ކުލަބު ބަދަލުނުކޮށް ޗެލްސީގައި ޖިރޫޑް މަޑުކުރާނެ

މި ޖެނުއަރީ ޓްރާންސްފާގައި ކުލަބު ބަދަލުނުކޮށް ޗެލްސީގައި މަޑުކުރާނެ ކަމަށް އެ ޓީމުގެ ފްރާންސްގެ ފޯވާޑް އޮލިވިއޭ ޖިރޫޑް ބުނެފިއެވެ.

މިދިޔަ އަހަރުގެ މެއި މަހުގެ ތެރޭގައި ޖިރޫޑް ވަނީ އިތުރު އެއް އަހަރަށް ޗެލްސީގައި މަޑުކުރަން ނިންމާ އެއްބަސްވުން އާކޮށްފައެވެ. އެކަމަކު މި ނިމުނު ޓްރާންސްފާ ބާޒާރުގައި ޗެލްސީން ޖަރުމަނުގެ ފޯވާޑް ޓިމޯ ވާނާ ގެނައި ފަހުން އުމުރުން 34 އަހަރުގެ ޖިރޫޑަށް ޗެލްސީގެ ފުރަތަމަ އެގާރައިން ފުރުސަތު ލިބުން މަދުވި ނަމަވެސް، މި ފަހުން ޗެލްސީން ކުޅުނު މެޗުތަކުގައި ޖިރޫޑަށް ވަނީ ފުރުސަތު ދީފައެވެ.

ޖިރޫޑް ޗެލްސީ ދޫކޮށްލާނެ ކަމަށް ފުރަތަމަ ބެލެވުނީ އޭނާއަށް ޗެލްސީގެ ފުރަތަމަ އެގާރައިން އެކަށީގެންވާ ފުރުސަތު ނުލިބޭނަމަ، ކުލަބު ބަދަލުކޮށް ކުޅުމުގެ ފުރުސަތު އޭނާ ހޯދަން ޖެހޭ ކަމަށް ފްރާންސުގެ ކޯޗު ޑިޑިއޭ ޑެޝޯމްޕްސް ބުނުމާ ގުޅިގެންނެވެ. އެގޮތުން މި އަހަރުގެ ޔޫރޯ ފުޓްބޯޅަ މުބާރާތާއި ޔުއެފާ ނޭޝަންސް ލީގުގެ ފައިނަލް ބުރުގައި ވާދަކުރާ ފްރާންސް ޓީމުން ޖާގަ ހޯދަން ބޭނުންނަމަ ކުލަބު ފެންވަރުގައި ޖިރޫޑުގެ ހާލަތަށް ބަދަލު އަންނަން ޖެހޭ ކަމަށްވެސް ޑެޝޯމްޕްސް ވަނީ ބުނެފައެވެ.

ރިޕޯޓުތައް ބުނާ ގޮތުން ޖިރޫޑް ހޯދުމަށް އިޓަލީގެ ޗެމްޕިއަން ޔުވެންޓަސްއިން އަންނަނީ މަސައްކަތް ކުރަމުންނެވެ. އެކަމަކު ދާދި ފަހުން ދިން އިންޓަވިއުއެއްގައި ޖިރޫޑް ބުނީ މި މަހު ކުލަބު ބަދަލުނުކޮށް އެއްބަސްވުމާ އެއްގޮތަށް ޗެލްސީގައި މަޑުކުރާނެ ކަމަށެވެ. އަދި އޭނާ ބޭނުންވަނީ މި ސީޒަނުގައި ޗެލްސީއާއެކު ކާމިޔާބީތަކެއް ހޯދުމަށް ކަމަށްވެސް މި އިންޓަވިއުގައި ޖިރޫޑް ވަނީ ބުނެފައެވެ.

ޖިރޫޑް އިތުރަށް ބުނީ މި އަހަރުގެ ހޫނު މޫސުމުގައި އެއްބަސްވުން ހަމަވަން އޮތް ނަމަވެސް، އިތުރު އެއް އަހަރު ޗެލްސީގައި މަޑުކުރުމުގެ ފުރުސަތު އެ އެއްބަސްވުމުގެ ދަށުން ލިބޭ ކަމަށެވެ. އެކަމަކު އަދި އެކަމާ ވަކިގޮތެއް ނުނިންމާ ކަމަށްވެސް ޖިރޫޑް ވަނީ ބުނެފައެވެ.

މި ޖެނުއަރީ ޓްރާންސްފާގައި ކުލަބު ބަދަލުނުކޮށް ޗެލްސީގައި ޖިރޫޑް މަޑުކުރާއިރު، މީގެ ކުރިން ޗެލްސީގެ ކޯޗު ފްރޭންކް ލަމްޕާޑް ބުނީ އޭނާ އާއި ޖިރޫޑާ ދެމެދު ވަރަށް ރަނގަޅު ގުޅުމެއް އޮންނަ ކަމަށާއި، ޖިރޫޑަކީ އަދިވެސް ޗެލްސީއަށް ވަރަށް މުހިންމު ކުޅުންތެރިއެއް ކަމަށެވެ. އެހެންކަމުން އޭނާ ބޭނުންވަނީ ޖިރޫޑް ޗެލްސީގައި މަޑުކުރުމަށް ކަމަށާއި، އެކަމަކު ޖެނުއަރީ މަހު ޗެލްސީ ދޫކޮށްލަން އޭނާ ބޭނުންވެއްޖެނަމަ އެކަމަށް ހުރަސް ނާޅާނެ ކަމަށްވެސް ލަމްޕާޑް އޭރު ވަނީ ބުނެފައެވެ.

އާސެނަލުން ވިދާލި ޖިރޫޑް ޗެލްސީއަށް ބަދަލުވީ 2018 ވަނަ އަހަރުގެ ޖެނުއަރީ މަހުއެވެ. ޗެލްސީއަށް ބަދަލުވެ، އެ ކުލަބާއެކު އެފްއޭ ކަޕާއި ޔުއެފާ ޔޫރޮޕާ ލީގު ކާމިޔާބުކޮށްފައިވާ ޖިރޫޑް ވަނީ މިހާތަނަށް އެ ކްލަބަށް ކުޅުނު 103 މެޗުގައި 37 ލަނޑު ކާމިޔާބުކޮށްފައެވެ.