10 މަހަށްފަހު ދަރިވަރުން އަނބުރާ ސްކޫލަށް
ދަރިވަރުން ސްކޫލަށް އަލުން ދާން ފަށައިފައިވަނީ 10 މަސް ދުވަހަށްފަހު
ދަރިވަރުން ސްކޫލަށް ވަނުމަށް ގައިދުރު ކަމާއިއެކު ސަފުހަދައިގެން
ކޮވިޑް-19ގެ މި ކާރިސާ ދުނިޔެއާއި ކުރިމަތިވީ މިފަދަ ކަމަކަށް އެއްވެސް ފަރާތަކުން ތައްޔާރުވެގެން ތިއްބައެއް ނޫނެވެ. ދުނިޔޭގެ އެކި ކަންކޮޅުތަކަށް ފެތުރެމުން އައިސް މި ކުޑަކުޑަ ގައުމާވެސް މި ބަލި ބައްދަލު ކުރީއެވެ. ހުރިހާ ރައްޔިތުން ބިރުވެރި ކަމެއްގެ ތެރެއަށް ވައްޓާލަމުންނެވެ.
ރާއްޖޭގައި ކޮވިޑް ފެތުރުން ކޮންޓްރޯލު ކުރުމަށް އެންމެ ކުރިން ފެށިގެންވެސް ކަމާބެހޭ ފަރާތްތަކުން އައީ ގިނަ ފިޔަވަޅުތަކެއް އަޅަމުންނެވެ. އެގޮތުން ކޮވިޑްގެ އެންމެ ފުރަތަމަ ކޭސް ރާއްޖެއިން ފެނުމާއިއެކު އަޅާފައިވާ ފިޔަވަޅުތައް އިތުރަށް ހަރުދަނާ ކުރިއެވެ. އަދި މި ބަލި ފެތުރެން ފެށުމާއިއެކު ރާއްޖެ ލޮކްޑައުންކޮށް، ހުރިހާ ފަރާތްތަކުންވެސް ގޭގައި ތިބުމަށް އިރުޝާދުދެވިގެން ދިއައެވެ.
މިއާއިއެކު މުޅި ރާއްޖެއަށް އައީ ހިތާމަވެރިކަމާއި ބިރުވެރިކަން ވަށާލެވިފައިވާ ފަޅުކަމެކެވެ. އެގޮތުން އެންމެ ބޮޑަށް ފަޅުވެ، ހުސްވެގެން ދިޔައީ އަބަދުމެ، ހިނިތުންވުމާއި އުފާވެރިކަން އެ މާހައުލެއްގައިވާ ސްކޫލުތަކެވެ.
2020 ވަނަ އަހަރުގެ މާޗް މަހު ސްކޫލްތައް ބަންދުކުރީ ދަރިވަރުންގެ ރައްކާތެރިކަމާއި ސަލާމަތްތެރި ކަމަށެވެ. އުނގެނުމުގެ މާހައުލުތަކަށް އައި ފަޅު ކަމާއިއެކު އެޑިއުކޭޝަން މިނިސްޓްރީއާއި އެންމެހާ ކަމާބެހޭ އިދާރާތަކުން ނިންމީ ދަރިވަރުންގެ އުނގެނުމަށް ހުއްޓުމެއް ނުގެނައުމަށެވެ. މިކަން ކުރުމަށްޓަކައި އޮންލައިން ކްލާސްތަކާއި ޓެލެކިލާސްތައް ދަރިވަރުންނަށް ތައާރަފް ވެގެން ދިއައެވެ.
އެންމެ ފުރަތަމަ މިއީ ބައެއް ދަރިވަރުން، މުދައްރިސުން އަދި ބެލެނިވެރިންނަށްވެސް މިއީ ދަތިކަމަކަށް ވީނަމަވެސް ގިނަ ބައެއްގެ މިންނެތް މަސައްކަތުން ދަރިވަރުން މިކަމަށް މަޑުމަޑުން ހޭނުނެވެ. ސްކޫލުގެ މާހައުލަށް ނުދެވި، ދިރާސީ އައު އަހަރަށް ބޮޑެތި ބަދަލުތަކެއް ގެނުވަމުން 2020 ވަނަ އަހަރުގެ ކިޔެވުން ދަރިވަރުން ނިންމާލީ 2021 ވަނަ އަހަރު ސްކޫލަށް ދެވޭނެ ކަމުގެ އުއްމީދުގައެވެ.
