެއްވިއެވެ. އަދި މިއީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ގެ ރިޔާސީ ވައުދުޅެއްކަމަށްވެސް އޭނާ ވިދާޅުވިއެވެ.
މި މަޝްރޫއުގެ މަސައްކަތް ނިމޭއިރު ބަނދަރު ހެދިފައި އޮންނާނީ ރައްޔިތުން އެންމެ ބޭނުންވާ ގޮތަށްކަމަށް ވެސް އޭނާ ވަނީ ވިދާޅުވެފައެވެ.
މަޝްރޫއާއި ބެހޭ އިތުރު މައުލުމާތު ހިއްސާކޮށް ރާއްޖެއެމްވީއަށް މައުލޫމާތު ދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ، އެ މަސައްކަތް މި އަހަރުގެ ފެބްރުއަރީ މަހަށް ނިންމާލުމަށް މަސައްކަތް ކުރަމުންދާ ކަމަށެވެ.
މި މަޝްރޫއުގެ އެއްބަސްވުމުގައި ޕްލޭނިންގް މިނިސްޓްރީ އާއި އެމްޓީސީސީން ސޮއި ކޮށްފައިވަނީ 26 އޯގަސްޓް 2019 ގައެވެ.
މިބަނދަރަކީ 51.72 މިލިއަން ރުފިއާއަށް ހަވާލުކުރެވިފައިވާ މަޝްރޫއެކެވެ.
