ސިހުރު ހެދިކަމުގެ ތުހުމަތުގައި ހައްޔަރުކޮށްފައިވާ އެންވަޔަރަމެންޓު މިނިސްޓްރީގެ ކުރީގެ ސްޓޭޓް މިނިސްޓަރ ފާތިމަތު ޝަމްނާޒް އަލީ ސަލީމްގެ ގެއިން ގެންދިޔަ ތަކެތިން ސިހުރުގެ އެއްވެސް ކަމެއް ފެނިފައި ނުވާކަމަށް އިސްލާމިކް މިނިސްޓްރީން ބުނެފިއެވެ.
ޝަމްނާޒްގެ ގެ ބަލައި ފާސް ކުރުމަށްފަހު ފުލުހުން އެ ގެއިން ގެންދިޔަ ތަކެތީގެ ތެރޭގައި ފަށުފުލަކާއި، ކުޑަކުދިން ކުޅެން ގެންގުޅޭ ޒާތުގެ ބުދަކާއި، ކޮޓަރިން ފެނުނު އިސްތަށިތަކެއް ވެސް ހިމެނެއެވެ.
ރާއްޖެއެމްވީއާ ވާހަކަ ދައްކަވަމުން ޝަމްނާޒުގެ ވަކީލު އަލީ ޝާހު ވިދާޅުވީ، ޝަމްނާޒުގެ ގެއިން ގެންދިޔަ ތަކެތީގެ ތެރޭގައި ސިހުރާ ގުޅޭ އެއްވެސް އެއްޗެއް ނުވަތަ ކަމެއް ހުރިތޯ އިސްލާމިކް މިނިސްޓްރީން ބަލައި ދިރާސާ ކޮށްފައިވާ ކަމަށެވެ.
ޝާހު ވިދާޅުވީ، ފަށުފުލުގައި ލިޔެފައިވަނީ އާޔަތުލް ކުރުސިކަމަށް އިސްލާމިކް މިނިސްޓްރީން ބުނެފައިވާ ކަމަށެވެ. އަދި އެގެއިން ގެންދިޔަ ބުދުގައިވެސް ސިހުރާ ގުޅޭ އެއްވެސް ކަމެއް ނެތްކަމަށް މިނިސްޓްރީން ވަނީ ބުނެފައެވެ.
ޝާހު ވިދާޅުވީ އެ ގެއިން ގެންދިޔައީ ގޭގެ ކުޑަކުދިން ކުޅެން ގެންގުޅޭ ބުދެއް ކަމަށާއި، ކުޑަކުދިން ކުޅެން ގެންގުޅޭ އެ ބާވަތުގެ އެހެން ބުދުތައްވެސް އެގޭގައި އަދިވެސް އެބަހުރި ކަމަށެވެ. އެ ބުދުގައި އެއްވެސް އެއްޗެއް ލިޔެފައެއްވެސް ނެތެވެ.
މި މައްސަލައިގައި ދެން ހައްޔަރުކުރި ސަނާގެ ކޮޓަރިން ފެނުނު އިސްތަށިކޮޅެއް ވެސް ފުލުހުން ގެންގޮސްފައި ވާއިރު، އަންހެނަކު އުޅޭ ތަނެއްގައި އިސްތަށި ހުންނާނެ ނޫންތޯ ވަކީލު ސުވާލު ކުރެއްވިއެވެ.
