މޫސުން ގޯސްވެ، ބޯކޮށް ސްނޯފައިބަމުންދާތީ އިންޑިއާގެ ޖަމްމު ކަޝްމީރުގެ ފްލައިޓް ދަތުރުތަކަށް ބުރޫ އަރާ ފްލައިޓްތައް ކެންސަލްވުމުން ޖަމްމު ކަޝްމީރުން ފުރަން ހަމަޖެހިފައިވާ ފަތުރުވެރިންނަށް ކެއުމާއި ހުރުން ހިލޭ ދިނުމަށް ކަޝްމީރުގެ ފަތުރުވެރިކަމާއި ބެހޭ ވުޒާރާއިން ނިންމައިފިއެވެ.
ކަޝްމީރުގެ ފަތުރުވެރިކަމާއި ބެހޭ ވުޒާރާގެ އޮފިޝަލަކު ވިދާޅުވީ، މޫސުން ގޯސްވެ، ގިނަ ފްލައިޓް ދަތުރުތައް ކެންސަލްވުމުން އެތަށް ބައިވަރު ފަތުރުވެރިންނަށް ނުފުރި މަޑުކުރަން ޖެހިފައިވާ ކަމަށާއި، އެހެންކަމުން ފްލައިޓްތައް ކެންސަލްވި، ފަތުރުވެރިންނަށް ކެއުމާއި ހުރުން ހިލޭ ފޯރުކޮށްދިނުމަށް ނިންމާފައިވާ ކަމަށެވެ. އަދި ކުރިޔަށް އޮތް ހަފްތާގައިވެސް މޫސުން ރަނގަޅުވާނެ ކަމަށް ބެލެވިފައިނުވާ ކަމަށާއި، މޫސުން ރަނގަޅުވުމުން ފަތުރުވެރިން އެނބުރި އެ މީހުންގެ ގައުމަށް ދިޔުމުގައި ލުއި ގޮތްތަކެއް ހޯދުމަށް ފަތުރުވެރިކަމާއި ބެހޭ ވުޒާރާއިން މަސައްކަތް ކުރަމުން އަންނަ ކަމަށް އޮފިޝަލު ވިދާޅުވިއެވެ.
އިންޑިއާގެ ޖަމްމު ކަޝްމީރު ސަރަހައްދަށް ފިނި މޫސުމުގައި ކޮންމެ އަހަރަކުވެސް އެތަށް ސަތޭކަ ފަތުރުވެރިން ޗުއްޓީ ހޭދަކުރުމަށް ދަތުރުކުރެއެވެ. އެގޮތުން މިއަހަރުވެސް ފަސް ލައްކަ އަށްވުރެ ގިނަ ފަތުރުވެރިން ފިނި މޫސުމުގައި ޖަމްމު ކަޝްމީރަށް ދަތުރުކޮށްފައިވާ ކަމަށް އިންޑިއާ ސަރުކާރުން ވަނީ ބުނެފައެވެ.
އިންޑިއާގެ ފަތުރުވެރިކަމާއި ބެހޭ ވުޒާރާއިން ބުނީ ކޮވިޑްގެ މި ހާލަތުގައިވެސް ޖަމްމު ކަޝްމީރުގެ ސަރަހައްދަށް އެތަށް ސަތޭކަ ފަތުރުވެރިން ގޮސްފައިވާ ކަމަށާއި، ފިނި މޫސުން ކަމުން ފަތުރުވެރިންނަށް ލުއި ފަސޭހަ ގޮތްތަކެއް ހޯދައިދީފައިވާނެ ކަމަށެވެ.