މި އުއްމީދު މިއަދު މިވަނީ ފުރިހަމަ ވެފައެވެ. ކޮވިޑް-19ގެ ސަބަބުން ދިރާސީ އަހަރަށް ބަދަލު ތަކެއް އައިސް ދެވަނަ ޓަރމުގެ ކިޔެވުން ފެށުމަށްޓަކައި ނިއު ނޯމަލްގައި، ސަލާމަތާއި ރައްކާތެރިކަމުގެ އެތައް ފިޔަވަޅުތަކަކާއި އެކު ސްކޫލުތައް އަލުން ހުޅުވިގެން ދިޔައީ ބޭބީ ނާސަރީއާއި ގްރޭޑް 12 އާ ދެމެދުގެ ހުރިހާ ގްރޭޑަކަށެވެ.
މިއަދު ސްކޫލަށް ދިއަ ގިނަ ދަރިވަރުން ބުނީ އެކުދިން އެންމެ އުފާވަނީ ސްކޫލުގެ މާހައުލަށް އަނބުރާ އާދެވުމުން ކަމަށެވެ. އަދި ރަހުމަތްތެރިންނާއި ބައްދަލުވުމާއެކު އެކުދިންގެ އުނގެނުމުގެ އެ މާހައުލު މަތިން ހަނދާންވިކަމަށް ދަރިވަރުން ބުނެއެވެ.
ސްކޫލްތައް އަލުން ހުޅުވާފައިވާއިރު ސްކޫލްތަކުގައި އަމަލުކުރަން ޖެހެނީ ނިއު ނޯމަލްގައި އަމަލުކުރަން އަންގާފައިވާ ހާއްސަ އުސޫލެއްގެ ދަށުންނެވެ. އެގޮތުން ޕްރީ ސްކޫލް ދަރިވަރުން ސްކޫލަށް ނެރޭ އިރު އެ ދަރިވަރުންނަށް ކިޔަވައިދޭން ޖެހެނީ ފަސް ދުވަހު ދުވާލަކު ދެ ގަޑިއިރަށް ވުރެ މަދު ނުވާނެ ގޮތަށެވެ. އޭގެ ތެރެއިން އެއް ގަޑި އިރު ވަންދެން ކުދިންނަށް ގައި ދުރުކަމާއި އަތް ދޮޮވުން ފަދަ ކޮވިޑް-19އާ ގުޅިގެން އަޅާފައިވާ ހާއްސަ ފިޔަވަޅުތައް ކިޔައިދޭން ޖެހެއެވެ.
ޕްރައިމަރީ ސެކަންޑަރީ އަދި ހަޔަރ ސެކަންޑަރީގެ ދަރިވަރުންނަށް ކިޔަވައިދޭން ޖެހެނީ 5 ގަޑިއިރަށެވެ. ސްކޫލުގައި ކުދިން ތިބޭ ނިސްބަތަށް ބަލާފައި ކިޔެވުމުގެ ދަންފަޅި އޮންނަނީ ތިން ބަޔަކަށް ބަހާލައިގެންނެވެ. އެއީ ހަފްތާ އަކު ފަސް ދުވަހު ދެ ސެޝަން އަކަށް ބަހާލައިގެން ކިޔަވައި ދިނުމާއި ދެ ދުވަހުން އެއް ދުވަހު ކުދިން ސްކޫލަށް ގެންދިއުމެވެ. އެގޮތަށް އަމަލުކުރާ ނަމަ ކުދިންނަށް އޮންލައިން ކްލާސްތައް ވެސް ނަގައިދޭން ޖެހެއެވެ.
ސްކޫލުތަކުގެ މެނޭޖްމަންޓުން މިކަންކަމަށް ވާންޖެހޭ އެންމެ ފުރިހަމަ ތައްޔާރީތައް ވެފައިވާކަން ފެނިގެންދިޔައީ މިއަދު ސްކޫލުތަކުން ފެނުނު މަންޒަރުންނެވެ. އެގޮތުން ވަކި އުސޫލުތަކެއްގެ މަތިން ދަރިވަރުން ސްކޫލައް ވައްދައި، އެކުދިންގެ ހުން ބަލައި އަތް ސެނެޓައިޒް ކުރުމަށް ހަނދާންކޮށްދެމުން ދިޔައީ ވަރުބަލި ކަމެއް ނެތިއެވެ.
ދެވަނަ ޓަރމުގެ ކިޔެވުން ފެށިގެން ގޮސްފައިވާއިރު ދަރިވަރުން އެކުދިންގެ ޒިންމާތައް އަދާކޮށް ކިޔެވުމަށް ސަމާލުކަން ދިނުމާއެކު ގައިޑްލައިންތަކަށް އަމަލު ކުރަމުން ގެންދިއުމަކީ ކޮންމެ ވަކިވަކި ކުއްޖެއްގެ ވެސް ޒިންމާއެކެވެ. އަދި އެއްކުޖަކު އަނެއް ކުއްޖަކަށް މިފަދަ ކަންކަމުގައި އެހީތެރި ވުމަކީ މުހިއްމު ކަމެކެވެ.
