ސްޕެނިޝް ލީގުގައި އާދީއްތަ ދުވަހުގެރޭ ފަހު ވަގުތު ޑިޕޯޓިވޯ އަލަވޭސް ބަލިކޮށް އެތުލެޓިކޯ މެޑްރިޑުން ތާވަލުގެ އެއްވަނައަށް އަލުން އަރައިފިއެވެ.

އަލަވޭސްގެ ދަނޑުގައި ކުޅުނު މެޗުން އެތުލެޓިކޯ މޮޅުވީ 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި އެތުލެޓިކޯއިން ވަނީ ލީޑު ނަގާފައެވެ. މި ހާފު ނިމެން ހަތަރު މިނެޓަށް ވެފައި ވަނިކޮށް އެތުލެޓިކޯއަށް ލީޑު ނަގައިދިނީ މާކޮސް ލޮރެންޓޭއެވެ. މި މެޗުގައި އަލަވޭސްއަށް މައްސަލަތަކެއް ދިމާވީ 63 ވަނަ މިނެޓުގައި އެ ޓީމުގެ ވިކްޓަ ލަގުއާޑިއާއަށް ސީދާ ރަތް ކާޑެއް ދެއްކުމުންނެވެ. ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު އޭނާއަށް ރަތް ކާޑެއް ދެއްކީ އެތުލެޓިކޯގެ ތޯމަސް ލެމާއަށް ކުރި ނުރައްކާތެރި ފައުލަކާ ގުޅިގެންނެވެ.

އެކަމަކު މެޗު ނިމެން ހަ މިނެޓަށް ވެފައި ވަނިކޮށް އެތުލެޓިކޯގެ ފެލިއްޕޭ އަތުން ބައިކޮޅަށް ވަން ލަނޑުން އަލަވޭސްއިން ވަނީ މެޗުގައި ނަތީޖާ އެއްވަރުކޮށްފައެވެ. މި މެޗުން އެތުލެޓިކޯ މޮޅުވީ މެޗުގެ ފަހު މިނެޓުގައި ލުއިސް ސުއަރޭޒް ޖަހައިދިން ލަނޑުންނެވެ.

މި މޮޅާއެކު އެތުލެޓިކޯ ތާވަލުގެ އެއްވަނައަށް އަލުން އެރީ ކުޅުނު 15 މެޗުން ލިބުނު 38 ޕޮއިންޓާއެކުއެވެ. ދެވަނައަށް ވެއްޓުނު އެންމެ ފަހުގެ ޗެމްޕިއަން ރެއާލް މެޑްރިޑަށް 17 މެޗުން ލިބިފައިވަނީ 36 ޕޮއިންޓެވެ. އަދި އެތުލެޓިކޯ އަތުން ބަލިވި އަލަވޭސް އޮތީ ތާވަލުގެ 14 ވަނައިގައި 17 މެޗުން 18 ޕޮއިންޓާއެކުއެވެ.

މީގެ އިތުރުން ލީގުގައި އާދީއްތަ ދުވަހުގެރޭ ކުޅުނު މެޗުން ބާސެލޯނާ މޮޅުވީ ހުއެސްކާ އަތުން 1-0 ގެ ނަތީޖާއަކުންނެވެ. މި މެޗަކީ ބާސާގެ ކެޕްޓަން ލިއޮނެލް މެސީ ބާސާއަށް ކުޅެދިން 750 ވަނަ މެޗެވެ. އަދި މިއީ ސްޕެނިޝް ލީގުގައި އޭނާ ކުޅުނު 500 ވަނަ މެޗެވެ.

ހުއެސްކާގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ބާސާއިން މޮޅު ކުޅުމެއް ދެއްކިއިރު، މެޗުގައި ފެނިގެންދިޔަ ހަމައެކަނި ލަނޑު ބާސާއިން ޖަހާފައިވަނީ މި ހާފުގައެވެ. މެޗުގެ 27 ވަނަ މިނެޓުގައި މެސީ ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ފްރެންކީ ޑި ޔޮންއެވެ.

މި މޮޅާއެކު ބާސާ އޮތީ ތާވަލުގެ ފަސްވަނައިގައި 16 މެޗުން 28 ޕޮއިންޓާއެކުއެވެ. އަދި ބާސާ އަތުން ބަލިވި ހުއެސްކާ އޮތީ ތާވަލުގެ ފުލުގައި 17 މެޗުން 12 ޕޮއިންޓާއެކުއެވެ.