ނަޑެއްލާގެ ގެއެއްގައި އަލިފާން ރޯވެ އަނދާ ހުލިވެއްޖެ
މިހާދިސާ ހިނގާފައިވަނީ މިއަދު ހެނދުނު 9:30 ހާއިރު
އަލިފާނުގެ ހާދިސާ ހިނގި ނަޑެއްލާ ޕާލްސާގެ
ގދ. ނަޑެއްލާ ގެއެއްގައި އަލިފާނުގެ ހާދިސާއެއް ހިނގައި އެ ގެ އެއްކޮށް އަނދާ ހުލިވެއްޖެ އެވެ.
ރާއްޖެއެމްވީއަށް މައުލޫމާތު ދެއްވަމުން ނަޑެއްލާ ކައުންސިލް މެމްބަރު އަލީ ނިޔާޒް ވިދާޅުވީ މިއަދު ހެނދުނު 9:30 ހާއިރު ހިނގި މިހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ.
ރަށުގެ ރައްޔިތުން އެއްވެ ޕަންޕު ބޭނުންކޮށްގެން އަލިފާން ނިއްވާލެވުނު އިރު ގެ އެއްކޮށް އަނދާ ހުލިވެފައިވާ ކަމަށް ނިޔާޒް ވިދާޅުވިއެވެ. މިހާދިސާ ހިނގާފައި ވަނީ އެރަށު ފާލްސާ ނަމަކަށް ކިޔާ ގެއެއްގައެވެ.
އަލިފާނުގެ ހާދިސާ ހިނގި ވަގުތު ހަތް އަހަރުގެ ކުއްޖަކާއި އަދި ފިރިހެނަކު ގޭގައި ނިދާފައި އޮތް ކަމަށާއި އެހެން ނަމަވެސް އަލިފާން ގަނޑު ނުފެތުރެނީސް އެންމެން ވެސް ގެއިން ބޭރަށް ނިކުމެފައިވާ ކަމަށް މައުލޫމާތު ލިބިފައިވެ އެވެ. އަދި ދުމުގެ އަސަރު ވެސް އެއްވެސް މީހަކަށް ކޮށްފައި ނުވެ އެވެ.
އެ ގެއަކީ ދެ ކޮޓަރިއަކާއި ބަދިގެ އަދި ސިޓިން ރޫމެއް ހުންނަ ގެއެއް ކަމަށާއި އަލިފާން ރޯވީ ކިހިއްނެއް ކަމެއް އަދި ބުނަން ނޭނގޭ ކަމަށް ކައުންސިލް މެމްބަރު އަލީ ނިޔާޒް ވިދާޅުވި އެވެ.
ނިޔާޒް ވިދާޅުވީ މިމައްސަލަ ފުލުހުންނަށް ރިޕޯޓް ކުރުމުން ތިނަދޫގައި ހަރަކާތްތެރިވާ ފުލުހުން މިހާރު ނަޑެއްލާއަށް އައިސް އެ ހާދިސާ ތަޙްޤީޤް ކުރަމުންދާ ކަމަށެވެ.
