އިންޑޮނޭޝިއާގެ މަސްވެރިންނަށް ފްލައިޓެއްގެ ބައިތަކެއް ފެނިއްޖެ، ފްލައިޓް ވެއްޓުނު ކަމަށް ބާރުލިބޭ

56 ފަސިންޖަރުންނާއި 6 ކްރޫ މެމްބަރުންނާއިއެކު ދަތުރުކުރަމުންދިޔަ އިންޑޮނޭޝިއާގެ ސްރިވިޖަޔާގެ މަތިންދާބޯޓަކަށް ވީނުވީއެއް ނޭނގި ހޯދަންފެށިތާ މާގިނައިރު ތަކެއް ނުވަނީސް، އިންޑޮނޭޝިއާގެ މަސްވެރިންތަކަކަށް ފްލައިޓެއް ކަމަށް ބެލެވޭ ބައިތަކެއް ފެނިގެން ރިޕޯޓްކޮށްފިއެވެ.

ބީބީސީގައި ރިޕޯޓް ކޮށްފައިވާ ގޮތުން ގެއްލިފައިވަނީ ސްރިވިޖަޔާގެ "އެއަރ ބޮއެން 737" މަތިންދާބޯޓެވެ. އެގޮތުން މި ބޯޓު މިނެޓެއްގެ ތެރޭގައި 10،000 ފޫޓަށް ތިރިއަށް ގޮސްފައިވާކަމަށް ފްލައިޓް ޓްރެކް ކުރާ ވެބްސައިޓަކާ ޙަވާލާދީ ބީބީސީގައި ރިޕޯޓް ކޮށްފައިވެއެވެ.

އަލް ޖަޒީރާއިން ރިޕޯޓްކޮށްފައިވާ ގޮތުން އިންޑޮނޭޝިއާގެ މަސްވެރިންތަކެއް ވަނީ ފްލައިޓެއްގެ ބައިތަކެއް ކަމަށް ބެލެވޭ ބައިތަކެއް ފެނިގެން ކަމާއި ބެހޭ ފަރާތްތަކަށް ރިޕޯޓްކޮށްފައެވެ. މަސްވެރިން ރިޕޯޓްކޮށްފައިވާ ގޮތުން އުތުރު ޖަކަޓާ ކަނޑުުން ކޭބަލްތަކަކާއި ޖިންސު އަދި ފްލައިޓެއްގެ ދަގަނޑު ބައިތަކެއް ވަނީ ފެނިފައެވެ.

ޖަކާޓާއިން ފުރައިގެންދިޔަ މި މަތިންދާބޯޓުގައި 56 ފަސިންޖަރުން ތިއްބެވެ. އޭގެތެރޭގައި 7 ކުޑަކުދިން ހިމެނެއެވެ.

އިންޑޮނޭޝިއާގެ ޓްރާންސްޕޯޓް މިނިސްޓްރީއާ ޙަވާލާދީ އަލްޖަޒީރާގައި ރިޕޯޓް ކޮށްފައިވާ ގޮތުން މިވަގުތު އެ ޤައުމުން ދަނީ އެކަމުގެ ތަހުޤީޤެއް ކުރަމުންނެވެ. އަދި ސާރޗް އެންޑް ރެސްކިއު ޓީމުތަކުން ތައްޔާރީ ޙާލަތަށް ގެނެވި ފްލައިޓް ހޯދުމުގެ މަސައްކަތް ވަނީ ފަށާފައެވެ.