ކޮވިޑް-19ގެ ކޭސްތައް މަދުން ފެންނަން ފަށާފައިވާ މި ދަނޑިވަޅުގައި ރައްކާތެރިކަމުގެ ގޮތުން އަޅާފައިވާ ފިޔަވަޅުތަކަށް ފަރުވާ ކުޑަކުރެވޭ މަންޒަރު ފެންނަމުންދާ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓެކްނިކަލް އެޑްވައިޒަރީ ގްރޫޕުގައި ހިމެނިވަޑައިގަންނަވާ ޑރ. އަހުމަދު ޝަހީދު ވިދާޅުވީ ދުނިޔޭގައި ކުރިއަރާފައިވާ ބައެއް ބޮޑެތި ގައުމުތަކުގައި ވެސް ވަރަށް ހަލުވިކަމާއެކުގައި ވައިރަސް ފެތުރިގެން ދިއުމުގެ ސަބަބުން އަނެއްކާވެސް ބައެއް ގައުމުތަކުގައި ލޮކްޑައުން ކުރަން ފަށާފައި ކަމަށެވެ. އަދި މިދިޔަ މަހުގެ ތެރޭގައި ކޮވިޑް-19ގެ އައު ވޭރިއެންޓްތަކެއް ފެނިފައިވާ އިރު، އިތުރަށް ހަލުވިކަމަކާއެކުގައި ވައިރަސް ފެތުރުމުގެ ކަންބޮޑުވުންތައް އެބައޮތް ކަމަށެވެ.
އަދި ބައެއް ގައުމުތަކުގައި މި ފެންނަ މަންޒަރުތަކަކީ ކޭސްތައް ގިނަވުމުގެ ސަބަބުން ހޮސްޕިޓަލްތައް ފުރި ކޮވިޑް-19ން ފަރުވާ ކުރުމަށާއި، އަދި އެހެން ބަލިތަކަށް ފަރުވާ ކުރުމަށް ވެސް ދަތިވެފައިވާތަން ކަމަށެވެ. ޑރ. ޝަހީދު ވިދާޅުވީ ކޮވިޑް-19 ރާއްޖެއަށް އައުމާ ގުޅިގެން ވެސް މަސައްކަތް ކުރަމުން ދިޔައީ މިފަދަ ހާލަތެއް ރާއްޖެއަށް އަޔަ ނުދިނުމަށްޓަކައި ކަމަށެވެ.
އަދި ދެވަނަ ޕީކްގައި ވެސް ހަރުދަނާ ފިޔަވަޅުތަކަކާއެކުގައި ލޮކްޑައުންއަކަށް ނުގޮސް ބަލި ކޮންޓްރޯލް ކުރެވުނު ކަމަށެވެ. އަދަދުތައް ދަށްކުރެވުނީ ރައްޔިތުންގެ ފަރާތުން ރައްކާތެރިކަމުގެ ގޮތުން އެޅިފައިވާ ފިޔަވަޅުތަކަށް ބޯލަނބައި އަދި އެ ފިޔަވަޅުތަކާއި އެއްގޮތަށް އަމަލުކުރުމުގެ ސަބަބުންކަން ފާހަގަ ކުރައްވާ ޑރ. ޝަހީދު ވިދާޅުވީ މި ދަނޑިވަޅުގައި މި އަދަދުތައް ކޮންޓްރޯކް ކުރެވި ލިބިފައިވާ ކާމިޔާބީތައް ދެމެހެއްޓުމަށްޓަކައި ހުރިހާ އެންމެން ވެސް ރައްކާތެރިކަމުގެ ފިޔަވަޅުތަކުގައި ހިފެހެއްޓުން ވަރަށް މުހިންމު ކަމަށެވެ.
