ފުރަތަމަ ފަހަރަށް ރާއްޖޭގައި ކަރުދާސް ބޭނުން ނުކޮށް މުވައްޒަފުންގެ މަސައްކަތުގެ ފެންވަރު ބެލިގެންދާނެ - ނާޞިޙް
ޕޯޓަލް ހުޅުވާލާ ހިސާބުން، މުވައްޒަފުންނާއި އިދާރާތަކާއި އެކު އޮންނަ ގުޅުން އިތުރަށް ހަރުދަނާ ވާނެ
ސިވިލް ސަރވިސް ކޮމިޝަނުގެ ރައީސް މުޙައްމަދު ނާޞިޙް
ސީއެސްވިއުގަ އޮންލައިން ޕޯޓަލްގެ ސަބަބުން ސައްބީސް ހާހެއްހާ، ސިވިލް ސަރވިސް މުވައްޒަފުންގެ މަސައްކަތުގެ ފެންވަރު ބެލުމަށް ދައުލަތުގެ ބަޖެޓުން ކުރަމުންދިޔަ ޚަރަދުތައް އެތައް ގުނައެއް ކުޑަވެގެންދާނެ ކަމަށް ސިވިލް ސަރވިސް ކޮމިޝަނުގެ ރައީސް މުޙައްމަދު ނާޞިޙް ވިދާޅުވެއްޖެއެވެ.
ނާޞިޙް މިހެން ވިދާޅުވީ އާދިއްތަ ދުވަހު ސިވިލް ސަރވިސް މުވައްޒަފުންގެ ވަޒީފާއާ ގުޅޭ ކަންކަން ކުރިޔަށް ގެންދިޔުމަށް ބޭނުންކުރާ ސީއެސްވިއުގަ، އޮންލައިންކޮށް، އިފްތިތާޙު ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
މީގެ އިތުުރުން ނާޞިޙް ވިދާޅުވީ އާންމުކޮށް ބޭނުންކުރެވޭ ގޮތަށް ސީ.އެސް ވިއުގަ އޮންލައިން ޕޯޓަލް ހުޅުވާލާ ހިސާބުން، އެ ކޮމިޝަނާއި ސިވިލް ސަރވިސް މުވައްޒަފުންނާއި ސިވިލް ސަރވިސްގެ އެންމެހާ އިދާރާތަކާއެކު އޮންނަ ގާތް ގުޅުން އިތުރަށް ހަރުދަނާވެގެން ދާނެކަަމަށެވެ.
އަދި އެ ކޮމިޝަނުން ފޯރުކޮށްދޭ ޚިދުމަތްތައް ފުރިހަމަ ގޮތުގައި ފޯރުކޮށްދިނުމަށާއި، ދެވޭ ޚިދުމަތްތައް ހަރުދަނާކުރުމަށް މަގުފަހިވެގެންދާނެ ކަމަށް ނާޞިޙް ފާހަގަކުރެއްވިއެވެ.
މިއީ ޑިޖިޓަލް ހިއުމަން ރިސޯސް މެނޭޖުމަންޓު ސިސްޓަމެއް ޤާއިމުކުރުމަށް އެ ކޮމިޝަނުން ކުރަމުންގެންދާ ދުރު ރާސްތާ ޕްލޭނުގެ ތެރެއިން ގިރާކުރެވުނު ވަރަށް މުހިއްމު ހަރުފަތެއް ކަމަށްވެސް ނާޞިޙް ވިދާޅުވިއެވެ.
އަދި މި އޮންލައިން ޕޯޓަލްއާއި އެކު ހާސިލްވެގެންދިއަ އިތުރު ކާމިޔާބީތަކުގެ ތެރޭގައި ފުރަތަމަ ފަހަރަށް ރާއްޖޭގައި ކަރުދާސް ބޭނުން ނުކޮށް މުވައްޒަފުންގެ މަސައްކަތުގެ ފެންވަރު ބެލިގެންދާނެ ކަމަށް ނާޞިޙް ވަނީ ހާމަކުރައްވާފައެވެ.
ސިވިލް ސަރވިސްގެ މުވައްޒަފުން ކުރިއެރުމަށްޓަކައި ސަރުކާރުން އެކުލަވާލައްވާ ސިޔާސަތުތައް ތަންފީޒު ކުރުމުގެ ގޮތުން ކުރަމުންގެދާ އިޚްލާސްތެރި ޚިދުމަތްތައް ފާހަގަކޮށް ނާޞިޙް ވަނީ މި ކަންކަމުގައި ޝާމިލުވާ އެންމެހާ ފަރާތްތަކަށް ޝުކުރު އަދާކޮށްފައެވެ.
