ބާ ދަރުމަވަންތަ ސްކޫލް ތަޅާލަން ހަވާލުކުރި ކުންފުންޏަށް އެކަން ނުކުރެވުމުން، އަގު ބޮޑުކޮށް ދެވަނަ ފަހަރަށްވެސް ހަމަ އެކުންފުންޏަށް!
6 ޖެނުއަރީ 2021 | ބުދަ 08:27ބައު ދަރުމަވަންތަ ތަޅާލަން އެއްބަސްވި އަގަށްވުރެ 1،100،400ރ އިތުރަށް ހަރަދުކޮށްގެންވެސް، މުއްދަތަށް ނުނިންމުނު
ދަރުމަވަންތަ ސްކޫލް މިހާރު ހިންގަމުންދާ ވަގުތީ އިމާރާތް: ދަރުމަވަންތަ ސްކޫލްގެ އައު އިމާރާތް ނުފެށި އެތައް އަހަރެއް ވެފައިވަނިކޮށް މަސައްކަތް ފެށީ މިއަހަރު
ދަރުމަވަންތަ ސްކޫލްގެ ބައު އިމާރާތް ތަޅާލަން ހަވާލުކުރި ކުންފުންޏަށް އެއްބަސްވުމުގައިވާ މުއްދަތައް އެކަން ނުކުރެވި، އަލުން އިއުލާން ކުރުމަކާނުލައި، ކުރިން ހަވާލުކުރި ކުންފުންޏާ އެމަސައްކަތް ހަވާލުކޮށްފައިވާކަން އެޑިއުކޭޝަން މިނިސްޓްރީގެ 2017 ވަނަ އަހަރުގެ އޮޑިޓް ރިޕޯޓްގައި ފާހަގަކޮށްފިއެވެ.
އެޑިއުކޭޝަން މިނިސްޓްރީގެ 2017 ވަނަ އަހަރުގެ އޮޑިޓް ރިޕޯޓްގައި ފާހަގަކޮށްފައިވާގޮތުގައި، ދައުލަތުގެ މާލިއްޔަތު ގަވާއިދުގައި ބަޔާންކޮށްފައިވާގޮތުން، ބޮޑެތި މަސައްކަތާއި ގުޅިގެން، އިތުރަށް ކުރަން ނިންމި މަސައްކަތެއް، އެމަސައްކަތެއް ހަވާލުވެފައިވާ ފަރާތާއި ހަވާލުކުރެވޭނީ އިތުރަށް ކުރާ މަސައްކަތުގެ އަގު، އަސްލު ކޮންޓްރެކްޓްގެ ޖުމްލަ އަގުގެ 10 ޕަސެންޓަށްވުރެ އިތުރުނުވާނަމަ ކަމަށެވެ.
ނަމަވެސް ދަރުމަވަންތަ ސްކޫލްގެ ބައު އިމާރާތް ތަޅާލުމުގެ މަސައްކަތަށް އިތުރުކުރި ޖުމްލަ 1،100،400ރ (އެއްމިލިއަން އެއްލައްކަ ހަތަރުސަތޭކަ ރުފިޔާ) އެމަސައްކަތުގެ ޖުމްލަ އަގުގެ 10 ޕަސެންޓަށްވުރެ އިތުރުވި ނަމަވެސް، އަދި މަސައްކަތުގެ އަގާއި މުއްދަތައް ބަދަލު ގެންނަންޖެހޭފަދަ ހާލަތެއް މެދުވެރިވެފައިނުވިނަމަވެސް، މަސައްކަތުގެ އަގަށާއި މުއްދަތަށް ބަދަލުގެނެސް، އިއުލާންކުރުމަކާއި ނުލައި އެމަސައްކަތް ކުރިންވެސް ހަވާލުކުރި ފަރާތަށް މަސައްކަތް ހަވާލުކޮށްފައިވާ ކަމަށް އޮޑިޓް ރިޕޯޓްގައި ފާހަގަކޮށްފައިވެއެވެ. އެއީ ދައުލަތުގެ މާލިއްޔަތު ގަވާއިދާ ހިލާފަށް އެޑިއުކޭޝަން މިނިސްޓްރީން ކޮށްފައިވާ ކަމެއްކަމަށް 2017 ވަނަ އަހަރުގެ އެ މިނިސްޓްރީގެ އޮޑިޓް ރިޕޯޓުގައި ފާހަގަކޮށްފައިވެއެވެ.
