މިދިޔަ އަހަރު ރާއްޖެއަށް އެންމެ ގިނަ އަދަދެއްގެ ފަތުރުވެރިން އައީ އިންޑިއާއިން

މިދިޔަ އަހަރު ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައިވަނީ އިންޑިއާއިން ކަމަށް ޓޫރިޒަމް މިނިސްޓްރީން ބުނެފިއެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން 2020 ވަނަ އަހަރު އިންޑިއާއިން 62,905 ފަތުރުވެރިން ވަނީ ރާއްޖެ އައިސްފައެވެ. މިއީ މިދިޔަ އަހަރު ރާއްޖެ އައި ފަތުރުވެރިންގެ 11.3 އިންސައްތައެވެ.

މިދިޔަ އަހަރު ރާއްޖެ އައި ފަތުރުވެރިންގެ ތެރެއިން ދެވަނައަށް އެންމެ ގިނަ އަދަދެއްގެ ފަތުރުވެރިން އައިސްފައިވާ ގައުމު ކަމަށްވާ ރަޝިއާއިން ހިއްސާ ކުރަނީ 11.1 އިންސައްތައެވެ. އެއީ ޖުމްލަ 61,388 ފަތުރުވެރިންނެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ފާއިތުވި އަހަރު ރާއްޖެއަށް އެންމެ ގިނައިން ފަތުރުވެރިން އައި 10 ގައުމުން ރާއްޖެ އައި ފަތުރުވެރިންގެ 65.9 އިންސައްތަ ހިއްސާކުރާއިރު، ތިންވަނައަށް އެންމެ ގިނަ އަދަދެއްގެ ފަތުރުވެރިން ރާއްޖެ އައިސްފައި ވަނީ އިނގިރޭސިވިލާތުންނެވެ. އެގައުމުން ރާއްޖެ އައި 52,716 ފަތުރުވެރިން ހިއްސާ ކުރަނީ 9.5 އިންސައްތައެވެ.

މީގެ އިތުރުން އިޓަލީވިލާތުން އައި 46,690 ފަތުރުވެރިން 8.4 އިންސައްތަ ހިއްސާކުރާއިރު، ޖަރުމަންވިލާތުން އައި 36,435 ފަތުރުވެރިން ހިއްސާކުރަނީ 6.6 އިންސައްތައެވެ. އަދި ޗައިނާއިން އައި 34,245 ފަތުރުވެރިން ހިއްސާކުރަނީ 6.2 އިންސައްތައެވެ.

މިދިޔަ އަހަރު ފަރަންސޭސިވިލާތުން 28,031 ފަތުރުވެރިން ރާއްޖެ އައިސްފައިވާއިރު، މިއީ ރާއްޖެ އައި ފަތުރުވެރިންގެ ފަސް އިންސައްތައެވެ.

ރާއްޖެ އަށް އެންމެ ގިނައިން ފަތުރުވެރިން އައި 10 ގައުމުގެ ތެރޭގައި އެމެރިކާ ހިމެނޭއިރު، އެ ގައުމުން ހިއްސާކުރަނީ ރާއްޖެ އައި ފަތުރުވެރިންގެ 3.6 އިންސައްތައެވެ. އެއީ 19,759 ފަތުރުވެރިންނެވެ. މީގެ އިތުރުން މި ލިސްޓުގައި ސްވިޒަލޭންޑާއި ޔޫކްރެއިން ހިމެނޭއިރު، ސްވިޒަލޭންޑުން ރާއްޖެ އައިސްފައިވަނީ 12,516 ފަތުރުވެރިންނެވެ. އަދި ޔޫކްރެއިނުން އައިސްފައިވަނީ 10,343 ފަތުރުވެރިންނެވެ.

ކޮވިޑް-19 ގެ ސަބަބުން މިދިޔަ އަހަރު ރާއްޖޭގެ ފަތުރުވެރިކަމުގެ ސިނާއަތައް ގިނަ ގޮންޖެހުންތަކަކާ ކުރިމަތިލާން ޖެހުނު ނަމަވެސް، އަހަރު ނިމުނުއިރު ފަތުރުވެރިކަމުގެ ސިނާއަތް ވަނީ ގިނަ ކާމިޔާބީތަކެއް ހޯދާފައެވެ. އެގޮތުން އަހަރަށް ކަނޑައެޅި ފަތުރުވެރިންގެ ޓާގެޓަށް ވާސިލުވެފައިވާއިރު، ގިނަ އެވޯޑުތަކެއްވެސް ވަނީ ލިބިފައެވެ.

2020 ވަނަ އަހަރު ނިމުނުއިރު ޖުމްލަ 555,399 ފަތުރުވެރިން ވަނީ ރާއްޖެ އައިސްފައެވެ.