ބޯޑަރު ހުޅުވިފަހުން އެންމެ ގިނައިން ފަތުރުވެރިން ކޮވިޑަށް ޕޮޒިޓިވްވީ ސެޕްޓެމްބަރު މަހު
8 ޖެނުއަރީ 2021 | ހުކުރު 06:59ސެޕްޓެމްބަރު މަހު 9،538 ފަތުރުވެރިން ރާއްޖެ އައިސްފައިވޭ
ވެލާނާ އިންޓަރނޭޝަނަލް އެއަރޕޯޓު - ފަތުރުވެރިންތަކެއް އެއަރޕޯޓްގައި މަޑުކޮށްލައިގެން
ބޯޑަރު ހުޅުވިފަހުން އެންމެ ގިނައިން ފަތުރުވެރިން ކޮވިޑަށް ޕޮޒިޓިވްވީ މިދިޔަ އަހަރުގެ ސެޕްޓެމްބަރު މަހު ކަމަށް ޓޫރިޒަމް މިނިސްޓްރީން ބުނެފިއެވެ.
އެ މިނިސްޓްރީން އާންމުކޮށްފައިވާ ތަފާސް ހިސާބުތަކަށް ބަލާއިރު 2020 ވަނަ އަހަރުގެ ސެޕްޓެމްބަރު މަހު 9،538 ފަތުރުވެރިން ރާއްޖެ އައިސްފައިވާއިރު އޭގެ ތެރެއިން 0.36 އިންސައްތަ ފަތުރުވެރިން ވަނީ ކޮވިޑަށް ޕޮޒިޓިވްވެފައެވެ.
ދެވަނަ އަށް ފަތުވެރިން އެންމެ ގިނައިން ކޮވިޑަށް ޕޮޒިޓިވްވެފައިވަނީ އޮގަސްޓް މަހާއި އޮކްޓޯބަރު މަހުއެވެ. އެއީ 0.26 އިންސައްތައެވެ. އޮގަސްޓް މަހު 7،628 ފަތުރުވެރިން ރާއްޖެ އައިސްފައިވާއިރު ނޮވެމްބަރު މަހު 21،515 ފަތުރުވެރިން ވަނީ ރާއްޖެ އައިސްފައެވެ.
ނޮވެމްބަރު މަހު 35،759 ފަތުރުވެރިން ރާއްޖެ އައިސްފައިވާއިރު އޭގެ ތެރެއިން ވައިރަސް އަށް ޕޮޒިޓިވްވީ 0.13 އިންސައްތަ މީހުންނެވެ. ޑިސެމްބަރު މަހުގެ 30 ގެ ނިޔަލަށް 93،823 ފަތުރުވެރިން ރާއްޖެ އައިސްފައިވާއިރު އެ މަހު ވައިރަސްއަށް ޕޮޒިޓިވްވި ފަތުރުވެރިންގެ އަދަދު މަދުކަން ފާހަގަކޮށްލެވެއެވެ. އެގޮތުން އެމަހު ވައިރަސްއަށް ޕޮޒިޓިވްވެފައިވަނީ 0.07 އިންސައްތަ މީހުންނެވެ.
ރާއްޖެއިން ކޮވިޑް ފެނުނުތާ 306 ދުވަސްވެފައިވާއިރު އެހެން ޤައުމުތަކަށް ނިސްބަތްވާ ޖުމްލަ 5،191 މީހަކު ރާއްޖެއިން ވަނީ ކޮވިޑަށް ޕޮޒިޓިވްވެފައެވެ. ހެލްތް މިނިސްޓްރީގެ ތަފާސް ހިސާބުތަކަށް ބަލާއިރު ރާއްޖެއިން އެންމެ ގިނައިން ބަންގްލަދޭޝް މީހުން ޕޮޒިޓިވްވެފައިވާއިރު ދެވަނަ އަށް އެންމެ ގިނައިން ޕޮޒިޓިވްވެފައިވަނީ އިންޑިއާ އަށް ނިސްބަތްވާ މީހުންނެވެ.
ކޮވިޑް-19އާ ގުޅިގެން ރާއްޖޭގެ ބޯޑަރު މިދިޔަ އަހަރުގެ މާޗް މަހުގައި ބަންދު ކުރުމަށް ފަހު ދެން ބޯޑަރު ހުޅުވީ ޖުލައި މަހުގައެވެ. އޭގެ ފަހުން ރިސޯޓުތަކަށް ފަތުރުވެރިންނަށް އާދެވޭ ގޮތަށް އޮތުމަށް ފަހު ލޯކަލް ޓޫރިޒަމް އަށް ހުޅުވާލީ އޮކްޓޯބަރު މަހުގައެވެ. މިދިޔަ އަހަރުގެ ނިޔަލަށް ޖުމްލަ 555،399 ފަތުރުވެރިން ރާއްޖެ އައިސްފައި ވެއެވެ.
ބޯޑަރުތައް ހުޅުވާލައި ލޯކަލް ޓޫރިޒަމް އަށް ހުޅުވާލި ނަމަވެސް ރަށްރަށުގައި ހުރިހާ ގެސްޓު ހައުސް އެއް އޮޕަރޭޓް ނުކުރެއެވެ. މިވަގުތު އޮޕަރޭޓް ކުރަމުންދަނީ 43 ރަށަކުން 269 ގެސްޓު ހައުސްއެވެ. މީގެ އިތުރަށް ސަފާރީތަކާއި ރިސޯޓުތައް ހިމެނޭ ގޮތުން ޖުމްލަ 41،792 ޓޫރިޒަމް ބެޑް މިހާރު އޮޕަރޭޓް ކުރެއެވެ.