މަޖީދިއްޔާ ސްކޫލްގެ ހުޅަނގު ބައި ދަތުމަންވަންތަ ސްކޫލްގެ ނަމަށް ބަދަލުކޮށް، ކިޔަވައިދޭން ފަށާފައިވަނީ 2002 ވަނަ އަހަރުއެވެ. ދަރުމަވަންތަ ސްކޫލްގެ އިމާރާތް ބައުވެ، އަދި ޖާގައިގެ ދަތިކަން ހައްލުކުރުމަށް ހަމަ އެތަނުގައި ދަރުމަންވަންތަ ސްކޫލްގެ އައު އިމާރާތް ކުރުމަށް ނިންމައި ދަރުމަވަންތަ ސްކޫލްގެ ވަގުތީ އިމާރާތެއް، ވެލާނާގޭގެ ބައެއްގައި ހެދިއެވެ. އެ ވަގުތީ އިމާރާތުގައި ކިވައިދޭތާ އަހަރުތަކެއް ފާއިތުވެގެންދިޔައިރުވެސް، އަދި ޖާގައިގެ ދަތިކަން އިންތިހާއަށް އޮތްއިރުވެސް ދަރުމަވަންތަ ސްކޫލްގެ އައު އިމާރާތުގެ މަސައްކަތް ފެށިފައެއް ނުވެއެވެ.
ނަމަވެސް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން ވަނީ، މާލެ ޖަލު ހުންނަ ސަރަހައްދުގައި އޮތް ހުސްބިމުގައި ދަރުމަވަންތަ ސްކޫލް އިމާރާތްކުރުމަށް ނިންމައި، އިމާރާތް ކުރުމަށް ބަޔަކާއި ހަވާލުކޮށްފައެވެ.
މިދިޔަ 2020 ވަނަ އަހަރުގެ ފެބްރުއަރީ 4 ވަނަ ދުވަހު، ދަރުމަވަންތަ ސްކޫލްގެ އާ އިމާރާތުގެ މަސައްކަތް ހަވާލު ކޮށްފައި ވަނީ އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާއެވެ.
ވަށާޖެހޭ ތަޢުލީމެއް ދެވޭ، އެއްދަންފަޅިއަށް ހިންގޭނެ ފުރަތަމަ މޮޑެލް ސްކޫލްގެ މަސައްކަތް އެސް.ޖޭ ކޮންސްޓްރަކްޝަނާ ހަވާލުކުރައްވާފައިވަނީ 364 ދުވަސްތެރޭ ނިންމާގޮތަށެވެ. މިމަޝްރޫއަށް 74.9 މިލިއަން ރުފިޔާ ހަރަދުވާނެއެވެ.
އެއްބަސްވުމުގައި ސޮއި ކުރުމަށްފަހު މިނިސްޓަރު އައިޝަތު އަލީ ވިދާޅުވީ 2022 ގެ ދިރާސީ އާ އަހަރު ދަރުމަވަންތައިގެ އާ ސްކޫލްގައި ކިޔަވައިދެވޭނެ ކަމަށް އުންމީދު ކުރައްވާ ކަމަށެވެ.
ދަރުމަވަންތަ ސްކޫލްގެ އާ އިމާރާތް ޑިޒައިން ކޮށްފައިވަނީ 1000 ދަރިވަރުންނަށް އަދި ކޮންމެ ކްލާސް ރޫމެއްގައި 25 ދަރިވަރުންނަށް ކިޔެވޭނެ ގޮތަށް 41 ކްލާސް ރޫމް ހިމަނައިގެން ކަމަށް އެޑިޔުކޭޝަން މިނިސްޓްރީން މައުލޫމާތުދީފައިވެއެވެ.