އަޅުގަނޑުމެންނަށް އެބަފެނޭ ރައްކާތެރިކަމުގެ ފިޔަވަޅުތަކަށް ފަރުވާ ކުޑަކުރެވޭ ތަން. އަދަދުތައް ދަށްކޮށްފައި ބެހެއްޓުމަށްޓަކައި ފިޔަވަޅުތަކުގައި ހިފަހައްޓައިގެން ތިބުން ވަރަށް މުހިންމު. މި ދުވަސްވަރަކީ ގިނަ އަދަދަކަށް ފަތުރުވެރިން ރާއްޖެ އަންނަމުންދާ ދުވަސް ވަރެއް. އަދި އެއާއެކު ޗުއްޓީ ހޭދަކުރުމަށްޓަކައި ރާއްޖެއިން ބޭރަށް ދިޔަ ދިވެހިން ރާއްޖެ އެނބުރި އަންނަމުން މިދަނީ. އެހެންކަމުން ރައްކާތެރިކަމުގެ ފިޔަވަޅުތަކަށް އިތުރަށް ސަމާލުކަން ދިނުން މުހިންމު. އަލާމާތްތައް ހުންނަ މީހުން ފުލޫ ކްލިނިކްތަކަށް ދިއުން ވަރަށް މުހިންމު. މާލޭގެ އަދި ރަށްރަށުގައި ގާއިމްކޮށްފައިވާ ފުލޫ ކުލިނިކްތަކަށް ދާ މީހުންގެ އަދަދު މަދު. މާނައަކީ ފުލޫގެ ނިޝާންތައް ހުންނަ މީހުން މަދުވީކީ ނޫން. ފާހަގަވެގެންދަނީ ނިޝާންތަކާއެކު ވެސް ފުލޫ ކުލިނިކްތަކަށްދާ އަދަދުތައް މިވަނީ ދަށްވެފައި،ޑރ. އަހުމަދު ޝަހީދު
ޑރ. ޝަހީދު ވިދާޅުވީ ބަލީގެ އެއްވެސް ނިޝާނެއް ހުންނަ ނަމަ އަވަހަށް ގޮސް ޓެސްޓް ކުރުން މުހިންމު ކަމަށެވެ. އަދި ޓެސްޓް ކުރަން ނުދާ ސަބަބުތަކުގެ ތެރޭގައި ބޮޑެތި އަލާމާތްތަކެއް ނުހުރުން ހިމެނޭ ކަން ފާހަގަކުރެވޭ ކަމަށާއި، ބައެއް ފަހަރު ވަރަށް އާދައިގެ ހުމެއް ނުވަތަ ކަރުގެ ރިހުމެއް ނުވަތަ ކުޑަކޮށް ކެއްސާލާ މިކަހަލަ ކުޑަކުޑަ އަލާމާތްތަކަށް ވާތީ ފަހަރެއްގައި ނުދަނީ ކަމަށް ވެސް ވެދާނެ ކަމަށެވެ.
ޓެސްޓް ކުރުމުގެ މުހިންމުކަން އެތައް ސަބަބުތަކާއި ހެދި މި ފާހަގަކޮށްލަން ޖެހެނީ. އެއްކަމަކީ ޓެސްޓް މިކުރަނީ އަމިއްލަ ރައްކާތެރިކަމަށްޓަކައި. ހަމައެއާއެކު ޓެސްޓްކުރުމުގެ އަނެއް މުހިންމު ކަމަކީ މުޖުތަމައު ރައްކާތެރިކުރުން. ކޮވިދް-19 ފެތުރުން ހުއްޓުވުމަށްޓަކައި އެއްމެ މުހިންމު އެއް އަސާސަކީ "ޑިޓެކްޓް ޑިޒީޒް އަރލީ އެންޑް އައިސޮލޭޓް އަރލީ" އަވަހަށް ބަލި ދެނެގަނެވި އޭގެ ސަބަބުން އަވަހަށް ފިޔަވަޅުއެޅުމަށް. އެންމެން ގުޅިގެން ޓްރާންސްމިޝަން ހުއްޓުވޭނީ. އެހެންވީމާ ނިޝާންތަކެއް ފެނިއްޖެއްޔާ ފުލޫކްލިނިކަށް ގޮސް ޓެސްޓް ކުރަނީ އަމިއްލަ ރައްކާތެރިކަމަށް ނޫން. އެއާއިއެކު މުޖްތަމައުގައި އެމީހާގެ ފަރާތުން އަޅަންޖެހޭ ފަރުދީ ޒިންމާއެއް އެއީ،ޑރ. އަހުމަދު ޝަހީދު
ކޮވިޑްގެ ކޭސްތައް އަނެއްކާވެސް އިތުރުވެއްޖެ ދިމާވެދާނެ ކަންކަމަށް އަލިއަޅުއްވާލައްވަމުން ޑރ. ޝަހީދު ވިދާޅުވީ ލޯ ރިސްކް މީހަކަށް މާބޮޑު ނުރައްކަލަކަށް ނުވި ނަމަވެސް، މުޖްތަމައު ތެރޭގައި ވަރަށް ބޮޑު އަދަދަކަށް ބަލި ފެތުރިއްޖެނަމަ މީހުން ނިޔާވުމުގެ ފުރުސަތު ވަރަށް ބޮޑުވާނެ ކަމަށެވެ. އަދި އުމުރުން ދުވަސްވީ މީހުންނާއި އެކިއެކި ބަލިތަކަށް ފަރުވާ ކުރާ މީހުން ބަލީގެ ޝިކާރައަކަށް ވެގެންދާތަން އަދި ގިނަ އަދަދަކަށް މީހުން ނިޔާވުމުގެ ފުރުސަތު އޮންނާނެ ކަމަށާއި، މިކަމަށް ވަރަށް ބޮޑަށް ސަމާލުކަން ދޭންޖެހޭ ކަމަށެވެ.
